(កណ្ដាល)៖ លោក នូ សាខន ប្រធានក្រុមប្រឹក្សាខេត្តកណ្ដាល បានជំរុញយ៉ាងម៉ឺងម៉ាត់ដល់មន្ទីរសុខាភិបាលខេត្ត ឱ្យបង្កើនការយកចិត្តទុកដាក់ខ្ពស់ចំពោះការកើនឡើងនូវករណីជំងឺគ្រុនឈាម ដែលបច្ចុប្បន្នកំពុងបង្កការព្រួយបារម្ភយ៉ាងខ្លាំងដល់សុខភាពប្រជាពលរដ្ឋ ជាពិសេសកុមារតូចៗ ក្រោយមានករណីកុមារស្លាប់ជាបន្តបន្ទាប់។ ការជំរុញនេះធ្វើឡើងនៅក្នុងកិច្ចប្រជុំសាមញ្ញលើកទី២៦ របស់ខ្លួន ក្នុងអាណត្តិទី៤ នាថ្ងៃទី៩ ខែកក្កដា ឆ្នាំ២០២៦ នៅសាលាខេត្តកណ្ដាល។

ក្នុងកិច្ចប្រជុំនោះ លោក នូ សាខន បានណែនាំឱ្យមន្ទីរសុខាភិបាលខេត្ត សហការជាមួយអាជ្ញាធរមូលដ្ឋានគ្រប់លំដាប់ថ្នាក់ ដើម្បីបង្កើនការផ្សព្វផ្សាយ និងអប់រំសុខភាពដល់ប្រជាពលរដ្ឋឱ្យយល់ដឹងអំពីវិធានការការពារខ្លួនពីមូសខាំ និងរបៀបថែរក្សាអនាម័យជុំវិញផ្ទះ ដើម្បីបង្ការជំងឺគ្រុនឈាម។ ជាមួយគ្នានេះ មន្ទីរពេទ្យបង្អែក និងមណ្ឌលសុខភាពនានា ត្រូវត្រៀមលក្ខណៈ និងសម្ភារបរិក្ខារពេទ្យឱ្យបានគ្រប់គ្រាន់ ដើម្បីធានាបាននូវការសង្គ្រោះ និងព្យាបាលអ្នកជំងឺគ្រុនឈាមបានទាន់ពេលវេលា។ លោកក៏បានសង្កត់ធ្ងន់លើការអនុវត្តវិធានការដាក់ថ្នាំអាបេត និងចុះបាញ់ថ្នាំសម្លាប់មូសខ្លាដែលជាភ្នាក់ងារចម្លងជំងឺគ្រុនឈាមដល់គ្រប់មូលដ្ឋាន។

លោកប្រធានក្រុមប្រឹក្សា បានអំពាវនាវដល់ប្រជាពលរដ្ឋទាំងអស់ ប្រសិនបើមានការសង្ស័យថាមានរោគសញ្ញាជំងឺគ្រុនឈាម សូមប្រញាប់ទៅជួបក្រុមគ្រូពេទ្យជំនាញ ដើម្បីធ្វើការពិនិត្យ និងព្យាបាលឱ្យទាន់ពេលវេលា ហើយសូមកុំបន្តព្យាបាលនៅផ្ទះឱ្យសោះ ព្រោះជំងឺនេះអាចឈានដល់ការបាត់បង់ជីវិត ប្រសិនបើយើងបណ្ដែតបណ្ដោយ។

បន្ថែមពីលើនេះ លោក នុត ពុធដារ៉ា អភិបាលរងខេត្ត ក៏បានជំរុញឱ្យមន្ត្រីរាជការ អាជ្ញាធរដែនដី និងប្រជាពលរដ្ឋ ត្រូវរួមគ្នាយកចិត្តទុកដាក់លើបញ្ហាជំងឺឆ្លង និងជំងឺមិនឆ្លងឱ្យបានផុលផុសបំផុត។ លោកបានបញ្ជាក់ថា ក្រៅពីការបង្ការជំងឺគ្រុនឈាម យើងក៏ត្រូវបង្កើនការយល់ដឹង និងទប់ស្កាត់ជំងឺមិនឆ្លងនានា ដូចជា ជំងឺលើសឈាម ជំងឺទឹកនោមផ្អែម ជំងឺបេះដូង និងជំងឺដាច់សរសៃឈាមខួរក្បាលជាដើម។ ហេតុនេះ មន្ទីរសុខាភិបាលខេត្ត ត្រូវដើរតួនាទីជាស្នូលក្នុងការរៀបចំកម្មវិធីអប់រំសុខភាពសាធារណៈឱ្យបានទូលំទូលាយ ដោយជំរុញឱ្យប្រជាពលរដ្ឋងាកមកចាប់អារម្មណ៍លើការហាត់ប្រាណ ការបរិភោគអាហារដែលមានសុវត្ថិភាព និងការពិនិត្យសុខភាពជាប្រចាំ៕