(ភ្នំពេញ)៖ លោក សុខចិន្តា សោភា ឧបនាយករដ្ឋមន្ត្រី បានចាត់ទុកពិព័រណ៍ពន្លកបៃតង ឆ្នាំ២០២៦ និងការប្រកាសព្រឹត្តិការណ៍ដាំដើមត្នោតមួយលានដើម ជាព្រឹត្តិការណ៍បណ្តុះផ្នត់គំនិតស្រលាញ់ធម្មជាតិ បរិស្ថាន ភាពស្អាត និងភាពបៃតង អមជាមួយការបណ្តុះស្មារតី ជាតិនិយមដ៏រឹងមាំ និងអត្តសញ្ញាណជាតិដ៏ស្រស់ផូរផង់ជាទីបំផុត។

លោក សុខចិន្តា សោភា បានបញ្ជាក់ដូចនេះនាព្រឹកថ្ងៃទី១០ ខែកក្កដា ឆ្នាំ២០២៦នេះ នាឱកាសតំណាងដ៏ខ្ពង់ខ្ពស់សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា អញ្ជើញជាអធិបតីបើកពិធីពិព័រណ៍ «ពន្លកបៃតង» និងប្រកាសព្រឹត្តិការណ៍ដាំដើមត្នោតមួយលានដើម ដែលបានរៀបចំឡេីងនៅស្តីការក្រសួងបរិស្ថាន។

ស្របជាមួយនឹងការចាត់ទុកពិព័រណ៍ពន្លកបៃតង ជាព្រឹត្តិការណ៍បណ្តុះផ្នត់គំនិតស្រលាញ់ធម្មជាតិ បរិស្ថាន, លោកឧបនាយករដ្ឋមន្ត្រី ក៏បានចូលរួមអបអរសាទរចំពោះព្រឹត្តិការណ៍គួរជាទីមោទនចំនួន២ដែលកម្ពុជាទទួល បានក្នុងឆ្នាំ២០២៦នេះ គឺ «ការផ្តល់ចំណាត់ថ្នាក់លេខ១» ជាប្រទេសដែលមានបរិស្ថានធម្មជាតិល្អ បំផុតប្រចាំឆ្នាំ២០២៦ លើពិភពលោក និងនៅតំបន់អាស៊ីអាគ្នេយ៍ កាលពីថ្ងៃទី១៣ ខែឧសភា ឆ្នាំ២០២៦ និង «ការផ្តល់ចំណាត់ថ្នាក់លេខ១» ជាប្រទេសដែលមាននិរន្តរភាពដី និងធនធាន ល្អបំផុតប្រចាំឆ្នាំ២០២៦ នៅលើពិភពលោក និងនៅក្នុងតំបន់អាស៊ាន កាលពីថ្ងៃទី២៦ ខែមិថុនា ឆ្នាំ២០២៦ ដោយយោងតាមរបាយការណ៍សិក្សាស្រាវជ្រាវរបស់ស្ថាប័នស្រាវជ្រាវ U.S. News & World Report។

ឧបនាយករដ្ឋមន្ត្រី សុខចិន្តា សោភា បានបន្ថែមទៀតថា ពិធីពិព័រណ៍ «ពន្លកបៃតង» និងប្រកាសព្រឹត្តិការណ៍ដាំដើមត្នោតមួយលានដើមនេះ នឹងរំលឹកយើងទាំងអស់គ្នាឱ្យចូលរួមគិត និងពិចារណាឡើងវិញអំពីទំនាក់ទំនងរបស់យើងជាមួយនឹងទឹកដី ប្រវត្តិសាស្ត្រ និងជោគវាសនារបស់កូនចៅជំនាន់, ការដាំដើមឈើអាចជាសកម្មភាពដ៏សាមញ្ញមួយ ប៉ុន្តែវាបង្កប់នូវអត្ថន័យដ៏ជ្រាលជ្រៅ។

អ្នកដែលដាំកូនឈើនៅថ្ងៃនេះប្រហែលជាមិនអាចរស់នៅទាន់ដើម្បីអាស្រ័យផលផ្លែ ឬជ្រកក្រោមម្លប់ដ៏ត្រជាក់នៃដើមឈើនោះឡើយ តែពួកគាត់នៅតែលះបង់កម្លាំងកាយចិត្ត ពេលវេលា និងក្តីសង្ឃឹម ដាំដើមឈើទាំងនោះសម្រាប់មនុស្សជំនាន់ក្រោយ ដែលពួកគាត់ប្រហែលជាមិនដែលបានស្គាល់ផង។ ហេតុនេះហើយ ការដាំដើមឈើ គឺជានិមិត្តរូបនៃជំនឿនាពេលអនាគត។

ឧបនាយករដ្ឋមន្ត្រី សុខចិន្តា សោភា ក៏បានរំលេចដែរថា ប្រទេសជាតិណាដែលបណ្តុះស្មារតីដាំដើមឈើ គឺប្រទេសជាតិនោះជឿជាក់លើអនាគតដ៏រឹងមាំរបស់ខ្លួន, ជាក់ស្តែងថ្ងៃនេះកម្ពុជាមិនត្រឹមតែដាំដើមត្នោតមួយលានដើម ឬកូនឈើកម្រប៉ុណ្ណោះទេ ប៉ុន្តែយើងកំពុងរួមគ្នាដាំដុះ«ចក្ខុវិស័យបៃតង» សម្រាប់អនាគតជាតិ៕