(កំពង់ធំ)៖ លោក ហាក់ ម៉ុងហួត អភិបាលស្រុកតាំងគោក រួមជាមួយអាជ្ញាធរឃុំទ្រៀល នាព្រឹកថ្ងៃទី១០ ខែកក្កដា ឆ្នាំ២០២៦នេះ បានចុះពិនិត្យស្ថានភាពការបង្កបង្កើនផលស្រូវ និងស្ថានភាពទឹកស្រោចស្រពជាក់ស្តែងនៅក្នុងភូមិសាស្ត្រឃុំទ្រៀល ស្រុកតាំងគោក ខេត្តកំពង់ធំ ដើម្បីវាយតម្លៃលើការលូតលាស់របស់ដំណាំស្រូវ និងត្រៀមលក្ខណៈអន្តរាគមន៍លើបញ្ហាផ្សេងៗ។

នៅពេលចុះពិនិត្យផ្ទាល់ដល់វាលស្រែរបស់ប្រជាពលរដ្ឋនាឱកាសនោះ លោកអភិបាលស្រុក បានពិនិត្យយ៉ាងយកចិត្តទុកដាក់លើការលូតលាស់របស់ដំណាំស្រូវ ព្រមទាំងបានពិនិត្យមើលស្ថានភាពប្រភពទឹក ប្រឡាយ និងទ្វារទឹកនានា ដែលជាប្រភពផ្គត់ផ្គង់ទឹកដ៏សំខាន់សម្រាប់វិស័យកសិកម្មនៅក្នុងមូលដ្ឋាន។

នាឱកាសនោះលោក ហាក់ ម៉ុងហួត ក៏បានជំរុញ និងដាក់បទបញ្ជាដល់អាជ្ញាធរឃុំទ្រៀល ត្រូវយកចិត្តទុកដាក់ខ្ពស់លើការងារបង្កបង្កើនផលរបស់ប្រជាពលរដ្ឋ ដោយត្រូវអនុវត្តការងារសំខាន់ៗដូចខាងក្រោម៖

ទី១៖ តាមដានជាប្រចាំ ត្រូវចុះពិនិត្យ និងតាមដានស្ថានភាពកសិកម្ម ក៏ដូចជាការប្រែប្រួលអាកាសធាតុនៅក្នុងមូលដ្ឋានជាប់ជានិច្ច មិនត្រូវធ្វេសប្រហែសឡើយ។

ទី២៖ អន្តរាគមន៍ទាន់ពេលវេលា ក្នុងករណីជួបប្រទះបញ្ហាខ្វះខាតទឹកស្រោចស្រព ឬមានការយាយីពីសត្វល្អិតចង្រៃផ្សេងៗ អាជ្ញាធរឃុំត្រូវសហការជាមួយមន្ត្រីជំនាញកសិកម្ម ចុះជួយសង្គ្រោះស្រូវរបស់ប្រជាពលរដ្ឋឲ្យបានទាន់ពេលវេលា ជៀសវាងការខូចខាតធ្ងន់ធ្ងរ។

ទី៣៖ ក្តាប់ព័ត៌មាន និងតម្រូវការ ត្រូវក្តាប់ឲ្យបានច្បាស់លាស់នូវរាល់បញ្ហាប្រឈមរបស់កសិករ និងត្រូវរាយការណ៍មកថ្នាក់ស្រុកជាបន្ទាន់ ដើម្បីងាយស្រួលជួយអន្តរាគមន៍បានលឿនបំផុត។

សូមបញ្ជាក់ថា សកម្មភាពចុះពិនិត្យរបស់លោកអភិបាលស្រុកតាំងគោកនាពេលនេះ បានបង្ហាញពីការយកចិត្តទុកដាក់ និងគិតគូរខ្ពស់ពីសុខទុក្ខ និងជីវភាពរស់នៅរបស់ប្រជាកសិករ ដែលជាខ្នងបង្អែកសេដ្ឋកិច្ចដ៏សំខាន់នៅក្នុងមូលដ្ឋាន និងដើម្បីធានាឲ្យបានថាលទ្ធផលនៃការប្រមូលផលស្រូវរបស់ប្រជាពលរដ្ឋទទួលបានទិន្នផលខ្ពស់តាមការរំពឹងទុក៕