(បរទេស)៖ ២ប្រកួត ដើម្បីបិទបញ្ចប់វគ្គ ៨ក្រុមនៅ FIFA World Cup 2026 នឹងបន្តធ្វើឡើងនាព្រឹកថ្ងៃអាទិត្យ ទី១២ ខែកក្កដាស្អែកនេះ (ម៉ោងនៅកម្ពុជា) គឺជាជំនួបរវាងតោកំណាចអង់គ្លេស និងន័រវែស នាម៉ោង ៤ព្រឹក មុនពេលម្ចាស់ការពារតំណែងជើងឯកអាហ្សង់ទីន ត្រូវប៉ះស្វីស លេងម៉ោង ៨ព្រឹក។

បារាំង អតីតក្រុមរងជើងឯកកាល ៤ឆ្នាំមុន និងអេស្ប៉ាញ ត្រូវប៉ះគ្នានៅវគ្គ ៤ក្រុមចុងក្រោយ បន្ទាប់ពីយកឈ្នះគូប្រកួតរៀងៗខ្លួនមានដូចជា ម៉ារ៉ុក និងប៊ែលហ្ស៊ិក ពីក្នុងវគ្គ ៨ក្រុមរួចមក។

តោកំណាចអង់គ្លេស ដែលបានឆ្លងចូលវគ្គចាញ់-ធ្លាក់ ៨ក្រុមនៅ World Cup ៣សម័យកាលចុងក្រោយជាប់ៗគ្នា ត្រូវប្រជែងកៅអីវគ្គ ៤ក្រុមទល់នឹងក្រុមនៅទ្វីបអឺរ៉ុបដូចគ្នា ន័រវែសដែលបានកំពុងឡើងជើងខ្លាំង និងឈានមកដល់វគ្គជ្រៅបែបនេះលើកដំបូងរបស់ពួកគេ គិតចាប់តាំងពីឆ្នាំ១៩៩៨។

ក្រុមឈ្នះនឹងឡើងវគ្គពាក់កណ្តាលផ្តាច់ព្រ័ត្រដែលត្រូវប៉ះរវាងក្រុមឈ្នះដូចគ្នាគឺ អាហ្សង់ទីន អតីតម្ចាស់ជើងឯក World Cup 2022 ឬក៏អឌ្ឍន៍ក្រហម ស្វីស នៅពេលបញ្ចប់វគ្គ ៨ក្រុមនាព្រឹកថ្ងៃអាទិត្យ។

គិតមកទល់ពេលនេះ World Cup 2026 ជំនាន់ទី២៣ ដែលរៀបចំនៅសហរដ្ឋអាមេរិក មិចស៊ិក និងកាណាដា បានបញ្ចប់ ៩៨ប្រកួតមកហើយ ក្នុងចំណោម ១០៤ប្រកួតសរុប ចាប់តាំងពីថ្ងៃទី១១ ខែមិថុនា ឆ្នាំ២០២៦ ដោយមាន ៤៨ប្រទេសចូលរួម និងមកពី ៦តំបន់ផងដែរ៕