(ភ្នំពេញ)៖ នារសៀលថ្ងៃទី៩ ខែកក្កដា ឆ្នាំ២០២៦នេះនៅមជ្ឈមណ្ឌលធនធាន អ.វ.ត.ក. អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក.) និងសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) បានចុះអនុស្សរណៈយោគយល់ (MoU) ក្នុងគោលបំណងពង្រឹងកិច្ចសហប្រតិបត្តិការលើការអប់រំផ្នែកច្បាប់ ការសិក្សាស្រាវជ្រាវ និងការអភិវឌ្ឍធនធានមនុស្ស ស្របតាមបេសកកម្មរួមក្នុងការលើកកម្ពស់យុត្តិធម៌ នីតិរដ្ឋ និងការអភិវឌ្ឍវិស័យច្បាប់នៅកម្ពុជា។

ថ្លែងនៅក្នុងពិធីនេះ លោក ក្រាញ់ តូនី រដ្ឋលេខាធិការទីស្ដីការគណៈរដ្ឋមន្ដ្រី និងជាប្រធានរដ្ឋបាលស្ដីទី នៃ អ.វ.ត.ក. បានមានប្រសាសន៍ថា ការចុះអនុស្សរណៈយោគយល់ជាមួយសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នាពេលនេះ គឺជាការបន្តពង្រឹងកិច្ចសហប្រតិបត្តិការរវាងស្ថាប័នយុត្តិធម៌ និងគ្រឹះស្ថានឧត្តមសិក្សា ដើម្បីផ្ទេរចំណេះដឹង បទពិសោធ និងមរតកផ្នែកច្បាប់ដែល អ.វ.ត.ក. បានកសាងក្នុងរយៈពេលជាច្រើនឆ្នាំកន្លងមកទៅកាន់យុវជនជំនាន់ក្រោយ។

ក្នុងនាម អ.វ.ត.ក. លោក ជឿជាក់ថា ការប្រើប្រាស់ធនធានឯកសារ និងបទពិសោធរបស់ អ.វ.ត.ក. នឹងជួយពង្រឹងសមត្ថភាពសិស្សនិស្សិតក្នុងការសិក្សា ការស្រាវជ្រាវ និងការអនុវត្តវិជ្ជាជីវៈ ព្រមទាំងរួមចំណែកលើកកម្ពស់នីតិរដ្ឋ ការទទួលខុសត្រូវ និងការលុបបំបាត់វប្បធម៌និទ្ទភាពនៅកម្ពុជា។

ជាមួយគ្នានេះ​ លោកសាស្ត្រាចារ្យបណ្ឌិត លុយ ចណ្ណា សាកលវិទ្យាធិការនៃសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ចបានបញ្ជាក់ថា សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច មានកិត្តិយសដែលបានសហការជាមួយ អ.វ.ត.ក. ក្នុងការលើកកម្ពស់គុណភាពអប់រំផ្នែកច្បាប់ ការចែករំលែកបទពិសោធ និងការស្រាវជ្រាវ។ អនុស្សរណៈយោគយល់នេះនឹងបង្កើតឱកាសឱ្យនិស្សិត បានសិក្សាពីបទពិសោធជាក់ស្តែងនៃយុត្តិធម៌អន្តរកាល និងច្បាប់ព្រហ្មទណ្ឌអន្តរជាតិ ព្រមទាំងចូលប្រើប្រាស់ធនធានដ៏មានតម្លៃរបស់ អ.វ.ត.ក.។ កិច្ចសហការនេះនឹងរួមចំណែកបណ្តុះបណ្តាលអ្នកច្បាប់ជំនាន់ថ្មីដែលមានសមត្ថភាព វិជ្ជាជីវៈ និងស្មារតីទទួលខុសត្រូវខ្ពស់ចំពោះសង្គម។

តាមរយៈអនុស្សរណៈយោគយល់នេះ ភាគីទាំងពីរនឹងសហការលើវិស័យសំខាន់ៗជាច្រើន រួមមាន៖ ការចែករំលែកចំណេះដឹង និងបទពិសោធន៍របស់ អ.វ.ត.ក. ដល់សិស្សនិស្សិត ដើម្បីពង្រឹងសមត្ថភាពផ្នែកច្បាប់ និងការអនុវត្តជាក់ស្តែង។ ព្រមទាំងការជំរុញការសិក្សាស្រាវជ្រាវដោយប្រើប្រាស់ឯកសារនៅបណ្ណសារ និងមជ្ឈមណ្ឌលធនធានរបស់ អ.វ.ត.ក. ដែលជាធនធានដ៏មានតម្លៃសម្រាប់ការអប់រំផ្នែកច្បាប់ ការអនុវត្តវិជ្ជាជីវៈ និងការសិក្សាប្រវត្តិសាស្ត្រ។

សូមបញ្ជាក់ថា អង្គជំនុំជម្រះវិសាមញ្ញក្នុងតុលាការកម្ពុជានៅក្នុងបេសកកម្មបន្តអនុវត្តមុខងារសេសសល់របស់ខ្លួនបានផ្តោតទៅលើការថែរក្សាទុកនូវសមិទ្ធផល កេរដំណែលនិងការចងចាំ ដោយមានគោលដៅចម្បងទៅលើការអប់រំផ្សព្វផ្សាយ បញ្រ្ជៀបការយល់ដឹងដល់យុវជន យុវនារីជំនាន់ក្រោយ ជំរុញការចងចាំដើម្បីធានាថារបបដ៏សាហាវយង់ឃ្នងនេះមិនវិលត្រឡប់មកជាថ្មីម្តងទៀត។ ឈរលើស្មារតីនេះ អ.វ.ត.ក. បាននិងកំពុងពង្រីកបណ្តាញភាពជាដៃគូជាមួយគ្រឹះស្ថានឧត្តមសិក្សា អង្គការ និងស្ថាប័នដៃគូទាំងក្នុង និងក្រៅប្រទេស ដើម្បីលើកកម្ពស់ការអប់រំ ការសិក្សាស្រាវជ្រាវ ការអភិវឌ្ឍវិជ្ជាជីវៈ និងការបន្តផ្សព្វផ្សាយមរតកផ្នែកច្បាប់ និងយុត្តិធម៌។ រហូតមកដល់បច្ចុប្បន្ន អ.វ.ត.ក. បានចុះអនុស្សរណៈយោគយល់ជាមួយគ្រឹះស្ថានឧត្តមសិក្សា អង្គការ និងស្ថាប័នដៃគូសរុបចំនួន ១៨ ស្ថាប័នរួចហើយ៕