(បរទេស)៖ គោជល់អេស្ប៉ាញ ធ្លាប់រងបរាជ័យតែ ៥លើកប៉ុណ្ណោះ ពីប្រវត្តិធ្លាប់ជួបគ្នាសរុប ២២ដងគ្រប់កម្មវិធីទាំងអស់ មុនពេលត្រូវប្រឈមមុខដាក់គ្នាជាថ្មីនៃវគ្គ ៨ក្រុមចុងក្រោយក្នុងព្រឹត្តិការណ៍បាល់ទាត់ជើងឯកពិភពលោក FIFA World Cup 2026 ចាបផ្តើមនាម៉ោង ២រំលងអាធ្រាត្រនេះឈានចូលព្រឹកថ្ងៃសៅរ៍ ទី១១ ខែកក្កដា (ម៉ោងនៅកម្ពុជា)។

ទោះជាយ៉ាងណា បើចាប់អារម្មណ៍ត្រឹមតែកម្មវិធី World Cup ចំពោះក្រុមនៅទ្វីបអឺរ៉ុបទាំងពីរជួបគ្នាវិញឃើញថា មានចំនួន ៨ដង ដោយអេស្ប៉ាញលេងឈ្នះ ៤លើក ស្មើ ២លើក និងចាញ់ ២លើកដូចគ្នា។

ក្នុងចំណោម ៨ក្រុមដែលឈានមកដល់វគ្គចាញ់-ធ្លាក់ ១/៤ នេះដែរ ក្រុមគោជល់អតីតជើងឯក World Cup 2010 ធ្វើបានល្អជាងគេ តាមរយៈលេង ៥ប្រកួតកន្លងមកមិនរបូតសូម្បី ១គ្រាប់ឡើយ (clean sheet) និងជាពិសេសទម្លាក់សុទ្ធតែក្រុមខ្លាំងនៅអឺរ៉ុបថែមទៀតមានដូចជា បំបាក់អូទ្រីស ៣-០ ពីក្នុងវគ្គ ៣២ក្រុម និងបច្ចខែលព័រទុយហ្គាល់ ១-០ នៃវគ្គ ១៦ក្រុម។

បច្ចុប្បន្ន អេស្ប៉ាញស្ថិតនៅលេខរៀងទី៣ ក្នុងតារាងចំណាត់ថ្នាក់ពិភពលោក FIFA World Ranking នៅពេលប៊ែលហ្ស៊ិកដែលធ្លាប់ឈរទីកំពូលបានធ្លាក់មកលេខ៨ វិញ ក្នុងនាមក្រុមមិនទាន់ស្គាល់រសជាតិពាន World Cup ដូចព័រទុយហ្គាល់ដែរ។

ប៊ែលហ្ស៊ិក ដែលសំបូរកីឡាករលំដាប់ world class និងលេងក្នុងលីគ Serie A និង Premier League មានស្ថិតិមិនសូវល្អឡើយ ក៏ប៉ុន្តែបិសាចក្រហមអឺរ៉ុបមួយនេះ ហាក់មានប្រៀប និងមានទម្រង់លេងល្អឡើងវិញ ពេលទម្លាក់សហម្ចាស់ផ្ទះអាមេរិក ៤-១ ពីក្នុងវគ្គ ១៦ក្រុម។

ខ្សែប្រយុទ្ធ Romelu Lukaku មកពី Napoli និង Leandro Trossard មកពីកាំភ្លើងធំ Arsenal ជាកីឡាករស្នូលរបស់ ពួកគេ ដើម្បីចរចាកៅអីវគ្គពាក់កណ្តាលផ្តាច់ព្រ័ត្រ World Cup លើកទី២៣ ក្នុងការឡើងទៅជួបបារាំង ដែលបានទម្លាក់ម៉ារ៉ុក ២-០ យប់មិញ៕