(បរទេស)៖ គូទី២ នៃវគ្គ ៨ក្រុមចុងក្រោយនៅ World Cup 2026 រវាងគោជល់អេស្ប៉ាញ និងបិសាចក្រហមអឺរ៉ុប ប៊ែលហ្ស៊ិក នឺងឈានចូលមកដល់នាម៉ោង ២រំលងអាធ្រាត្រនេះ (ម៉ោងនៅកម្ពុជា) នៅពេលលោក Chris Sutton អ្នកជំនាញកីឡាប្រចាំ BBC ទស្សន៍ទាយថា អេស្ប៉ាញនឹងឈ្នះ ៣-០ ខណៈបញ្ញាសិប្បនិមិត្ត AI វិញទាយថា ឈ្នះ ២-០។

- អេស្ប៉ាញ

លោក Sutton បានធ្វើការពន្យល់ថា អេស្ប៉ាញនឹងមិនឈានដល់វគ្គផ្តាច់ព្រ័ត្រ ប្រសិនបើមានទម្រង់លេងដូចកាល ទម្លាក់ព័រទុយហ្គាល់ ១-០ ពីក្នុងវគ្គ ១៦ក្រុមនោះ។ អតីតក្រុមជើងឯក World Cup 2010 មួយនេះហាក់ជួបភាពត្រដាបត្រដួសខ្លាំងណាស់ ជាពិសេសខ្សែប្រយុទ្ធវ័យក្មេង Lamine Yamal របស់ពួកគេតែម្តងដែលអូសមិនផុតខ្សែការពារ Nuno Mendes របស់ព័រទុយហ្គាល់។

មួយវិញទៀត Mikel Oyarzabal បានខកខានឱកាសមាសសម្រាប់អេស្ប៉ាញ ដោយស៊ុតខុសគោលដៅ ពេលដាច់ខ្សែការពារអស់ជាដើម។ ពួកគេត្រូវរង់ចាំរហូតដល់ប្តូរកីឡាករសំខាន់ ២រូប Ferran Torres និង Mikel Merino ចូលទើបអាចយកឈ្នះចុងម៉ោងបាន។

ទោះជាយ៉ាងណា អេស្ប៉ាញនៅតែបន្តភាពខ្លាំង តាមរយៈមិនទាន់របូតសូម្បី ១គ្រាប់នៅឡើយទេ ក្រោយឆ្លងកាត់ ៥ប្រកួតនៅ World Cup ជំនាន់ទី២៣ បើធៀបនឹងតំបន់ប្រយុទ្ធមិនសូវធ្វើបានល្អក៏ដោយ។

- ប៊ែលហ្ស៊ិក

ប៊ែលហ្ស៊ិក បានទម្លាក់សហម្ចាស់ផ្ទះអាមេរិកចេញពី World Cup 2026 ក្នុងប្រកួតចុងក្រោយរបស់ពួកគេ ដោយលោក Sutton បានចាត់ទុកថា វាមិនទាន់ល្អខ្លាំងនោះទេ ក៏ព្រោះតែមើលឃើញថា គូប្រជែងមានទម្រង់លេងយ៉ាប់មែនទែនតែម្តងពីក្នុងវគ្គ ១៦ក្រុមនោះ។

ខ្សែបម្រើសំខាន់ Amadou Onana ជួបបញ្ហារបួស ដែលញាំងឱ្យតំបន់បម្រើរបស់ប៊ែលហ្ស៊ិកជួបការលំបាក ក្នុងការទប់ទល់នឹងអេស្ប៉ាញ ដែលមានប្រព័ន្ធការពាររឹងមាំស្រាប់។ ហេតុនេះ ប៊ែលហ្ស៊ិកអាចលេងក្នុងទម្រង់ការពារវាយបក (counter attack) នៅពេលអេស្ប៉ាញទំនងគ្រប់គ្រងប្រកួត ជាពិសេសបត់តារាងលេងមិនខានឡើយ។

សំណួរ៖ តើប៊ែលហ្ស៊ិក នឹងឈ្នះអេស្ប៉ាញ? ទេ
តើពួកគេនឹងក្លាយជាក្រុមដំបូងដែលទម្លុះសំណាញ់ទីអេស្ប៉ាញមែនទេ? នោះក៏មិនងាយដែរ និងពិតជាភ្ញាក់ផ្អើលខ្លាំងណាស់ ប្រសិនបើអាចធ្វើបានមែន៕