(ភ្នំពេញ)៖ ក្រុមការងារទាំង៣ នៃប្រទេសក្នុងមហាអនុតំបន់ទន្លេមេគង្គ បានបន្តរួមគ្នាដាក់ចេញនូវផែនការសកម្មភាព ដើម្បីឆ្លើយតបទៅនឹងបញ្ហាគ្រឿងញៀនដែលនៅតែជាការប្រឈមដ៏ស្មុគស្មាញ។ ការប្តេជ្ញាចិត្តនេះបានធ្វើឡើងបន្ទាប់ពីកិច្ចប្រជុំប្រចាំឆ្នាំរយៈពេល ៣ ថ្ងៃរបស់ខ្លួន ដែលបានបិទបញ្ចប់នៅទីក្រុងណាននីង ខេត្តក្វាងស៊ី ប្រទេសចិន កាលពីថ្ងៃទី១០ ខែកក្កដា ឆ្នាំ២០២៦។

ឧត្តមសេនីយ៍ឯក នាក់ យុទ្ធា អគ្គលេខាធិការរងនៃអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានប្រតិភូកម្ពុជា បានថ្លែងថា បញ្ហាគ្រឿងញៀននៅតែបន្តមានភាពស្មុគស្មាញ ដោយជាក់ស្តែងនៅឆ្នាំ២០២៥ បរិមាណសរុបនៃថ្នាំញៀនមេតំហ្វេតាមីន ដែលរឹបអូសបាននៅអាស៊ីបូព៌ា និងអាស៊ីអាគ្នេយ៍ មានចំនួន ៣៤៩ តោន កើនឡើង ៤៨% លើសឆ្នាំ២០២៤។ ក្នុងនោះ អាស៊ីអាគ្នេយ៍មានចំនួនប្រមាណ ៩៤% (៣២៧ តោន) ហើយប្រទេសមេគង្គក្រោម រួមមាន កម្ពុជា ឡាវ មីយ៉ាន់ម៉ា ថៃ និងវៀតណាម បានរួមគ្នារឹបអូសបានប្រហែល ២៦៣,៤ តោន ស្មើនឹង ៧៦% នៃតំបន់។

ដើម្បីឆ្លើយតបនឹងបញ្ហាប្រឈមនេះ ក្រុមការងារទាំងបីបានរួមគ្នាដាក់ផែនការសកម្មភាពបន្ត ដែលរួមមានការពង្រឹងសមត្ថភាពការងារអប់រំបង្ការ ការលើកកម្ពស់ប្រសិទ្ធភាពគ្រប់គ្រងសារធាតុគីមីផ្សំតាមរយៈភាពជាដៃគូ រវាងរដ្ឋនិងឯកជន និងការពង្រឹងសមត្ថភាពមន្ត្រីជួរមុខនៅតាមច្រកព្រំដែន។

លើសពីនេះ កម្ពុជារំពឹងទទួលបានការគាំទ្រផ្នែកបច្ចេកទេស និងថវិកាសម្រាប់ប្រតិបត្តិការនៅទីតាំង Bravo សារធាតុគំរូស្តង់ដារ និងការពង្រឹងសមត្ថភាពការវិភាគថ្មីៗ ដើម្បីស្វែងរកប្រភពដើមនៃការផលិតគ្រឿងញៀនខុសច្បាប់។

លោកស្រី Delphine Schantz តំណាង UNODC អាស៊ីអាគ្នេយ៍ ប៉ាស៊ីហ្វិក បានកោតសរសើរដល់ក្រុមការងារទាំងបី ដែលបានចូលរួមចំណែកអនុវត្តការងារបានល្អ និងបានលើកជាសកម្មភាពក្នុងកិច្ចប្រជុំលើកទី៣ ដើម្បីរួមគ្នាអនុវត្តបន្តទៀត។ កិច្ចខិតខំប្រឹងប្រែងរួមគ្នានេះ ឆ្លុះបញ្ចាំងពីការប្តេជ្ញាចិត្តដ៏មុតមាំរបស់បណ្តាប្រទេសក្នុងមហាអនុតំបន់ទន្លេមេគង្គ ក្នុងការប្រយុទ្ធប្រឆាំងគ្រឿងញៀន ដើម្បីសន្តិសុខ និងសុខុមាលភាពក្នុងតំបន់។ ប្រតិភូកម្ពុជានឹងត្រឡប់មកដល់មាតុភូមិវិញនៅយប់ថ្ងៃទី១១ ខែកក្កដា ឆ្នាំ២០២៦៕