(ភ្នំពេញ)៖ ប្រជាពលរដ្ឋកម្ពុជា រួមជាមួយរាជរដ្ឋាភិបាល បាននិងកំពុងបន្តបង្ហាញជំហរយ៉ាងម៉ឺងម៉ាត់ ទាមទារឱ្យកងកម្លាំងយោធាថៃ ដកចេញពីទឹកដីកម្ពុជា ដែលបានរំលោភបំពានលើអធិបតេយ្យ និងបូរណភាពទឹកដីកន្លងមក។ ការទាមទារនេះ កើតឡើងបន្ទាប់ពីមានសកម្មភាពឈ្លានពានជាបន្តបន្ទាប់ពីសំណាក់យោធាថៃ ដែលបង្កឱ្យមានការព្រួយបារម្ភយ៉ាងខ្លាំងពីសំណាក់ប្រជាជន និងរាជរដ្ឋាភិបាល។

លោកស្រី ព្រឹល សុភួង ពលរដ្ឋឃុំថ្មដា ស្រុកវាលវែង តាមរយៈបទសម្ភាសដល់ក្រុមអ្នកសារព័ត៌មាន នៅទីតាំងដែលយោធាថៃ ដាក់ទូកុងតឺន័រ ដោយទាមទារឱ្យភាគីថៃ ដកកងកម្លាំងចេញពីទឹកកម្ពុជា ទៅទឹកដីថៃវិញ និងបញ្ឈប់ទង្វើឈ្លានពានទឹកដីកម្ពុជាបន្តទៀត។

បើតាមលោកស្រីដែលជាជនរងគ្រោះនៃទង្វើឈ្លានពានរបស់យោធាថៃ បានបញ្ជាក់ថា៖ «ខ្មែរអត់បានឈ្លានពានទឹកដីថៃទេ ខ្មែរសុំតែសុខទេ សុំចេញពីទឹកដីខ្មែរវិញទៅ»។

កាលពីចុងឆ្នាំ២០២៥ ប្រជាពលរដ្ឋកម្ពុជាទាំងក្នុង និងក្រៅប្រទេស ជាពិសេសនៅតាមបណ្ដាខេត្តជាប់ព្រំដែន បានចេញញត្តិថ្កោលទោសយ៉ាងដាច់អហង្ការចំពោះទង្វើអមនុស្សធម៌របស់យោធាថៃ ដែលបានឈ្លានពាន និងបាញ់ប្រហារមកលើប្រជាជនស៊ីវិលស្លូតត្រង់។ ជាក់ស្ដែង កាលពីថ្ងៃទី៧ ខែធ្នូ ឆ្នាំ២០២៥ ប្រជាពលរដ្ឋខ្មែរនៅតំបន់ហ្វាសង់ ប្រទេសកូរ៉េខាងត្បូង ក៏បានជួបជុំគ្នាថ្កោលទោសចំពោះការឈ្លានពានសារជាថ្មីរបស់យោធាថៃ ដោយប្រើប្រាស់អាវុធធុនតូច និងធុនធំយ៉ាងព្រៃផ្សៃ។

ជាការឆ្លើយតប រាជរដ្ឋាភិបាលកម្ពុជា តាមរយៈក្រសួងការបរទេស និងសហប្រតិបត្តិការអន្តរជាតិ បានចេញសេចក្ដីប្រកាសព័ត៌មានជាបន្តបន្ទាប់ ដើម្បីតវ៉ាជំទាស់ជាផ្លូវការចំពោះសកម្មភាពរបស់យោធាថៃ។ នៅថ្ងៃទី២០ ខែមិថុនា ឆ្នាំ២០២៦ ក្រសួងបានចេញសេចក្ដីប្រកាសព័ត៌មានស្ដីពីការតវ៉ាជំទាស់ចំពោះសកម្មភាពរំលោភបំពានលើអធិបតេយ្យ និងបូរណភាពទឹកដីរបស់កម្ពុជា។

លើសពីនេះ កាលពីថ្ងៃទី៣១ ខែមករា ឆ្នាំ២០២៦ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា ក៏បានបញ្ជាក់យ៉ាងច្បាស់ថា រាជរដ្ឋាភិបាលកម្ពុជានៅតែប្រកាន់ជំហរយ៉ាងរឹងមាំបំផុត ដើម្បីទាមទារមកវិញនូវបូរណភាពទឹកដីស្របតាមច្បាប់ ដោយមិនបោះបង់ចោលតំបន់ណាមួយឡើយ។ រាល់ការដោះស្រាយបញ្ហាព្រំដែន ត្រូវតែផ្អែកលើមូលដ្ឋានច្បាប់អន្តរជាតិយ៉ាងម៉ឺងម៉ាត់។

ការបន្តរំលោភបំពានរបស់ភាគីថៃ រួមទាំងការសាងសង់ព្រះពុទ្ធបដិមា និងការដំឡើងបង្គោលទង់ជាតិនៅក្នុងតំបន់ដែលកងទ័ពថៃបានកាន់កាប់ដោយខុសច្បាប់ ក៏ត្រូវបានរាជរដ្ឋាភិបាលកម្ពុជាធ្វើការតវ៉ាជាផ្លូវការផងដែរ។ ទាំងប្រជាពលរដ្ឋ និងរាជរដ្ឋាភិបាលកម្ពុជា សុទ្ធតែមានបំណងចង់ឃើញកងកម្លាំងយោធាថៃដកចេញពីទឹកដីកម្ពុជា ដើម្បីធានាបាននូវសន្តិភាព ស្ថិរភាព និងការគោរពអធិបតេយ្យភាពរវាងប្រទេសទាំងពីរ៕