(តាកែវ)៖ លោក វ៉ី សំណាង អភិបាលខេត្តតាកែវ នៅព្រឹកថ្ងៃទី៩ ខែកក្កដា ឆ្នាំ២០២៦ បានអំពាវនាវបងប្អូនប្រជាពលរដ្ឋទាំងអស់ក្នុងខេត្ត ឲ្យមានការប្រុងប្រយ័ត្នខ្ពស់ចំពោះជំងឺគ្រុនឈាម ខណៈដែលខេត្តតាកែវបានរកឃើញ ករណីជំងឺនេះកើតឡើងជាង ៧០ករណី ទៅលើមនុស្សចាស់ និងកុមារ។

ការអំពាវនាវនេះធ្វើឡើងក្នុងឱកាសដែលលោកអភិបាលខេត្ត បានចុះបើកយុទ្ធនាការទប់ស្កាត់ និងបង្ការជំងឺគ្រុនឈាម តាមរយៈការបាញ់ថ្នាំសម្លាប់មូស និងដាក់ថ្នាំអាបែតតាមពាងទឹក ព្រមទាំងជួបសំណេះសំណាល ជាមួយប្រជាពលរដ្ឋនៅភូមិព្រេច សង្កាត់រកាក្នុង ក្រុងដូនកែវ។

លោកអភិបាលខេត្តបានសង្កត់ធ្ងន់ថា រដូវវស្សាដែលមានភ្លៀងធ្លាក់ អាចបណ្តាលឲ្យមានទឹកដក់នៅជុំវិញផ្ទះ ដូចជាលើសំបកកង់ឡាន ឬសំបកដូង ដែលជាជម្រកមូសខ្លាពង។ ដូច្នេះ លោកបានណែនាំឲ្យប្រជាពលរដ្ឋ នាំគ្នាលុបបំបាត់ថ្លុកទឹក កាប់ឆ្ការព្រៃជុំវិញផ្ទះ និងដាក់ថ្នាំអាបែតក្នុងពាងទឹក ដើម្បីទប់ស្កាត់ការរីករាលដាលនៃជំងឺគ្រុនឈាម។ ជាមួយគ្នានេះ លោកក៏បានណែនាំដល់មន្ត្រីមន្ទីរសុខាភិបាល ឲ្យសហការជាមួយអាជ្ញាធរមូលដ្ឋាន ចុះបាញ់ថ្នាំសម្លាប់មូសតាមភូមិឃុំ និងផ្សព្វផ្សាយឲ្យបានទូលំទូលាយពីវិធានការបង្ការ។

លោកឱសថការី ផាន់ វ៉ាន់ ប្រធានមន្ទីរសុខាភិបាលខេត្តតាកែវ បានបញ្ជាក់ថា ឯកឧត្តមរដ្ឋមន្ត្រីក្រសួងសុខាភិបាល និងឯកឧត្តមអភិបាលខេត្តតាកែវ តែងតែយកចិត្តទុកដាក់ និងក្រើនរំលឹកដល់មន្ទីរសុខាភិបាល និងសហគមន៍ ឲ្យតាមដាន បង្ការ ទប់ស្កាត់ និងឆ្លើយតបឲ្យបានទាន់ពេលវេលាចំពោះការកើនឡើងនៃជំងឺគ្រុនឈាមក្នុងរដូវវស្សានេះ ដោយមិនមានថ្ងៃសម្រាកឡើយ។

លោកក៏បានអំពាវនាវដល់ឪពុកម្តាយដែលមានកូនតូចៗ ដែលមានរោគសញ្ញាសង្ស័យជំងឺគ្រុនឈាម ដូចជាគ្រុនក្តៅខ្លាំង ឈឺក្បាល ឬមានស្នាមកន្ទួល ត្រូវប្រញាប់បញ្ជូនទៅមណ្ឌលសុខភាព ឬមន្ទីរពេទ្យបង្អែករបស់រដ្ឋឲ្យបានឆាប់ ដើម្បីពិនិត្យ និងព្យាបាលទាន់ពេលវេលា ជៀសវាងគ្រោះថ្នាក់ដល់អាយុជីវិត៕