(ព្រៃវែង)៖ លោកឧត្តមសេនីយ៍ឯក ធូ ឥដ្ឋិមា អគ្គនាយករងនៃអគ្គនាយកដ្ឋានភស្តុភារ និងហិរញ្ញវត្ថុ ក្រសួងមហាផ្ទៃ និងលោកស្រី សុីវ ចាន់ធូ អមដំណើរដោយ លោក សុខ រ៉ាវុធ ប្រធានសហភាពសហជីពជាតិខ្មែរ និងភរិយា នៅព្រឹកថ្ងៃទី១១ ខែ កក្កដា ឆ្នាំ២០២៦នេះ បានចុះចែកអំណោយជូនប្រជាពលរដ្ឋដែលជួបលំបាកក្រខ្សត់ និងចាស់ជរា នៅភូមិថ្នល់កែង ឃុំស្មោខាងជើង ស្រុកកំចាយមា ខេត្តព្រៃវែង ចំនួន ២៥០គ្រួសារ ព្រមទាំងបានរៀបចំអាហារពេលព្រឹកជូនប្រជាពលរដ្ឋក្រីក្រទាំងអស់។

នៅក្នុងឱកាសជួបសំណេះសំណាល និងចែកអំណោយនោះ លោក ឧត្តមសេនីយ៍ឯក ធូ ឥដ្ឋិមា និងលោកស្រី បានចែកជូនក្នុង ០១គ្រួសារទទួលបាន អង្ករ ១បាវ ២៥គីឡូក្រាម ទឹកត្រី ១យួរ ទឹកសុីអុីវ ១យួរ ព្រមទាំងជូនក្រមា សារុង និងថវិកាម្នាក់ៗ ចំនួន២០០០០រៀល។

បងប្អូនប្រជាពលរដ្ឋ មានចិត្តសប្បាយឥតឧបមា និងសូមថ្លែងអំណរគុណដល់លោកឧត្តមសេនីយ៍ឯក ធូ ឥដ្ឋិមា និងលោកស្រី ដែលបានចុះសួរសុខទុក្ខ និងចែកអំណោយដល់ពួកគាត់ផងដែរ៕