(ភ្នំពេញ)៖ លោក ហួត ហាក់ រដ្ឋមន្ត្រីក្រសួងទេសចរណ៍ នៅថ្ងៃទី៩ ខែកក្កដា ឆ្នាំ២០២៦ បានអញ្ជើញជាអធិបតី និងថ្លែងសន្ទរកថាបើកជាផ្លូវការ នៃពិធីការបើកបរទោចក្រយានយន្ត (ម៉ូតូ) ពីព្រះរាជាណាចក្រកម្ពុជា ឆ្ពោះទៅកាន់ពិព័រណ៍ម៉ូតូអន្តរជាតិ Esposizione Internazionale delle Due Ruote (EICMA) ដែលនឹងប្រារព្ធឡើងពីថ្ងៃទី៥ ដល់ថ្ងៃទី៨ ខែវិច្ឆិកា ឆ្នាំ២០២៦ នៅទីក្រុង Milan ប្រទេសអ៉ីតាលី ដោយមានការអញ្ជើញចូលរួមពីលោក ហួត ហៃ អភិបាលរង និងជាតំណាងលោក ឃួង ស្រេង អភិបាលរាជធានីភ្នំពេញ, ព្រមទាំងថ្នាក់ដឹកនាំក្រសួង-ស្ថាប័នពាក់ព័ន្ធ វិស័យឯកជន និងភ្ញៀវកិត្តិយសជាតិ និងអន្តរជាតិជាច្រើនរូប នៅផ្សារទំនើប ជីប ម៉ុង មេហ្កាម៉ល ២៧១។

ក្នុងឱកាសនេះ រដ្ឋមន្ត្រី ហួត ហាក់ បានវាយតម្លៃខ្ពស់ចំពោះគំនិតផ្ដួចផ្ដើមរបស់ក្រុមហ៊ុន Calypso Motors និងការគាំទ្រពីក្រុមហ៊ុន ជីប ម៉ុងដែលបានរួមចំណែកជំរុញការផ្សព្វផ្សាយសក្តានុពលទេសចរណ៍ និងការវិនិយោគរបស់កម្ពុជាទៅកាន់ពិភពលោក ដោយសបញ្ជាក់ថា ការចូលរួមក្នុងពិព័រណ៍ម៉ូតូអន្តរជាតិ EICMA ២០២៦ មិនត្រឹមតែជាការនាំយកទោចក្រយានយន្តដែលដំឡើង និងផលិតនៅកម្ពុជា ទៅកាន់ទីផ្សារអន្តរជាតិប៉ុណ្ណោះទេ ប៉ុន្តែក៏ជាការផ្សព្វផ្សាយសក្តានុពលទេសចរណ៍ និងវិនិយោគរបស់កម្ពុជាជា «Cambodia – Kingdom of Wonder- Feel the Warmth» ទៅកាន់ពិភពលោកផងដែរ។

ជាមួយគ្នា រដ្ឋមន្ត្រី ហួត ហាក់ គូសបញ្ជាក់បន្ថែមថា បេសកកម្មបើកបរម៉ូតូឆ្លងកាត់ចម្ងាយប្រមាណ៣០,០០០គីឡូម៉ែត្រនេះ មិនមែនគ្រាន់តែជាការធ្វើដំណើរផ្សងព្រេងនោះទេ ប៉ុន្តែជាបេសកកម្មតំណាងជាតិ ដែលនាំយកសារដ៏សំខាន់គឺកត្តាសុខសន្តិភាព សក្តានុពលទេសចរណ៍ដ៏សំបូរបែប និងសមត្ថភាព ភាពក្លាហាន និងស្មារតី «ខ្មែរអាចធ្វើបាន» រួចផ្សំជាមួយបច្ចេកវិទ្យាទាន់សម័យ ទៅបង្ហាញលើឆាកអន្តរជាតិ ដែលមានលោក វ៉ាន់ ហាកូលីន នឹងដើរតួជាទូតសុច្ឆន្ទៈ ផ្សព្វផ្សាយវប្បធម៌ សក្តានុពលទេសចរណ៍ និងបដិសណ្ឋារកិច្ចដ៏កក់ក្តៅរបស់ប្រជាជនកម្ពុជា ព្រមទាំងលើកកម្ពស់កម្ពុជា ជាគោលដៅទេសចរណ៍ប្រកបដោយសុវត្ថិភាព និងបង្ហាញសក្តានុពលឧស្សាហកម្មយានយន្ត Made in Cambodia ទៅកាន់ពិភពលោក។

ទន្ទឹមនឹងនេះ លោករដ្ឋមន្ត្រី បានគូសបញ្ជាក់ថា ក្រោមម្លប់សុខសន្តិភាព និងស្ថិរភាពនយោបាយ កម្ពុជាបាននិងកំពុងរក្សាកំណើនសេដ្ឋកិច្ច និងការអភិវឌ្ឍលើគ្រប់វិស័យ ខណៈរាជរដ្ឋាភិបាលបានចាត់ទុកវិស័យទេសចរណ៍ជា «មាសបៃតង» និងជា «ប៉ូលសេដ្ឋកិច្ច» ដ៏សំខាន់ ដែលរួមចំណែកបង្កើតការងារ បង្កើនប្រាក់ចំណូល និងលើកកម្ពស់ជីវភាពប្រជាពលរដ្ឋ សំដៅសម្រេចចក្ខុវិស័យកម្ពុជាជាប្រទេសមានចំណូលខ្ពស់នៅឆ្នាំ២០៥០។

ជាចុងក្រោយ រដ្ឋមន្ត្រី ហួត ហាក់ បានជូនពរឱ្យបេសកកម្មនេះទទួលបានជោគជ័យ និងសុវត្ថិភាព ព្រមទាំងបានបង្ហាញជំនឿថា បេសកកម្មនេះនឹងរួមចំណែកផ្សព្វផ្សាយវប្បធម៌ ទេសចរណ៍ និងឧស្សាហកម្មយានយន្តរបស់កម្ពុជា ទៅកាន់ឆាកអន្តរជាតិ ក៏ដូចជាជំរុញ និងបំផុសគំនិតដល់យុវជនកម្ពុជា ឱ្យបន្តលើកកម្ពស់កិត្តិយសជាតិនៅលើវេទិកាពិភពលោក៕