(ភ្នំពេញ)៖ ក្រុមប្រឹក្សារាជធានីភ្នំពេញ បានជំរុញនិងសម្តែងការកោតសរសើរយ៉ាងខ្លាំង ចំពោះរដ្ឋបាលរាជធានីភ្នំពេញ ដែលបានខិតខំប្រឹងប្រែងបំពេញការងារបានយ៉ាងល្អប្រសើរ ក្នុងការរក្សាសន្តិសុខ សណ្តាប់ធ្នាប់សាធារណៈ ការបោសសំអាតបទល្មើសនានា និងការផ្តល់សេវាជូនប្រជាពលរដ្ឋតាមរយៈច្រកចេញ-ចូលតែមួយ កាលពីខែមិថុនា កន្លងទៅនេះ។ ការជំរុញនិងកោតសរសើរនេះ បានធ្វើឡើងក្នុងកិច្ចប្រជុំសាមញ្ញលើកទី២៦ របស់ក្រុមប្រឹក្សារាជធានីភ្នំពេញ អាណត្តិទី៤ ដែលប្រព្រឹត្តទៅនាព្រឹកថ្ងៃទី០៩ ខែកក្កដា ឆ្នាំ២០២៦ នៅសាលារាជធានីភ្នំពេញ។

ក្រោមអធិបតីភាពលោក ជួប ខុន សមាជិកក្រុមប្រឹក្សារាជធានី តំណាងលោក ម៉ប់ សារិន ប្រធានក្រុមប្រឹក្សារាជធានីភ្នំពេញ និងលោក ឆាយ វីរៈ អភិបាលរងរាជធានីភ្នំពេញ តំណាងលោក ឃួង ស្រេង អភិបាលរាជធានីភ្នំពេញ កិច្ចប្រជុំបានវាយតម្លៃខ្ពស់ចំពោះលទ្ធផលការងារដែលសម្រេចបាន។ លោក ជួប ខុន បានគូសបញ្ជាក់ថា រដ្ឋបាលរាជធានីភ្នំពេញ បានអនុវត្តការងារយ៉ាងសកម្ម ដូចជាការរក្សាសន្តិសុខ សណ្តាប់ធ្នាប់ ការបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) ការបង្ក្រាបគ្រឿងញៀន ល្បែងស៊ីសង ការគ្រប់គ្រងសំរាម ការស្តារលូ ប្រឡាយ និងជាពិសេសការផ្តល់សេវាសាធារណៈតាមរយៈច្រកចេញ-ចូលតែមួយ ប្រកបដោយប្រសិទ្ធភាពខ្ពស់។

ជាការឆ្លើយតប លោក ឆាយ វីរៈ បានថ្លែងអំណរគុណចំពោះការកោតសរសើរនេះ ដោយចាត់ទុកថាជាកម្លាំងចិត្តដ៏ធំធេងសម្រាប់រដ្ឋបាលរាជធានីភ្នំពេញ បន្តពុះពារបន្ថែមទៀត ដើម្បីធ្វើឱ្យរាជធានីភ្នំពេញ កាន់តែមានសន្តិសុខ សុវត្ថិភាព និងការអភិវឌ្ឍរីកចម្រើនមួយកម្រិតទៀត។ លោកបានបញ្ជាក់ថា គណៈបញ្ជាការឯកភាពរដ្ឋបាលរាជធានីភ្នំពេញ ដឹកនាំដោយអភិបាលរងមួយរូប បានចុះពិនិត្យទីតាំងសង្ស័យពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យាទាំងយប់ទាំងថ្ងៃ ដើម្បីលុបបំបាត់បទល្មើសទាំងនេះឱ្យអស់ពីមូលដ្ឋាន។ ចំពោះការផ្តល់សេវាសាធារណៈ លោក ឃួង ស្រេង អភិបាលរាជធានីភ្នំពេញ បានដាក់បទបញ្ជាយ៉ាងម៉ឺងម៉ាត់ ក្នុងការផ្តល់សេវាឱ្យបានលឿន និងទាន់ពេលវេលា។

ទាក់ទងនឹងការគ្រប់គ្រងសំណល់រឹង លោក ឆាយ វីរៈ បានបន្ថែមថា បច្ចុប្បន្នរាជធានីភ្នំពេញ បានដឹកសំរាមប្រមាណ ៤០០០តោនក្នុងមួយថ្ងៃ ទៅកាន់ទីលានចាក់សំរាមនៅខណ្ឌដង្កោ ហើយចាប់ពីឆ្នាំ២០២៧តទៅ នឹងបង្វែរទៅទីលានសំរាមនៅទួលព្រិច ខេត្តកណ្តាលវិញ។ ចំណែកការងារស្តារលូ ប្រឡាយវិញ លោកអភិបាលរាជធានីភ្នំពេញ តែងតែបញ្ជាឱ្យមន្ទីរសាធារណការ និងដឹកជញ្ជូនរាជធានីភ្នំពេញ រួមជាមួយអាជ្ញាធរខណ្ឌទាំង១៤ ចុះស្តារប្រព័ន្ធលូ និងប្រឡាយមុនរដូវវស្សាមកដល់ជារៀងរាល់ឆ្នាំ ដើម្បីត្រៀមរំដោះជំនន់ទឹកភ្លៀង បញ្ចៀសការជន់លិចផ្ទះសម្បែងប្រជាពលរដ្ឋ និងហេដ្ឋារចនាសម្ព័ន្ធនានា ក្នុងរដូវវស្សានេះ។ កិច្ចខិតខំប្រឹងប្រែងទាំងនេះ ឆ្លុះបញ្ចាំងពីការប្តេជ្ញាចិត្តខ្ពស់របស់រដ្ឋបាលរាជធានីភ្នំពេញ ក្នុងការលើកកម្ពស់គុណភាពជីវិតប្រជាពលរដ្ឋ និងការអភិវឌ្ឍរាជធានីឱ្យកាន់តែរីកចម្រើន៕