(ភ្នំពេញ)៖ បន្ទាប់ទទួលបាននូវការសាទរយ៉ាងខ្លាំង តាមរយៈការប្តេជ្ញាចិត្តធ្វើឱ្យបាន លើការលុបបំបាត់អំពើពុករលួយ បម្រើសេវាជូនប្រជាពលរដ្ឋប្រកបដោយយុត្តិធម៌ និងនីតិវិធីជាធរមាននោះ នៅពេលនេះលោក សារិន វណ្ណា ប្រធានមន្ទីររៀបចំដែនដី នគរូបនីយកម្ម និងសំណង់រាជធានីភ្នំពេញ បានចេញមកបង្ហាញឯកសារមួយចំនួន ដើម្បីបញ្ជាក់បន្ថែមអំពីការធ្វើកំណែទម្រង់ថ្មីលើបរិបថការងារស្នើសុំសេវាសាធារណៈវិស័យដីធ្លី និងការកាត់បន្ថយរយៈពេលបង់ពន្ធប្រថាប់ត្រាផងដែរ។

ឯកសារចំនួនពីរដែលលោក សារិន វណ្ណា បង្ហាញចេញ រួមមាន លិខិតរបស់ឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ផ្ញើជូនលោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ អំពីយន្តការនានាក្នុងការពន្លឿនការចេញបណ្ណកម្មសិទ្ធិសម្គាល់អចលនវត្ថុ ក្នុងនោះមានការកាត់បន្ថយរយៈពេលបង់ពន្ធប្រថាប់ត្រាមកនៅត្រឹម ១-៤ថ្ងៃធ្វើការផងដែរ។

ចំពោះឯកសារមួយទៀត គឺការងារផ្តល់សេវារបស់មន្ទីររៀបចំដែនដីរាជធានីភ្នំពេញ ដែលមានប្រភេទសេវា និងពេលវេលាផ្តល់សេវា (ដូចមានភ្ជាប់) ។

ការបង្ហាញនូវឯកសារទាំងនេះ លើបណ្តាញទំនាក់ទំនងសង្គមហ្វេសបុករបស់លោក ទទួលបានការចាប់អារម្មណ៍យ៉ាងខ្លាំង ពីប្រជាពលរដ្ឋ ដោយបានស៊ែរបន្ត និង Comments យ៉ាងច្រើន ដោយប្រជាពលរដ្ឋខ្លះស្នើឱ្យមានការបម្រើសេវាបែបនេះតាមបណ្តាខេត្តផងដែរ៕