(ភ្នំពេញ)៖ ពីថ្ងៃទី១០ ដល់ថ្ងៃទី១២ ខែកក្កដា ឆ្នាំ២០២៦ ផលិតផលនៃគម្រោង «សូត្រចាម» ឬ «ពណ៌នៃការចងចាំ» នៃមជ្ឈមណ្ឌលឯកសារកម្ពុជា បានចូលរួមតាំងបង្ហាញ ស្នាដៃសិល្បៈតម្បាញក្រណាត់សូត្រ ដែលបង្កើតឡើងជាក្បូរក្បាច់រចនាបថគោមដ៏ស្រស់ស្អាត និងការជ្រលក់ពណ៌ ដោយស្រ្តីជាអ្នករស់រានមានជីវិត ពីរបបខ្មែរក្រហម ដែលជាជនជាតិចាម រស់នៅក្នុងខេត្តកំពង់ចាម ក្នុងវេទិកាពិព័រណ៍ទេសចរណ៍មូស្លីមកម្ពុជា ឆ្នាំ២០២៦។

វេតិកានេះ ក្រោមមូលបទ «ទឹកដីពោរពេញដោយភាពស្រស់ត្រកាល និងជាផ្ទះដែលផ្ដល់ទំនុកចិត្តសម្រាប់ការធ្វើដំណើរ» ក្នុងគោលដៅបង្ហាញពីភាពស្រស់ស្អាត នៃសម្រស់ប្រទេសកម្ពុជា និងប្រកបដោយទំនុកចិត្តពីភ្ញៀវអន្តរជាតិ ដែលកាន់សាសនាអ៊ិស្លាមនៅទូទាំងពិភពលោក។ វេទិកាពិព័រណ៍នេះ ធ្វើឡើងនៅបរិវេណនៃវិមានអាហារអូស៊ីអាយស៊ី ផ្លូវអូស៊ីអាយស៊ី សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

គោលបំណងនៃគម្រោងសូត្រចាម គឺចង់បង្ហាញពីបេតិកភណ្ឌវប្បធម៌ និងពហុវប្បធម៌ ប្រពៃណី របស់ជនជាតិចាម ការប្រកបមុខរបរពីជីដូនជីតា បន្តមកកូនចៅជនជាតិចាម ក្នុងពេលបច្ចុប្បន្ន និងវត្ដមានដែលសេសសល់តាមរយៈការចងចាំ និងអាចរចនាឡើងវិញបានទៅជាក្រណាត់សូត្រផលិតដោយដៃ និងមានលក្ខណៈពិសេសក្នុងការជ្រលក់ពណ៌។

គម្រោងសូត្រចាម បានចូលរួមជួយផ្សព្វផ្សាយមួយផ្នែកនៃសក្តានុពលទេសចរណ៍សម្រាប់ទីផ្សារទេសចរមូស្លីម, បើកចំហជើងមេឃទទួលភ្ញៀវគ្រប់ទិសទី ទាំងអ្នកទេសចរណ៍ និងអ្នកវិនិយោគក្នុងវិស័យទេសចរណ៍ និងការផ្ដល់បដិសណ្ឋារកិច្ចដើម្បីភាពងាយស្រួលដល់ទេសចរណ៍មូស្លីម តាមរយៈអ្នកស្រុកភូមិដែលរស់នៅក្នុងតំបន់ផ្ទាល់, ពិនិត្យលទ្ធភាពរបស់ភាគីពាក់ព័ន្ធ ដើម្បីត្រៀមខ្លួនបំពេញនូវតម្រូវការដែលកំពុងកើនឡើងសម្រាប់ទីផ្សារទេសចរណ៍មូស្លីម និងលើកទឹកចិត្តឱ្យមានកិច្ចសហប្រតិបត្តិការ រវាងភាគីពាក់ព័ន្ធដើម្បីបង្កើត និងអនុវត្តយុទ្ធសាស្រ្តសម្រាប់ជំរុញកំណើនទេសចរណ៍ប្រកបដោយបរិយាបន្ន និងនិរន្តរភាពនៅកម្ពុជា។

ពិធីពិព័រណ៍ទេសចរណ៍មូស្លីម មានការអញ្ជើញចូលរួមបើកកម្មវិធីដោយលោក ហួត ហាក់ រដ្ឋមន្រ្តីក្រសួងទេសចរណ៍ និងលោក ឃួង ស្រេង អភិបាលរាជធានីភ្នំពេញ។

លោក ហួត ហាក់ បានថ្លែងថា នេះគឺជាវេទិកាលើកទី៣ បន្ទាប់ពីវេទិកាពិព័រណ៍លើកទី១ ក្នុងឆ្នាំ២០២៤ មានចំនួន២០ស្ដង់, វេទិកាពិព័រណ៍លើកទី២ ក្នុងឆ្នាំ២០២៥ មានចំនួន១០០ស្ដង់ និងវេទិកាពិព័រណ៍លើកទី៣ ក្នុងឆ្នាំ២០២៦នេះ កើនឡើងដល់១៥០ស្តង់ ដែលដាក់តាំងបង្ហាញផលិតផ្សេងៗ។

នៅក្នុងឱកាសនេះដែរ ម្ចាស់អាជីវកម្មបានចូលរួមចែករំលែកអំពីបទពិសោធន៍នៃភាពជោគជ័យ និងកាលានុវត្តភាពក្នុងវិស័យទេសចរណ៍, ការត្រៀមទទួលលក្ខណៈសម្បត្តិ ទេសចរណ៍មូស្លីម និងការផ្ដល់សេវាកម្ម ដើម្បីទាក់ទាញសក្ដានុពលទេសចរណ៍មូស្លីម។

ផ្សាភ្ជាប់នឹងការផ្តល់សេវាកម្ម និងការទាក់ទាញសក្តានុពលទេសចរណ៍មូស្លីម អ្នកស្រី សូ ហ្វារីណា នាយិការងមជ្ឈមណ្ឌលឯកសាកម្ពុជា បានលើកឡើងថា គម្រោងសូត្រចាម ឬ ពណ៌នៃការចងចាំ, ពិព័រណ៍ប្លង់គោល ស្ថាបត្យកម្មនៃព្រះរាជបណ្ណាល័យហ្លួងម៉ែ បានត្រៀមខ្លួនជាស្រេចក្នុងពិព័រណ៍ទេសចរណ៍មូស្លីមលើក៣ សម្រាប់ការផ្សព្វផ្សាយព័ត៌មាន អំពីទីតាំងទេសចរណ៍តាមរយៈកិច្ចការស្រាវជ្រាវ វប្បធម៌ ប្រពៃណី ផ្សាភ្ជាប់សាច់រឿងនៅតាមតំបន់ជាក់ស្ដែង គឺខេត្តកំពង់ចាម មានសហគមន៍តម្បាញសូត្រចាម ធ្វើឡើងដោយដៃស្រ្តីជនជាតិចាម, ស្រុកបុរីអូរស្វាយ-សែនជ័យ ខេត្តស្ទឹងត្រែង មានប្រវត្តិសាស្រ្តនៃការបង្កើតសហគមន៍ រួមផ្សំបរិស្ថានធម្មជាតិ ជីវចម្រុះ និង ទីតាំងព្រះសារមន្ទីរ ដែលគ្រោងនឹងលេចវត្តមានក្នុងពេលអនាគត ដើម្បីផ្សាភ្ជាប់ភ្ញៀវទេសចរណ៍បែបស្រាវជ្រាវក្នុងតំបន់អាស៊ាន។

នៅថ្ងៃដំបូងនៃវេទិកាទេសចរណ៍មូស្លីមស្ដង់សូត្រចាម បានទាក់ទាញភ្ញៀវដែលអញ្ជើញមកចូលរួម កម្មវិធីតាមរយៈ ពណ៌ និងការរចនាគោមសំពត់ដ៏ស្រស់ស្អាត។

លោកយាយ សុន ជុ មានអាយុ៧១ឆ្នាំ រស់នៅឃុំអូរឫស្សី ស្រុកកំពង់ត្រឡាច ខេត្តកំពង់ឆ្នាំង បានចែករំលែកការចងចាំថា៖ ពេលឃើញ ពណ៌ និងគោមសំពត់ ធ្វើឱ្យខ្ញុំនឹកឃើញកាលខ្ញុំទើបមានអាយុ១៤ឆ្នាំ។ ខ្ញុំចាំមិនភ្លេចសំពត់គោមបុរាណទាំងនេះ។ ម្តាយខ្ញុំបានទិញសំពត់សូត្រឱ្យខ្ញុំស្លៀកពេលមានកម្មវិធីពិសេស ដូចជាបុណ្យប្រពៃណី និងរៀបការ។ សំពត់សូត្រសម្រាប់ស្រ្តី គឺពិតជាមានតម្លៃខ្លាំងណាស់។ ថ្ងៃនេះខ្ញុំសប្បាយចិត្ត ព្រោះបានឃើញស្នាដៃសំពត់គោមបុរាណរបស់ជនជាតិចាមនៅសល់ដល់សព្វថ្ងៃ ប្រៀបដូចខ្ញុំដែលជាអ្នករស់រានមានជីវិតពីរបបខ្មែរក្រហមដែរ៕