(ភ្នំពេញ)៖ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានគណៈកម្មការសម្របសម្រួលក្រុមការងារផ្នែកឯកជន សម្រាប់យន្តការវេទិការាជរដ្ឋាភិបាល-ផ្នែកឯកជន (គ.ស.ឯ.រ.ជ) នៅរសៀលថ្ងៃព្រហស្បតិ៍ ទី០៩ ខែកក្កដា ឆ្នាំ២០២៦ បានដឹកនាំសមាជិកជាន់ខ្ពស់សភាពាណិជ្ជកម្មកម្ពុជា និងសមាជិកនៃក្រុមការងារទាំង១៦ ផ្នែកឯកជន នៃយន្តការរវេទិការរាជរដ្ឋាភិបាល-ផ្នែកឯកជន អញ្ជើញចូលរួមក្នុងសិក្ខាសាលាផ្សព្វផ្សាយរបាយការណ៍វឌ្ឍនភាព នៃការអនុវត្តវិធានការកែទម្រង់មុតស្រួចជាកញ្ចប់ ដែលបានដាក់ចេញ ក្នុងយន្តការវេទិការាជរដ្ឋាភិបាល-ផ្នែកឯកជនលើកទី១៩ ប្រចាំឆមាសទី២ ឆ្នាំ២០២៥។

សិក្ខាសាលានេះ រៀបចំធ្វើឡើង ក្រោមអធិបតីភាពលោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាប្រធានគណៈកម្មាធិការ សម្របសម្រួល ការងារសម្រាប់យន្តការវេទិការាជរដ្ឋាភិបាល-ផ្នែកឯកជន (គ.ស.រ.ជ) និងមានការចូលរួមផងដែរ សំណាក់តំណាងក្រសួង ស្ថាប័នដែលជាដៃគូ និងផ្នែក​ឯកជន តំណាងអង្គទូតបរទេស ប្រចាំនៅកម្ពុជា ដៃគូអភិវឌ្ឍន៍ តំណាងគ្រឹះស្ថានសមាគមធុរកិច្ចជាតិ និងអន្តរជាតិ ក្រុមហ៊ុនឯកជន និងអ្នកពាក់ព័ន្ធជាច្រើន នៅសណ្ឋាគាររ៉ាហ្វល ឡឺរ៉ូយ៉ាល់​ ភ្នំពេញ។

សិក្ខាសាលាផ្សព្វផ្សាយ ដ៏មានសារៈសំខាន់នេះ មានគោលបំណងគឺដើម្បីបង្ហាញពីលទ្ធផលជាក់ស្តែងជាបន្តបន្ទាប់ និងកិច្ចសហការស្ថាប័នរវាងរាជរដ្ឋាភិបាល និងផ្នែកឯកជន ស្ថិតក្រោមយន្តការវេទិការាជរដ្ឋាភិបាល-ផ្នែកឯកជន (វ.រ.ឯ/ G-PSF) ដែលឆ្លុះបញ្ចាំងពីភាពជោគជ័យយ៉ាងត្រចះត្រចង់នៃភាពជាដៃគូរវាងរដ្ឋ និងឯកជន។
ព្រឹត្តិការណ៍នេះ ក៏បានសង្កត់ធ្ងន់ផងដែរអំពីតួនាទីដ៏សំខាន់របស់សភាពាណិជ្ជកម្មកម្ពុជា ក្នុងនាមជាអ្នកសម្របសម្រួលចម្បង ក្នុងការដឹកនាំជំរុញក្រុមការងារ ផ្នែកឯកជនទាំង ១៦ ដើម្បីសម្រេចបាននូវលទ្ធផលប្រកបដោយភាពស៊ីសង្វាក់គ្នានៃកិច្ចសន្ទនា និងតម្រង់ទិសទៅរកដំណោះស្រាយ។

យន្តកាវេទិការាជរដ្ឋាភិបាល-ផ្នែកឯកជន (វ.រ.ឯ) ត្រូវបានបង្កើតឡើងក្នុងឆ្នាំ១៩៩៩ ក្រោមគំនិតផ្តួចផ្តើមប្រកបដោយគតិបណ្ឌិតដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនាពលនោះ និងជាប្រធានព្រឹទ្ធសភាកម្ពុជានាពេលបច្ចុប្បន្ន និងបន្តទទួលបានការគាំទ្រ និងការដឹកនាំយ៉ាងម៉ឺងម៉ាត់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា។

តាមរយៈវេទិការាជរដ្ឋាភិបាល-ផ្នែកឯកជន លើកទី១៩ កាលពីថ្ងៃទី១៣ ខែវិច្ឆិកា ឆ្នាំ២០២៣ កន្លងទៅ បានដាក់ចេញនូវវិធានការកែទម្រង់មុតស្រួចជាកញ្ចប់ចម្បងៗចំនួន ១១ចំណុច ក្នុងន័យដើម្បីដោះស្រាយបញ្ហាប្រឈម សំណួមពរ និងក្តីកង្វល់របស់អ្នកធុរកិច្ច និងផ្នែកឯកជននៅកម្ពុជា រួមមាន៖
១៖ ការកែសម្រួលបរិយាកាសធុរិកិច្ច និងការវិនិយោគ,
២៖ ការសម្រាលបន្ទុកលើអនុលោមភាព,
៣៖ ការសម្រួលដល់ធុរកិច្ចក្រោមដែនសមត្ថកិច្ចពន្ធដារ,
៤៖ ការសម្រួលដល់ធុរកិច្ចក្រោមដែនសមត្ថកិច្ចគយ,
៥៖ ការលើកកម្ពស់ការដឹកជញ្ជូន និងហេដ្ឋារចនាសម្ព័ន្ធ,
៦៖ ការស្តារ និងការលើកស្ទួយការអភិវឌ្ឍនវិស័យទេសចរណ៍,
៧៖ ការអភិវឌ្ឍនវិស័យកសិកម្ម និងកសិឧស្សាហកម្ម,
៨៖ វិស័យធនាគារ និងហិរញ្ញវត្ថុ,
៩៖​ វិស័យរ៉ែ និងថាមពល,
១០៖ វិស័យសំណង់ និងអចលនទ្រព្យ
និង១១៖ បញ្ហាផ្សេងៗ។

សូមជម្រាបជូនថា គិតត្រឹមឆមាសទី២ ឆ្នាំ២០២៥ ក្នុងចំណោមវិធានការសរុប១៧៩ ដែលបានដាក់ចេញក្នុងវេទិការាជរដ្ឋាភិបាល-ផ្នែកឯកជនលើកទី១៩ មានវិធានការចំនួន១៦៩ ស្មើនឹង ៩៤.៤% ត្រូវបានដោះស្រាយសម្រេចជាស្ថាពរ និង១០វិធានការទៀត ស្មើនឹង៥.៦% កំពុងមានវឌ្ឍនភាពគួរឱ្យកត់សម្គាល់នៅក្នុងដំណាក់កាលគន្លឹះទី២ (Milestone 2) ដែលទាមទារឱ្យមានការសម្របសម្រួលកម្រិតខ្ពស់អន្តរក្រសួង និងការធ្វើវិសោធនកម្មច្បាប់។ តាមរយៈសិក្ខាសាលាផ្សព្វផ្សាយនេះ ក៏មានការធ្វើកិច្ចពិភាក្សា និងវេទិការសំណួរចម្លើយទាក់ទងនឹងរបាយការណ៍វឌ្ឍនភាពនេះផងដែរ។

សូមបញ្ជាក់ជូនថា សិក្ខាសាលាផ្សព្វផ្សាយនេះ ​ជាការសហការរៀបចំដោយ សភាពាណិជ្ជកម្មកម្ពុជា និងក្រុមប្រឹក្សាអភិវឌ្ឍន៍កម្ពុជា ក្រោមការគាំទ្រដោយរដ្ឋាភិបាលអូស្រ្តាលី​តាមរយៈកម្មវិធីភាពជាដៃគូកម្ពុជា-អូស្ត្រាលី សម្រាប់ការអភិវឌ្ឍន៍សេដ្ឋកិច្ចប្រកបដោយភាពធន់ (CAPRED)៕