(ភ្នំពេញ)៖ សម្ដេច ឥស្សរវិទេសបញ្ញា ហោ ណាំហុង បានជូនដំណឹងថា កាលពីព្រឹកថ្ងៃសៅរ៍ ទី០៤ ខែកក្កដា ឆ្នាំ២០២៦ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានដឹកនាំថ្នាក់ដឹកនាំនារី អញ្ជើញមកសួរសុខទុក្ខ សម្ដេច ឥស្សរវិទេសបញ្ញា ហោ ណាំហុង និងលោកជំទាវ ដល់គេហដ្ឋានយ៉ាងយូរ ព្រមទាំងមានកន្រ្តកផ្លែឈើយ៉ាងច្រើនសម្បូរបែប ប្រកបដោយភាពស្និតស្នាល និងកក់ក្ដៅបំផុតដូចជាគ្រួសារ។

នៅព្រឹកអាទិត្យ ទី០៥ ខែកក្កដា ឆ្នាំ២០២៦ សម្តេចមហាបវរធិបតី នាយករដ្ឋមន្ត្រី និង លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បានមកសួរសុខទុក្ខ សម្ដេច ឥស្សរវិទេសបញ្ញា ហោ ណាំហុង និងលោកជំទាវ ដល់គេហដ្ឋានយ៉ាងយូរដូចគ្នា ព្រមទាំងមានកន្រ្តកផ្លែឈើយ៉ាងច្រើនសម្បូរបែប ប្រកបដោយភាពស្និតស្នាល និងកក់ក្ដៅបំផុតដូចជាគ្រួសារ។

សម្ដេច ឥស្សរវិទេសបញ្ញា ហោ ណាំហុង សូមគោរពថ្លែងនូវអំណរទិគុណដ៏ជ្រាលជ្រៅបំផុតជូនចំពោះសម្ដេចកិត្តិព្រឹទ្ធបណ្ឌិត និង សម្ដេចមហាបវរធិបតី នាយករដ្ឋមន្រ្តី និងលោកជំទាវបណ្ឌិត ព្រមទាំងថ្នាក់ដឹកនាំស្រ្តីដែលចំណាយពេលវេលាដ៏មានតម្លៃ និងមមាញឹកបំផុតមកសួរសុខទុក្ខ សម្ដេច ឥស្សរវិទេសបញ្ញា និងលោកជំទាវ ដោយផ្ទាល់ដល់គេហដ្ឋាន។ ចំពោះសម្ដេច ឥស្សរវិទេសបញ្ញា ហោ ណាំហុង តែងតែទុកក្រុមគ្រួសារសម្ដេចតេជោ ដូចជាគ្រួសារតាំងពីដើមមករហូតតទៅប្រកបដោយកតញូតាធម៌ និងការដឹងគុណបំផុតចំពោះក្រុមគ្រួសារសម្ដេចតេជោ ដែលតែងតែនឹករលឹក និងសណ្ដោះប្រណីចំពោះសម្ដេច ឥស្សរវិទេសបញ្ញា និងក្រុមគ្រួសាររហូតមក។

សម្ដេច ឥស្សរវិទេសបញ្ញា ហោ ណាំហុង និងលោកជំទាវ សូមគោរពជូនពរ សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន និងសម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី នាយករដ្ឋមន្រ្តីនិង លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត និងថ្នាក់ដឹកនាំស្រ្តីទាំងអស់ ព្រមទាំងបុត្រាបុត្រី ចៅប្រុសចៅស្រី ជាទីស្រឡាញ់ សូមមានសុខភាពល្អបរិបូរណ៍ កម្លាំងមាំមួនក្លៀវក្លា ប្រាជ្ញាភ្លឺថ្លាជាដរាប ជន្មាយុយឺនយូរ សូមប្រកបទៅដោយពុទ្ឋពរទាំងប្រាំប្រការគឺ អាយុ វណ្ណៈ សុខៈ ពលៈ និងបដិភាណ កុំបីឃ្លៀងឃ្លាតឡើយ៕