(បន្ទាយមានជ័យ)៖ លោកកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃទី៩ ខែកក្កដា ឆ្នាំ២០២៦ បានអញ្ជើញចុះសួរសុខទុក្ខ និងត្រួតពិនិត្យស្ថានភាពជីវភាពរស់នៅ បងប្អូនប្រជាពលរដ្ឋភៀសសឹករស់នៅភូមិរង់ចាំ ក្នុងឃុំស្លក្រាម ស្រុកស្វាយចេក ខេត្តបន្ទាយមានជ័យ។

អំឡុងអញ្ជើញចុះសួរសុខទុក្ខ ទេសរដ្ឋមន្រ្តី បានកោតសរសើរដល់ប្រជាពលរដ្ឋភៀសសឹកដែលបានរៀបចំផ្ទះ និងខិតខំដាំដុះដំណាំប្រកបដោយសោភ័ណភាព រួមជាមួយការរៀបចំមុខរបរលក់ដូរតាមខ្នងផ្ទះ។

បន្ទាប់ពីនេះ ទេសរដ្ឋមន្ត្រី បានបន្តអញ្ជើញត្រួតពិនិត្យដំណើរការបន្តសាងសង់ផ្ទះបណ្តោះអាសន្នបន្ថែម សម្រាប់ប្រជាពលរដ្ឋភៀសសឹក នៅភូមិខាងលើផងដែរ។

លោកទេសរដ្ឋមន្ត្រី ថ្លែងថា ចំពោះការសាងសង់ផ្ទះបណ្តោះអាសន្ននេះ ធ្វើឡើងនៅបរិវេណជិតនឹងផ្ទះបណ្តោះអាសន្នចំនួន ប្រមាណ៣ពាន់ខ្នង ដែលមានពលរដ្ឋភៀសសឹកកំពុងស្នាក់នៅ ព្រមទាំងមានហេដ្ឋារចនាសម្ព័ន្ធ ដែលរាជរដ្ឋាភិបាល បានស្ថាបនា និងរៀបចំរួចរាល់ ដូចជា ផ្លូវ ការតភ្ជាប់ប្រព័ន្ធបណ្តាញទឹកស្អាត ការតភ្ជាប់ប្រព័ន្ធបណ្តាញអគ្គិសនី មណ្ឌលសុខភាព ស្នាក់ការភូមិ ស្នាក់ការក្រុមការងារខេត្ត សាលារៀនបណ្តោះអាសន្ន និងផ្សារបណ្តោះអាសន្ន។

ទន្ទឹមនឹងការយកចិត្តទុកដាក់ពីរាជរដ្ឋាភិបាល ទៅលើហេដ្ឋារចនាសម្ព័ន្ធជាច្រើន ដែលបានស្ថាបនារួចរាល់ជាច្រើន ជូនប្រជាពលរដ្ឋភៀសសឹក បានក្លាយជាភូមិដ្ឋានមួយ ដែលប្រសិទ្ធនាម ជាភូមិរង់ចាំ ដែលមានការអភិវឌ្ឍន៍ជាបន្តបន្ទាប់។

ក្រៅពីនេះ ទេសរដ្ឋមន្រ្តី សង្កេតឃើញ មានមហាជន និង សប្បុរសជនគ្រប់ទិសទី បានបន្តរួមចំណែកចូលរួមជួយជាអំណោយផ្តល់ជូនប្រជាពលរដ្ឋភៀសសឹក ក្នុងនាមជាមហាគ្រួសារខ្មែរតែមួយ និងក្រោមស្មារតីផ្សារភ្ជាប់រវាងសមរភូមិមុខ និង សមរភូមិក្រោយ។

ឆ្លៀតក្នុងឱកាសនោះ ទេសរដ្ឋមន្ត្រី បានសំណូមពរដល់ប្រជាពលរដ្ឋភៀសសឹក បន្តជឿទុកចិត្តលើការដឹកនាំរបស់រាជរដ្ឋាភិបាល ក្នុងការបន្តដោះស្រាយការលំបាកទាំងឡាយ ជូនប្រជាពលរដ្ឋ និងបន្តទាមទារការបាត់បង់ និងការខូចខាតទាំងអស់ ក្នុងជម្លោះព្រំដែន។

សូមជម្រាបថា ខេត្តបន្ទាយមានជ័យមានប្រជាពលរដ្ឋសរុបដែលត្រូវស្នាក់នៅផ្ទះបណ្តោះអាសន្នចំនួន ៣,៣១៨គ្រួសារ ក្នុងនោះប្រជាពលរដ្ឋភៀសសឹក កំពុងស្នាក់នៅផ្ទះបណ្តោះអាសន្នមានចំនួន ២,៨០៥គ្រួសារ ខណៈផ្ទះបណ្តោះអាសន្នរាប់រយខ្នងទៀតបានសាងសង់ជិតរួចរាល់ និងកំពុងបន្តដំណើរការសាងសង់៕