(តាកែវ)៖ លោក ឌឹម គឹមសាន្ត អភិបាលក្រុងដូនកែវ នៅរសៀលថ្ងៃទី៩ ខែកក្កដា ឆ្នាំ២០២៦នេះ បានដឹកនាំសហការីចុះសាកសួរសុខទុក្ខ និងនាំយកអំណោយមួយចំនួនទៅផ្តល់ជូនវីរកងទ័ព ដែលបានមកលេងស្រុកកំណើតនៅសង្កាត់បារាយណ៍ ក្រុងដូនកែវ ខេត្តតាកែវ។ សកម្មភាពនេះបានបង្ហាញពីការយកចិត្តទុកដាក់ខ្ពស់របស់អាជ្ញាធរមូលដ្ឋានចំពោះកងកម្លាំងប្រដាប់អាវុធ ដែលបានលះបង់ដើម្បីជាតិមាតុភូមិ។

ក្នុងឱកាសនោះ លោក ឌឹម គឹមសាន្ត បានពាំនាំនូវការផ្តាំផ្ញើសួរសុខទុក្ខ និងការលើកទឹកចិត្តពីសំណាក់លោក វ៉ី សំណាង អភិបាលខេត្តតាកែវ ជូនចំពោះវីរកងទ័ព និងក្រុមគ្រួសារទាំងអស់។ លោកបានគូសបញ្ជាក់ថា ថ្នាក់ដឹកនាំខេត្តតាកែវតែងតែណែនាំដល់អាជ្ញាធរក្រុងស្រុក ឲ្យចុះមកសួរសុខទុក្ខ និងផ្តល់កម្លាំងចិត្តដល់បងប្អូនវីរកងទ័ពរាល់ពេលដែលពួកគាត់វិលត្រឡប់មកលេងស្រុកកំណើតម្តងៗ។ នេះជាការទទួលស្គាល់នូវគុណបំណាច់របស់កងទ័ព ដែលកំពុងឈរជើងយ៉ាងអង់អាចនៅសមរភូមិជួរមុខ ដើម្បីការពារបូរណភាពទឹកដី និងត្រៀមខ្លួនទប់ស្កាត់រាល់សកម្មភាពឈ្លានពានពីសំណាក់បរទេស។

លោកអភិបាលក្រុងដូនកែវ ក៏បានថ្លែងអំណរគុណយ៉ាងជ្រាលជ្រៅចំពោះក្រុមគ្រួសារវីរកងទ័ព ដែលបានលះបង់ និងគាំទ្រឲ្យកូនប្រុស ឬស្វាមីរបស់ខ្លួនចូលបម្រើជាកងទ័ព ដើម្បីបុព្វហេតុជាតិ។ លោកបានអះអាងថា រដ្ឋបាលក្រុងដូនកែវនឹងបន្តយកចិត្តទុកដាក់ និងជួយឧបត្ថម្ភតាមលទ្ធភាព ដើម្បីជួយសម្រាលការលំបាកដល់ក្រុមគ្រួសារកងទ័ព ដែលកំពុងរស់នៅសមរភូមិក្រោយ។ ការយកចិត្តទុកដាក់នេះ គឺជាការបង្ហាញពីស្មារតីសាមគ្គីភាព និងការដឹងគុណចំពោះវីរភាពរបស់កងទ័ព និងក្រុមគ្រួសាររបស់ពួកគាត់៕