(ស្វាយរៀង)៖ លោក សរ សុដានី អភិបាលរងខេត្តស្វាយរៀង និងជាប្រធានក្រុមការងារប្រឆាំងការឆបោកតាមប្រព័ន្ធបច្ចេកវិទ្យាក្រុងស្វាយរៀង តំណាងលោក ប៉េង ពោធិ៍សា អភិបាលខេត្ត នៅថ្ងៃទី៩ ខែកក្កដា ឆ្នាំ២០២៦ បានអញ្ជើញដឹកនាំកិច្ចប្រជុំត្រួតពិនិត្យវឌ្ឍនភាពការងារ ពាក់ព័ន្ធនឹងការបង្ការ បង្ក្រាប និងទប់ស្កាត់បទល្មើសឆបោកតាមប្រព័ន្ធបច្ចេកវិទ្យា (Online Scam)។ កិច្ចប្រជុំនេះបានប្រព្រឹត្តទៅនៅសាលប្រជុំសាលាក្រុងស្វាយរៀង ដោយមានការចូលរួមពីមន្ត្រីពាក់ព័ន្ធជាច្រើនរូប។

ក្នុងឱកាសនោះ លោក ណុប ចំរើន អភិបាលក្រុងស្វាយរៀង បានធ្វើរបាយការណ៍ស្តីពីលទ្ធផលនៃការចុះធ្វើរដ្ឋបាលចំហរតាមទីតាំងផ្ទះជួល ផ្ទះសំណាក់ សណ្ឋាគារ បន្ទប់ជួល រោងចក្រ សហគ្រាស និងទីតាំងពាក់ព័ន្ធនានា សរុបចំនួន ១០៥លើក គ្របដណ្តប់ ១៣៣ទីតាំង។ ជាលទ្ធផល ក្រុមការងារបានពិនិត្យរកឃើញជនបរទេសស្នាក់នៅចំនួន ៥២៧នាក់ ក្នុងនោះស្រី ៨៣នាក់ និងបានបញ្ជូនទៅសមត្ថកិច្ចជំនាញ ដើម្បីអនុវត្តតាមនីតិវិធីជាធរមាន។

លោក សរ សុដានី បានថ្លែងថា ទោះបីសកម្មភាពឆបោកតាមប្រព័ន្ធបច្ចេកវិទ្យាមានការថមថយក៏ដោយ ក៏លោក ប៉េង ពោធិ៍សា អភិបាលខេត្ត បានបន្តដាក់បទបញ្ជាម៉ឺងម៉ាត់បំផុតដល់តួអង្គពាក់ព័ន្ធទាំងអស់ ត្រូវបន្តចុះអនុវត្តវិធានការរដ្ឋបាលចំហរជាប្រចាំក្នុងភូមិសាស្ត្ររបស់ខ្លួន ដោយភាពទទួលខុសត្រូវខ្ពស់បំផុត។ លោកអភិបាលរងខេត្តបានសង្កត់ធ្ងន់ថា ការអនុវត្តនេះត្រូវធ្វើឡើងដោយទន់ភ្លន់ បត់បែន និងម៉ឺងម៉ាត់ ដើម្បីធានាឲ្យបាននូវប្រសិទ្ធភាពខ្ពស់ក្នុងការអនុវត្តបទបញ្ជារបស់ប្រមុខរាជរដ្ឋាភិបាល ជាពិសេសធានាឲ្យបានថា ភូមិ ឃុំ សង្កាត់ ស្រុក ក្រុង មានសុវត្ថិភាព ហើយគ្មានសកម្មភាពឆបោកតាមប្រព័ន្ធបច្ចេកវិទ្យាទៀតឡើយ។

លោកអភិបាលរងខេត្តបានគូសបញ្ជាក់បន្ថែមថា ការចុះអនុវត្តរដ្ឋបាលចំហរត្រូវធ្វើឡើងដោយតម្លាភាព សហការល្អ និងធានាថាមិនធ្វើឲ្យមានការថ្នាំងថ្នាក់ពីសំណាក់បងប្អូនប្រជាពលរដ្ឋ ជាពិសេសពីសំណាក់អ្នកវិនិយោគសុច្ចរិត និងអ្នកប្រកបមុខរបរត្រឹមត្រូវ។ បច្ចុប្បន្ននេះ លោកអភិបាលខេត្តបានខិតខំប្រឹងប្រែងយ៉ាងខ្លាំង ទាំងការទាក់ទាញអ្នកវិនិយោគដែលជាក្រុមសេដ្ឋកិច្ចពណ៌ស និងការដឹកនាំអនុវត្តបទបញ្ជាបង្ការ ទប់ស្កាត់ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា ដើម្បីធានាមិនឲ្យសកម្មភាពពណ៌ខ្មៅមកបំផ្លាញសេដ្ឋកិច្ចពណ៌សក្នុងខេត្តស្វាយរៀងបានឡើយ។ គោលបំណងចម្បងគឺធានាឲ្យបាននូវសន្តិភាពផ្លូវចិត្តពេញលេញជូនបងប្អូនប្រជាពលរដ្ឋ អ្នកប្រកបមុខរបរត្រឹមត្រូវ និងអ្នកវិនិយោគសុច្ចរិត ក្នុងភូមិសាស្ត្រខេត្តស្វាយរៀងទាំងមូលជាដាច់ខាត៕