(បន្ទាយមានជ័យ)៖ សូមទស្សនាទិដ្ឋភាពនៅភូមិរង់ចាំ ជាទីជម្រកបណ្តោះអាសន្ន ដែលពលរដ្ឋភៀសសឹកអាចរស់នៅដោយសេចក្តីថ្លៃថ្នូរ រង់ចាំដំណោះស្រាយប្រកបដោយយុត្តិធម៌ ពីទង្វើឈ្លានពានរបស់យោធាថៃ ដោយខុសច្បាប់ក្រោយបទឈប់បាញ់។

គួរឱ្យដឹងថា ក្រសួងមហាផ្ទៃ បានចេញសេចក្តីសម្រេចបង្កើតភូមិរង់ចាំ១ ភូមិរង់ចាំ២ ភូមិរង់ចាំ៣ ភូមិរង់ចាំ៤ ភូមិរង់ចាំ៥ និងភូមិរង់ចាំ៦ ដោយបំបែកចេញពីភូមិស្លក្រាម នៃឃុំស្លក្រាម ស្រុកស្វាយចេក ខេត្តបន្ទាយមានជ័យ។

ការបង្កើតភូមិថ្មីទាំងនេះ ធ្វើឡើងបន្ទាប់ពីសម្ដេចតេជោ ហ៊ុន សែន ប្រមុខរដ្ឋស្តីទីកម្ពុជា បានប្រសិទ្ធនាមឲ្យមជ្ឈមណ្ឌលជនភៀសសឹកនៅភូមិស្លក្រាម ស្រុកស្វាយចេក ខេត្តបន្ទាយមានជ័យ ជា «ភូមិរង់ចាំ» កាលពីព្រឹកថ្ងៃទី៩ ខែមិថុនា ឆ្នាំ២០២៦។ ការប្រសិទ្ធនាមនេះបានធ្វើឡើងក្នុងឱកាសដែលសម្តេចតេជោ អញ្ជើញសំណេះសំណាល និងចែកអំណោយជូនជនភៀសសឹកចំនួន ៣,៣១៨នាក់ ដែលកំពុងស្នាក់នៅជម្រកបណ្តោះអាសន្ននោះ។
ពាក្យ «ភូមិរង់ចាំ» នេះ មិនមែនត្រឹមតែជាឈ្មោះភូមិមួយប៉ុណ្ណោះទេ ប៉ុន្តែវាផ្ទុកនូវសារនយោបាយ និងសារអធិបតេយ្យភាពដ៏សំខាន់មួយ ដែលបញ្ជាក់យ៉ាងច្បាស់ថា កម្ពុជាមិនបោះបង់ចោលការទាមទារ និងការពារបូរណភាពទឹកដីរបស់ខ្លួនឡើយ ទោះបីជាជ្រើសរើសដំណោះស្រាយដោយសន្តិវិធីក៏ដោយ។

សម្តេចតេជោបានសង្កត់ធ្ងន់ថា ការដាក់ឈ្មោះនេះ គឺជាការបដិសេធមិនឱ្យពាក្យ «បាត់បង់» ក្លាយជាពាក្យចុងក្រោយឡើយសម្រាប់ពលរដ្ឋភៀសខ្លួនដែលបាត់បង់ផ្ទះសម្បែង និងក្តីសង្ឃឹម។

ការបង្កើតភូមិរង់ចាំថ្មីទាំង៦នេះ គឺដើម្បីរៀបចំរចនាសម្ព័ន្ធគ្រប់គ្រងភូមិឱ្យបានត្រឹមត្រូវ និងអនុលោមតាមសេចក្ដីណែនាំរបស់ក្រសួងមហាផ្ទៃ។ នេះបង្ហាញពីការយកចិត្តទុកដាក់របស់រាជរដ្ឋាភិបាលកម្ពុជា ចំពោះជនភៀសសឹក និងការប្តេជ្ញាចិត្តខ្ពស់ក្នុងការថែរក្សាអធិបតេយ្យភាព និងបូរណភាពទឹកដី។ ភូមិរង់ចាំនឹងបន្តជាទីជម្រកបណ្តោះអាសន្ន និងជាកន្លែងដែលពលរដ្ឋអាចរស់នៅដោយសេចក្តីថ្លៃថ្នូរ រង់ចាំដំណោះស្រាយប្រកបដោយយុត្តិធម៌។
តាមរយៈការបង្កើត និងប្រសិទ្ធនាម «ភូមិរង់ចាំ» នេះ រាជរដ្ឋាភិបាលកម្ពុជា បានបង្ហាញនូវជំហរដ៏រឹងមាំក្នុងការការពារបូរណភាពទឹកដី និងអធិបតេយ្យភាពជាតិ ព្រមទាំងផ្តល់ក្តីសង្ឃឹមដល់ប្រជាពលរដ្ឋដែលរងគ្រោះដោយសារសង្គ្រាម៕