(សៀមរាប)៖ មន្រ្តីយោធាដែលពាក់ព័ន្ធគ្រោះថ្នាក់ចរាចរណ៍ នៅខេត្តសៀមរាប ត្រូវបានតុលាការសម្រេចដោះលែងឲ្យមានសេរីភាព។ នេះបើតាមសេចក្តីប្រកាសព័ត៌មាន របស់អ្នកនាំពាក្យសាលាដំបូង និងអយ្យការអមសាលាដំបូងខេត្តសៀមរាប នៅថ្ងៃទី១០ ខែកក្កដា ឆ្នាំ២០២៦។

នាព្រឹកថ្ងៃទី១០ ខែកក្កដា ឆ្នាំ២០២៦ សាលាដំបូងខេត្តសៀមរាប បានបើកសវនាការជាសាធារណៈ ដើម្បីជំនុំជម្រះលើសំណុំរឿងព្រហ្មទណ្ឌលេខ ១០៥៣ ចុះថ្ងៃទី៤ ខែកក្កដា ឆ្នាំ ២០២៦ របស់អយ្យការអមសាលាដំបូង ខេត្តសៀមរាប តាមនីតិវិធីនៃការបង្ហាញខ្លួនភ្លាមលើជនជាប់ចោទ ឈ្មោះ ជន់ ជួន ភេទប្រុស កើតឆ្នាំ១៩៩៦ (មុខរបរជាទាហាន)។

តុលាការបានប្រកាសសាលក្រមលេខ ១១០(ជ) /៦០១ ចុះថ្ងៃទី១០ ខែកក្កដា ឆ្នាំ២០២៦ ដោយសម្រេច៖ ផ្តន្ទាទោសលើឈ្មោះ ជន់ ជួន ភេទប្រុស កើតឆ្នាំ១៩៩៦ ដាក់ពន្ធនាគារកំណត់រយៈពេល ១ (មួយ) ឆ្នាំ តែត្រូវអនុវត្តទោសក្នុងពន្ធនាគារកំណត់រយៈពេល ៥ (ប្រាំ) ថ្ងៃ ចំពោះទោសដែលនៅសល់ ព្យួរធម្មតា ពីបទ បើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬ មិនគោរពកាតព្វកិច្ចដែលច្បាប់ តម្រូវ បណ្តាលឱ្យរងរបួសអ្នកដទៃ តាមមាត្រា ៨៣ នៃច្បាប់ស្តីពីចរាចរណ៍ផ្លូវគោក ប្រព្រឹត្តនៅចន្លោះ បង្គោលគីឡូម៉ែត្រលេខ ៣១-៣២ លើផ្លូវជាតិលេខ ៦៨ ស្ថិតនៅភូមិជ្រោយនាងងួន ឃុំជ្រោយនាងងួន ស្រុកស្រីស្នំ ខេត្តសៀមរាប កាលពីថ្ងៃទី២ ខែកក្កដា ឆ្នាំ២០២៦។

អ្នកនាំពាក្យសាលាដំបូង និងអយ្យការអមសាលាដំបូងខេត្តសៀមរាប សូមបញ្ជាក់បន្ថែមថា៖ តំណាងអយ្យការបានអនុវត្តតាមអំណាចសាលក្រមខាងលើ ដោយដោះលែងជននេះ ឱ្យមានសេរីភាព តាមដីកាបង្គាប់ឱ្យដោះលែងលេខ ៤៨៧ អយក ចុះថ្ងៃទី១០ ខែកក្កដា ឆ្នាំ២០២៦ របស់អយ្យការអមសាលាដំបូងខេត្តសៀមរាប៕