ក្រសួងរ៉ែ បង្ហាញទំហំទឹកប្រាក់ ក្នុងការអនុវត្តគម្រោងមូលនិធិរ៉ែទ្រទ្រង់កិច្ចអភិវឌ្ឍន៍សហគមន៍មូលដ្ឋាន ឆ្នាំ២០២៦ ជាង៥លានដុល្លារ, គិតពីឆ្នាំ២០១៥ ដល់២០២៥ ជាង៩លានដុល្លារ (Video inside)
10-07-2026 12:25
(ភ្នំពេញ)៖ ក្រសួងរ៉ែ និងថាមពល នៅថ្ងៃទី១០ ខែកក្កដា ឆ្នាំ២០២៦នេះ បានបង្ហាញទំហំទឹកប្រាក់ នៃការអនុវត្តគម្រោងមូលនិធិរ៉ែទ្រទ្រង់កិច្ចអភិវឌ្ឍន៍សហគមន៍មូលដ្ឋាន ឆ្នាំ២០២៦ ដែលទទួលបានពីការអាជីវកម្មរបស់ក្រុមហ៊ុន អាជីវករទាំងអស់ក្នុងការអនុវត្តកាតព្វកិច្ច។
ក្នុងសេចក្ដីប្រកាសព័ត៌មាន ដែលបណ្ដាញព័ត៌មាន Fresh News ទទួលបានក្រសួងរ៉ែ និងថាមពល បានបញ្ជាក់ថា មូលនិធិរ៉ែទ្រទ្រង់កិច្ចអភិវឌ្ឍន៍សហគមន៍មូលដ្ឋាន និងការប្រើប្រាស់មូលនិធិរ៉ែ ក្នុងការរួមចំណែកអភិវឌ្ឍន៍សហគមន៍មូលដ្ឋាន តាមរយៈការស្នើសុំគម្រោងអភិវឌ្ឍពីរដ្ឋបាលឃុំ សង្កាត់ដូចខាងក្រោម៖
១៖ ក្នុងការធ្វើអាជីវកម្មរ៉ែ ក្រុមហ៊ុន អាជីវករ ទាំងអស់ត្រូវមានកាតព្វកិច្ចបង់ជូនរដ្ឋនូវសួយសាររ៉ និងកាតព្វកិច្ចហិរញ្ញវត្ថុផ្សេងទៀត តាមការកំណត់ក្នុងច្បាប់ និងលិខិតបទដ្ឋានគតិយុត្តដែលមានជាធរមាន។ បន្ថែមលើកាតព្វកិច្ចនេះ ក្រុមហ៊ុន អាជីវករត្រូវបង់នូវមូលនិធិរ៉ែទ្រទ្រង់កិច្ចអភិវឌ្ឍន៍សហគមន៍មូលដ្ឋាន ដែលក្រសួងរ៉ែ និងថាមពលបានបង្កើតឡើងពីឆ្នាំ២០១៥ ក្នុងគោលបំណងរួមចំណែក ជួយដល់មូលដ្ឋាន ឃុំ សង្កាត់ក្នុងការអភិវឌ្ឍឃុំ សង្កាត់ ដែលមានការដ្ឋានរ៉ែស្ថិតនៅ។ ថវិកាដែលបង់ចូលមូលនិធិនេះ សមាមាត្រទៅនឹងទំហំផលិតកម្មរ៉ែដែលក្រុមហ៊ុន អាជីវករបានធ្វើអាជីវកម្មរ៉ែ។
២៖ មូលនិធិរ៉ែ ត្រូវបានអនុញ្ញាតឱ្យប្រើប្រាស់ក្នុងតំបន់សហគមន៍មូលដ្ឋានដែលមានការដ្ឋានរ៉ែស្ថិតនៅ និងអាចប្រើប្រាស់បានក្នុងតំបន់ជិតខាងនៃការដ្ឋានរ៉ែនោះ តាមរយៈការស្នើសុំដោយផ្ទាល់ពីរដ្ឋបាលឃុំ សង្កាត់ ដែលមានការដ្ឋានរ៉ែស្ថិតនៅ។
៣៖ ចាប់ពីឆ្នាំ២០១៥ មកដល់ឆ្នាំ២០២៥ ក្រសួងរ៉ែ និងថាមពលបានអនុម័តឱ្យប្រើប្រាស់មូលនិធិ លើគម្រោងចំនួន១៤៤ មានថវិកាសរុប ៩ ៧១២ ៨៨០,៤៤ (ប្រាំបួនលាន ប្រាំពីររយដប់ពីរពាន់ ប្រាំបីរយប៉ែតសិប ក្បៀសសសិបបួន) ដុល្លារអាម៉េរិក។
ក្រសួងរ៉ែ និងថាមពល ក៏សូមជម្រាបជូនសាធារណជន និងប្រជាពលរដ្ឋទាំងអស់ឱ្យបានជ្រាបថា សម្រាប់ឆ្នាំ២០២៦ ក្រសួងអនុម័តឱ្យប្រើប្រាស់មូលនិធិលើគម្រោងចំនួន៤៨ មានថវិកាសរុប ៥ ៦៩៥ ៥៦៧,២៨ (ប្រាំលាន ប្រាំមួយរយកៅសិបប្រាំពាន់ ប្រាំរយហុកសិបប្រាំពីរ ក្បៀសម្ភៃប្រាំបី) ដុល្លារអាម៉េរិក តាមបណ្ត ឃុំចំនួន៤៦ ក្នុងខេត្តចំនួន១០៕
