(ព្រះសីហនុ)៖ ដើម្បីធានាដល់សុខភាពសិស្សានុសិស្សនៅក្នុងសាលារៀន និងពន្យល់ណែនាំអ្នកលក់ដូរចំណី ម្ហូបអាហារក្នុងបរិវេណសាលា នាថ្ងៃទី១០ ខែកក្កដា ឆ្នាំ២០២៦ មន្ត្រីជំនាញសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ដែលហៅកាត់ថា (ក.ប.ប) ខេត្តព្រះសីហនុ បានចុះអប់រំផ្សព្វផ្សាយស្តីពី «សុវត្ថិភាពម្ហូបអាហារ និងកិច្ចការពារអ្នកប្រើប្រាស់» ជូនដល់សិស្សានុសិស្ស លោកគ្រូ អ្នកគ្រូ និងអាជីវករនៅក្នុងបរិវេណវិទ្យាល័យ ហ៊ុន សែន ព្រៃនប់។

កម្មវិធីនេះធ្វើឡើងដោយមានការចង្អុលបង្ហាញពី លោក ឃុន ស៊ីម៉ន ប្រធានសាខា ក.ប.ប និងដឹកនាំដោយ លោក ជា ប៉ិច អនុប្រធានសាខា ក.ប.ប. ខេត្តព្រះសីហនុ ដោយមានការសហការយ៉ាងជិតស្និទ្ធ ជាមួយមន្ទីរពាណិជ្ជកម្មខេត្ត មន្ទីរអប់រំ យុវជន និងកីឡា អាជ្ញាធរដែនដី ក៏ដូចជាការសម្របសម្រួលពីសំណាក់លោកនាយកវិទ្យាល័យ ហ៊ុន សែន ព្រៃនប់ ព្រមទាំងមានការចូលរួមយ៉ាងផុសផុលពីសិស្សានុសិស្ស លោកគ្រូ អ្នកគ្រូ និងអាជីវករសរុបជាង ១,០០០នាក់។

ក្នុងឱកាសនោះ លោក ជា ប៉ិច បានគូសបញ្ជាក់អំពីសារៈសំខាន់នៃការជ្រើសរើសម្ហូបអាហារដែលមានគុណភាព និងសុវត្ថិភាព ដើម្បីធានាដល់សុខភាពសិស្សានុសិស្សនៅក្នុងសាលារៀន។ មន្ត្រីជំនាញ បានធ្វើការបង្ហាញចំណេះដឹងដល់អ្នកចូលរួមអំពី៖

*វិធីសាស្ត្រពិនិត្យមើលស្លាកសញ្ញាផលិតផល និងកាលបរិច្ឆេទផុតកំណត់ប្រើប្រាស់
*ការសម្គាល់ផលិតផលដែលមានសារធាតុគីមីហាមឃាត់ដែលប៉ះពាល់ដល់សុខភាព
*តួនាទី និងសិទ្ធិរបស់អតិថិជនក្នុងការទាមទារព័ត៌មានត្រឹមត្រូវពីអ្នកលក់
*ការយល់ដឹងពីច្បាប់ស្តីពីកិច្ចការពារអ្នកប្រើប្រាស់ ដើម្បីចៀសវាងការចាញ់បោកការផ្សាយពាណិជ្ជកម្មមិនពិត។

សូមជម្រាបថា ការចុះអប់រំនេះ គឺជាផ្នែកមួយនៃបេសកកម្មរបស់សាខា ក.ប.ប. ខេត្តព្រះសីហនុ ក្នុងការរួមចំណែកលើកកម្ពស់សុខុមាលភាពសាធារណៈ និងធានាថាម្ហូបអាហារដែលដាក់លក់ក្នុងសាលារៀន និងជុំវិញសាលា មានការទទួលខុសត្រូវខ្ពស់ពីសំណាក់អាជីវករ។

ជាមួយគ្នានេះ លោកនាយកវិទ្យាល័យ និងតំណាងសិស្សានុសិស្ស បានសម្តែងការគាំទ្រយ៉ាងខ្លាំងចំពោះសកម្មភាពនេះ ដោយចាត់ទុកថាជាការផ្តល់ចំណេះដឹងដ៏មានតម្លៃ ដែលនឹងជួយឱ្យកូនសិស្សមានការប្រុងប្រយ័ត្នខ្ពស់ ក្នុងការបរិភោគ និងក្លាយជាអ្នកប្រើប្រាស់ដែលមានការយល់ដឹងច្បាស់លាស់៕