សភាយុវពាណិជ្ជករអន្តរជាតិកម្ពុជា សាខាទួលគោក រួមចំណែកជួយលើកកម្ពស់សុខុមាលភាពពលរដ្ឋក្នុងសហគមន៍បឹងត្របែក
10-07-2026 17:28
(ភ្នំពេញ)៖ សភាយុវពាណិជ្ជករអន្តរជាតិកម្ពុជា សាខាទួលគោក សម្រេចបានជោគជ័យក្នុងយុទ្ធនាការមនុស្សធម៌ និងគម្រោង «សុខភាពសហគមន៍ខ្ញុំ» នៅសហគមន៍បឹងត្របែក រាជធានីភ្នំពេញ ដោយបានរួមចំណែកលើកកម្ពស់សុខុមាលភាពប្រជាពលរដ្ឋក្នុងសហគមន៍។
គម្រោង «សុខភាពសហគមន៍ខ្ញុំ» ត្រូវបានបង្កើតឡើងក្នុងគោលបំណងចូលរួមចំណែកជំរុញដល់ គោលដៅអភិវឌ្ឍន៍ប្រកបដោយចីរភាពទី៦ (SDG 6) របស់អង្គការសហប្រជាជាតិ ដែលផ្តោតលើ «ទឹកស្អាត និងអនាម័យ» ដើម្បីលើកកម្ពស់សុខុមាលភាពប្រជាពលរដ្ឋក្នុងសហគមន៍។
តាមរយៈការចុះសិក្សាជាក់ស្តែងសភាយុវពាណិជ្ជករអន្តរជាតិកម្ពុជា សាខាទួលគោក បានរកឃើញថា ប្រជាពលរដ្ឋក្នុងសហគមន៍បឹងត្របែកបានកំពុងប្រឈមមុខនឹងបញ្ហាកង្វះខាតទឹកស្អាតសម្រាប់បរិភោគ កង្វះការយល់ដឹងពីការទុកដាក់ទឹក និងអនាម័យ ដែលជាប្រភពនៃការកកើតសត្វល្អិត និងជំងឺតម្កាត់ផ្សេងៗ រួមទាំងបន្ទុកចំណាយខ្ពស់លើការប្រើប្រាស់ទឹកប្រចាំថ្ងៃ។
ដើម្បីដោះស្រាយបញ្ហាប្រឈមទាំងនេះ ក្រោមការដឹកនាំរបស់ កញ្ញា អាន ស្រីនិច្ច ដែលជាប្រធានគម្រោង យុទ្ធនាការនេះបានសម្រេចនូវសកម្មភាពយុទ្ធសាស្ត្រសំខាន់ៗចំនួន ៣ ដូចជា៖
១. ការលើកកម្ពស់ការយល់ដឹងអំពីទឹកស្អាត អនាម័យ និងសុខភាព តាមរយៈ ការរៀបចំសិក្ខាសាលា និងការពិភាក្សាដោយមានការចូលរួមពីវេជ្ជបណ្ឌិត និងអ្នកជំនាញ ដើម្បីផ្លាស់ប្តូរទម្លាប់ និងបង្កើនការយល់ដឹងអំពីការរស់នៅស្អាត និងការបរិភោគទឹកស្អាតដល់ប្រជាពលរដ្ឋ។
២. ដំណោះស្រាយទឹកស្អាតប្រកបដោយចីរភាព៖ បានដំឡើងទូចម្រោះទឹកស្អាតចំនួន ១ ទូ និងផ្គត់ផ្គង់ទឹកស្អាតនៅក្នុងសហគមន៍ ដើម្បីផ្តល់លទ្ធភាពឱ្យក្រុមគ្រួសារងាយរងគ្រោះទទួលបានទឹកបរិភោគប្រកបដោយសុវត្ថិភាព និងកាត់បន្ថយការចំណាយប្រចាំថ្ងៃ។
៣. ការចែកសម្ភារៈអនាម័យចាំបាច់៖ បានចែកជូនសាប៊ូ ថ្នាំដុសធ្មេញ ច្រាសដុសធ្មេញ និងដបទឹកស្អាតដល់គ្រួសារនីមួយៗ ដើម្បីយកទៅអនុវត្តអនាម័យក្នុងជីវភាពប្រចាំថ្ងៃ។
កញ្ញា អាន ស្រីនិច្ច ដែលជាប្រធានគម្រោងបានគូសបញ្ជាក់ទាំងក្តីរំភើបថា គម្រោងសុខភាពសហគមន៍ខ្ញុំបានបញ្ចប់ទៅដោយជោគជ័ យ។ ប៉ុន្តែយ៉ាងណា នេះគ្រាន់តែជាចំណុចចាប់ផ្តើមនៃបេសកកម្មដ៏អស្ចារ្យមួយ។
កញ្ញាបន្តថា « ក្នុងនាមជាប្រធានគម្រោង នាងខ្ញុំមានមោទនភាពជាខ្លាំងដែលយើងបានរួមចំណែកជួយឱ្យប្រជាពលរដ្ឋក្នុងសហគមន៍បឹងត្របែកទទួលបានទឹកស្អាតសម្រាប់បរិភោគ និងបង្កើនការយកចិត្តទុកដាក់លើអនាម័យផ្ទាល់ខ្លួន។ តាមរយៈការចាប់ផ្តើមអនុវត្តគម្រោងក្នុងឆ្នាំដំបូងនេះ សភាយុវពាណិជ្ជករអន្តរជាតិកម្ពុជា សាខាទួលគោក នឹងបន្តរួមចំណែកជួយលើកកម្ពស់គុណភាពជីវិតរបស់ក្រុមគ្រួសារប្រមាណ ៤៧០ គ្រួសារឱ្យកាន់តែមានភាពល្អប្រសើរឡើង។ សកម្មភាព និងជោគជ័យដែលកើតចេញពីគម្រោងនេះ គឺពិតជាបានឆ្លុះបញ្ចាំងយ៉ាងច្បាស់ពីទស្សនវិជ្ជារបស់យើង នោះគឺ៖ “អ្នកដឹកនាំវ័យក្មេងបង្កើប្រវត្តិសាស្រ្ត។
ភាពជោគជ័យនៃគម្រោង «សុខភាពសហគមន៍ខ្ញុំ» នាពេលនេះ គឺមិនអាចខ្វះបានឡើយនូវការចូលរួមយ៉ាងសកម្មពីយុទ្ធនាការរៃអង្គាសថវិកា ដៃគូសហការនានា ដែលបានឧបត្ថម្ភមធ្យោបាយធ្វើដំណើរដល់ក្រុមប្រឹក្សាភិបាលរបស់ សភាយុវពាណិជ្ជករអន្តរជាតិកម្ពុជា សាខាទួលគោក៕
