(តាកែវ)៖ ដើម្បីចូលរួមលើកកម្ពស់វិស័យអប់រំនៅតំបន់ដាច់ស្រយាល និងនៅតាមតំបន់ព្រំដែន លោក វ៉ី សំណាង អភិបាលខេត្តតាកែវ និងលោក ឈន សារ៉ាណេ អនុរដ្ឋលេខាធិការក្រសួងមហាផ្ទៃ នៅព្រឹកថ្ងៃទី១០ ខែកក្កដា ឆ្នាំ២០២៦នេះ បានអញ្ជើញបញ្ចុះបឋមសិលាសាងសង់អាគារសិក្សាមួយខ្នង មាន៥បន្ទប់ ស្ថិតនៅអនុវិទ្យាល័យក្ដុលជ្រំ ក្នុងភូមិក្ដុលជ្រំ ឃុំកំពង់ក្រសាំង ស្រុកបូរីជលសារ ជាប់ព្រំដែនប្រទេសវៀតណាម​។

ថ្លែងក្នុងឱកាសនោះ លោក វ៉ី សំណាង អភិបាលខេត្តតាកែវ និងលោក ឈន សារ៉ាណេ អនុរដ្ឋលេខាធិការក្រសួងមហាផ្ទៃ បានលើកឡើងពីការយកចិត្តទុកដាក់របស់រាជរដ្ឋាភិបាលកម្ពុជា ទៅលើវិស័យអប់រំ ជាអាទិភាព ដោយធ្វើការពង្រីកទាំងចំនួន និងកម្រិត នៃសាលារៀនឲ្យបានទូទាំងប្រទេស ជាពិសេសសាលារៀននៅតាមបណ្ដោយព្រំដែន ហើយព្រមទាំងកំពុងតែធ្វើការពង្រឹងគុណភាពអប់រំ ឲ្យកាន់តែខ្លាំងក្លាថែមទៀតផងដែរ។

លោកអភិបាលខេត្តតាកែវ និងលោកអនុរដ្ឋលេខាធិការ បានផ្ដាំផ្ញើដល់អាជ្ញាធរមូលដ្ឋាន លោកគ្រូ អ្នកគ្រូ ត្រូវធ្វើការជំរុញដល់ប្រជាពលរដ្ឋ ដែលមានកូនគ្រប់អាយុចូលរៀនត្រូវបញ្ចូនពួកគេ មកចូលរៀនឲ្យបានគ្រប់គ្នា ព្រោះការបញ្ជូនកូនទៅសាលារៀន គឺជាការសន្សំទ្រព្យទុកឲ្យកូនៗ នាពេលអនាគត ហើយការបញ្ចូនពួកគេទៅសាលា ក៏ដើម្បីឲ្យពួកគេមានចំណេះជំនាញតាំងពីតូច និងក្លាយជាទំពាំងស្នងឬស្សីសម្រាប់សង្គមជាតិផងដែរ៕