(កោះកុង)៖ ឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) នៅថ្ងៃទី៨ ខែកក្កដា ឆ្នាំ២០២៦ បានអញ្ជើញជាអធិបតីផ្តល់កិត្តិយសប្រគល់វិញ្ញាបនបត្របញ្ជាក់ការសិក្សា ជូនដល់សិក្ខាកាមដែលបានបញ្ចប់ដោយជោគជ័យនូវវគ្គបណ្តុះបណ្តាលស្តីពី «ការប្រែក្លាយពីអ្នកគ្រប់គ្រងទៅជាគ្រូបង្វឹក ដើម្បីបង្កើនផលិតភាព» ដែលរៀបចំឡើងនៅមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកោះកុង។

វគ្គបណ្តុះបណ្តាលនេះ មានគោលបំណងពង្រឹងសមត្ថភាពអ្នកគ្រប់គ្រង និងម្ចាស់សហគ្រាសឱ្យអាចអភិវឌ្ឍតួនាទីពីការគ្រប់គ្រងបែបប្រពៃណី ទៅជាការដឹកនាំ និងបង្វឹកបុគ្គលិកប្រកបដោយប្រសិទ្ធភាព ដើម្បីលើកកម្ពស់ផលិតភាពការងារ និងការអភិវឌ្ឍធនធានមនុស្សនៅក្នុងសហគ្រាស។

មាតិកាសំខាន់ៗនៃវគ្គបណ្តុះបណ្តាល រួមមាន ផលប៉ះពាល់ដល់សមិទ្ធិផលការងារ វិធីសាស្ត្រធ្វើការជាមួយបុគ្គលិក ការកសាងឥទ្ធិពលក្នុងទំនាក់ទំនង ការដឹកនាំ និងការបង្វឹក វិធីសាស្ត្របង្វឹក ជំនាញចាំបាច់របស់អ្នកដឹកនាំ ដំណាក់កាលនៃការបង្វឹក ព្រមទាំងអត្ថប្រយោជន៍នៃការបង្វឹក និងការផ្តល់ព័ត៌មានត្រឡប់ (Feedback) ដើម្បីបង្កើនប្រសិទ្ធភាពការងារ។

វគ្គបណ្តុះបណ្តាលនេះ ទទួលបានការគាំទ្រពី មូលនិធិអភិវឌ្ឍន៍ជំនាញ (Skills Development Fund - SDF) និងរៀបចំដោយ សម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) សហការជាមួយ ក្រុមហ៊ុន AdvancePlus Consulting Int ដោយមានម្ចាស់សហគ្រាសនៅខេត្តកោះកុងចូលរួមសរុបចំនួន ២៥នាក់។

តាមរយៈកម្មវិធីបណ្តុះបណ្តាលនេះ FASMEC បន្តបង្ហាញការប្តេជ្ញាចិត្តក្នុងការពង្រឹងសមត្ថភាពសហគ្រិនកម្ពុជា តាមរយៈការអភិវឌ្ឍជំនាញគ្រប់គ្រង និងភាពជាអ្នកដឹកនាំ ដើម្បីជំរុញការប្រកួតប្រជែង និងការរីកចម្រើនប្រកបដោយចីរភាពរបស់សហគ្រាសធុនតូច និងមធ្យមនៅកម្ពុជា៕⁩