(បន្ទាយមានជ័យ)៖ អាជ្ញាធរកម្ពុជា បញ្ជូនជនជាតិថៃ៧៩នាក់ទៅកាន់ប្រទេសថៃវិញ តាមច្រកទ្វារព្រំដែនអន្តរជាតិប៉ោយប៉ែត នៅថ្ងៃទី១០ ខែកក្កដា ឆ្នាំ២០២៦នេះ បន្ទាប់ពីបង្ក្រាបបានប្រព្រឹត្តបទល្មើសនៅកម្ពុជា។

ក្នុងឱកាសដែលបញ្ជូនជនជាតិថៃឃើញវត្តមានលោក ប៉ានខែម ប៊ុនថន ប្រធានក្រុមការងាររាជរដ្ឋាភិបាលចុះជួយមូលដ្ឋានក្រុងប៉ោយប៉ែត, លោកឧត្តមសេនីយ៍ទោ យឿម ម៉ាន់ អនុប្រធាននាយកដ្ឋានស៊ើបអង្កេត និងអនុវត្តន៍នីតិវិធី, លោកឧត្តមសេនីយ៍ត្រី អ៉ី ចំរើន នាយប៉ុស្តិ៍នគរបាលអន្តោប្រវេសន៍ ច្រកទ្វារព្រំដែនអន្តរជាតិប៉ោយប៉ែត, លោកឧត្តមសេនីយ៍ត្រី អេង លីហួរ និងលោកឧត្តមសេនីយ៍ត្រី គង់ ប៉េងលី ស្នងការរងនគរបាលខេត្តបន្ទាយមានជ័យ រួមអាជ្ញាធរក្រុងមានលោក គាត ហ៊ុល អភិបាលក្រុងប៉ោយប៉ែត និងមន្ត្រីស្ថាប័នពាក់ព័ន្ធ។

លោកឧត្តមសេនីយ៍ត្រី អ៉ី ចំរើន បានឲ្យដឹងថា ជនជាតិថៃដែលត្រូវបញ្ជូនពេលនេះ មានចំនួន៧៩នាក់ ក្នុងនោះមានស្រី៣៤នាក់ ដើម្បីប្រគល់ជូនអាជ្ញាធរថៃ តាមច្រកទ្វារព្រំដែនអន្តរជាតិប៉ោយប៉ែត ខេត្តបន្ទាយមានជ័យ ដែលឈមច្រកទ្វារខ្លងលឹក ខេត្តស្រះកែវ ប្រទេសថៃ។ ជនជាតិថៃទាំងអស់នេះ ជាប់ពាក់ព័ន្ធ ១៖ បទល្មើសអនឡាញស្គេមចំនួន៤០នាក់, ២៖ បទល្មើសលួចឆ្លងដែនដោយខុសច្បាប់ចំនួន៣០នាក់, ៣៖ អនុវត្តទោសបញ្ចប់ចំនួន៩នាក់ ក្នុងនោះមានត្រូវបានបិទទិដ្ឋាការរយៈពេល៥ឆ្នាំ ចំនួន៣៩នាក់ និងរយៈពេល៣ឆ្នាំ ចំនួន៤០នាក់។

បើតាមលោកឧត្តមសេនីយ៍ត្រី អ៉ី ចំរើន, នៅពេលបើកយុទ្ធនាការបោសសម្អាតបទល្មើសឆបោកតាមប្រព័ន្ធបច្ចេកវិទ្យាអនឡាញស្គេម អាជ្ញាធរកម្ពុជា បានចាប់បញ្ជូនខ្លួនជនជាតិថៃ តាមច្រកទ្វារព្រំដែនអន្តរជាតិប៉ោយប៉ែត ជិត៨០០នាក់ ដែលពាក់ព័ន្ធបទល្មើសអនឡាញនៅកម្ពុជា៕