(តាកែវ)៖ ករណីរំលោភសេពសន្ថវៈមួយ បានបង្កឱ្យមានការភ្ញាក់ផ្អើល និងក្តុកក្តួលយ៉ាងខ្លាំងពីសំណាក់មហាជន បន្ទាប់ពីកុមារីកំព្រាអាយុ ១០ឆ្នាំម្នាក់ ត្រូវបានជីតាចុង បង្ខំរំលោភរហូតសម្រេចជាច្រើនលើក និងគំរាមកំហែងអារ-កសម្លាប់ចោល ប្រសិនបើហ៊ានទម្លាយរឿងនេះប្រាប់អ្នកដទៃ។

ជនសង្ស័យបានរត់គេចខ្លួនបាត់ស្រមោលអស់រយៈពេល ១ខែមកហើយ ប៉ុន្តែសមត្ថកិច្ចមូលដ្ឋាននៅមិនទាន់អាចវែកមុខចាប់ខ្លួនបាននៅឡើយ។

យោងតាមប្រភពព័ត៌មានបានឱ្យដឹងថា កុមារីរងគ្រោះមានអក្សរកាត់ វ.ន ន.ក អាយុ ១០ឆ្នាំ ជាក្មេងស្រីកំព្រាឪពុកម្តាយតាំងពីតូច រស់នៅជាមួយបងប្រុសបង្កើត និងមានផ្ទះក្បែរជីដូនចាស់ជរាឈ្មោះ ហៀង មុត អាយុ ៦០ឆ្នាំ ដែលមានជីវភាពខ្វះខាតខ្លាំង និងមិនបានទទួលការសិក្សារៀនសូត្រឡើយ។

បច្ចុប្បន្ន គ្រួសាររងគ្រោះមានទីលំនៅភូមិត្រពាំងលើក ឃុំកណ្ដឹង ស្រុកបាទី ខេត្តតាកែវ។ ហេតុការណ៍បែកការណ៍នេះ បានកើតឡើងកាលពីថ្ងៃទី០៩ ខែមិថុនា ឆ្នាំ២០២៦ ខណៈពេលដែលជនសង្ស័យត្រូវជាជីតា ឈ្មោះ គក ពាំង អាយុ ៧៨ឆ្នាំ បានព្យាយាមធ្វើសកម្មភាពអនាចារលើកុមារីរងគ្រោះម្តងទៀត តែត្រូវបានបងប្រុសបង្កើតរបស់កុមារីរងគ្រោះ ដើរមកប្រទះឃើញផ្ទាល់ភ្នែក។ ភ្លាមៗនោះ ជនសង្ស័យបានរត់គេចខ្លួនបាត់ពីមូលដ្ឋាន។

ទោះជាយ៉ាងណាក៏ដោយ បើទោះបីជាហេតុការណ៍នេះបានកន្លងផុតទៅអស់រយៈពេល១ខែហើយក្តី សមត្ថកិច្ចឃុំកណ្ដឹង និងស្រុកបាទី នៅមិនទាន់អាចឃាត់ខ្លួនជនសង្ស័យយកមកផ្តន្ទាទោសតាមច្បាប់បាននៅឡើយទេ ដែលនេះកំពុងធ្វើឱ្យកុមារីរងគ្រោះ និងក្រុមគ្រួសារ រស់នៅក្នុងភាពភ័យខ្លាចជាខ្លាំង ព្រោះតែការគំរាមកំហែងដល់អាយុជីវិតពីសំណាក់ជនល្មើស។

ដោយមើលឃើញពីទុក្ខលំបាក និងភាពអយុត្តិធម៌នេះ កាលពីពេលថ្មីៗនេះ អំណោយសប្បុរសធម៌របស់លោកឧត្តមសេនីយ៍ទោ ឡោ ម៉េងហួត ប្រធាននាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ រួមមាន៖ ថវិកាចំនួន ១០០ដុល្លារ, អង្ករ ១០០គីឡូក្រាម, និងមីចំនួន ១០កេស រួមជាមួយបច្ច័យចូលរួមចំនួន ១០ម៉ឺនរៀល ពីសំណាក់ព្រះអនុគណក្រុងកោះរ៉ុង ត្រូវបាននាំយកទៅប្រគល់ជូនកុមារីរងគ្រោះដោយផ្ទាល់ ដើម្បីជួយសម្រាលការលំបាកផ្នែកជីវភាព និងផ្តល់ការលើកទឹកចិត្តដល់នាង។

ប្រជាពលរដ្ឋមូលដ្ឋសង្ឃឹមថា សមត្ថកិច្ចជំនាញឱ្យពន្លឿនការស្វែងរកចាប់ខ្លួនជនសង្ស័យវ័យ ៧៨ឆ្នាំរូបនេះ យកមកចាត់ការតាមនីតិវិធីច្បាប់ឱ្យខានតែបាន ដើម្បីផ្តល់យុត្តិធម៌ជូនកុមារីរងគ្រោះ៕