(ព្រះវិហារ)៖ ក្រុមការងាររបស់អង្គការយូនីសេហ្វ (UNICEF) កាលពីព្រឹកថ្ងៃទី៨ ខែកក្កដា ឆ្នាំ២០២៦ បានបន្តចុះពិនិត្យ និងវាយតម្លៃការផ្តល់សេវាសុខភាពនៅមន្ទីរពេទ្យបង្អែកជាំក្សាន្ត ខេត្តព្រះវិហារ។ ដំណើរទស្សនកិច្ចនេះ មានគោលបំណងស្វែងយល់ពីលទ្ធផលនៃការគាំទ្ររបស់អង្គការយូនីសេហ្វ លើការកសាងសមត្ថភាពបុគ្គលិកសុខាភិបាល និងការប្រើប្រាស់ឧបករណ៍សង្គ្រោះជីវិត ដែលបានរួមចំណែកយ៉ាងសំខាន់ក្នុងការលើកកម្ពស់គុណភាពសេវាថែទាំម្តាយ ទារកទើបនឹងកើត និងកុមារនៅក្នុងខេត្ត។

ការចុះពិនិត្យនេះ ត្រូវបានសម្របសម្រួលដោយលោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ រួមជាមួយថ្នាក់ដឹកនាំ និងមន្ត្រីពាក់ព័ន្ធជាច្រើនរូបទៀត។ ក្រុមការងារបានពិនិត្យដោយផ្ទាល់នូវការផ្តល់សេវាសុខភាព និងការប្រើប្រាស់បរិក្ខារវេជ្ជសាស្ត្រសំខាន់ៗ រួមមាន ម៉ាស៊ីនកំដៅទារក ម៉ាស៊ីនជំនួយដកដង្ហើម C-PAP ម៉ាស៊ីនចិញ្ចឹមទារកមិនគ្រប់ខែ (Neonatal Incubator) ឧបករណ៍សង្គ្រោះទារក និងសម្ភារៈវេជ្ជសាស្ត្រចាំបាច់ជាច្រើនទៀត។ ឧបករណ៍ទាំងនេះ ត្រូវបានផ្តល់ជូនក្រោមជំនួយពីរដ្ឋាភិបាលសាធារណរដ្ឋកូរ៉េ សហរដ្ឋអាមេរិក និងអង្គការ Gavi ដែលអនុវត្តតាមរយៈអង្គការយូនីសេហ្វ ដើម្បីពង្រឹងសមត្ថភាពបុគ្គលិក និងបង្កើនប្រសិទ្ធភាពនៃការថែទាំអ្នកជំងឺ ជាពិសេសម្តាយ និងទារក។

ក្នុងឱកាសនោះ លោកវេជ្ជបណ្ឌិត គួង ឡូ បានថ្លែងអំណរគុណចំពោះការគាំទ្ររបស់អង្គការយូនីសេហ្វ និងបានបញ្ជាក់ថា ការមកទទួលសេវាសុខាភិបាលនៅតាមមូលដ្ឋានសាធារណៈក្នុងខេត្តព្រះវិហារ មានការកើនឡើងជាបន្តបន្ទាប់ ដែលឆ្លុះបញ្ចាំងពីការជឿទុកចិត្តរបស់ប្រជាពលរដ្ឋចំពោះគុណភាពសេវា។

លោកក៏បានណែនាំដល់មន្ត្រីសុខាភិបាលទាំងអស់ ឱ្យយកចិត្តទុកដាក់ខ្ពស់លើការប្រើប្រាស់ ការថែទាំ និងការគ្រប់គ្រងឧបករណ៍វេជ្ជសាស្ត្រឱ្យបានត្រឹមត្រូវ ដើម្បីធានាបាននូវប្រសិទ្ធភាព និងយូរអង្វែង។ ជាមួយគ្នានេះ លោកបានជំរុញឱ្យថ្នាក់ដឹកនាំមន្ទីរពេទ្យ និងមន្ត្រីគ្រប់រូប បន្តរួមគ្នាថែរក្សាបរិស្ថាន អនាម័យ និងសណ្តាប់ធ្នាប់ទាំងក្នុង និងក្រៅបរិវេណមន្ទីរពេទ្យ ព្រមទាំងរៀបចំហេដ្ឋារចនាសម្ព័ន្ធឱ្យមានសោភ័ណភាពកាន់តែល្អប្រសើរ ដើម្បីផ្តល់បរិយាកាសល្អ និងបង្កើនទំនុកចិត្តរបស់ប្រជាពលរដ្ឋចំពោះសេវាសុខាភិបាលសាធារណៈ៕