(ភ្នំពេញ)៖ លើសពីការប្តេជ្ញាចិត្តក្នុងការបម្រើសេវាសាធារណៈក្នុងវិស័យដីធ្លី ជូនប្រជាពលរដ្ឋរាជធានីភ្នំពេញឱ្យបានល្អ និងមានតម្លាភាព, នៅពេលនេះ លោក សារិន វណ្ណា ប្រធានមន្ទីររៀបចំដែនដី នគរូបនីយកម្ម និងសំណង់ តាមរយៈបណ្តាញទំនាក់ទំនងសង្គមផ្លូវការរបស់ខ្លួ​នបានប្រកាសថា នឹងប្រើប្រាស់ឆន្ទានុសិទ្ធិ ដែលលោកឧបនាយករដ្ឋមន្ត្រី សាយ សំអាន រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ផ្តល់ឱ្យលោក ចាត់ការលើមន្ទីររៀបចំដែនដីខេត្តណា ដែលបន្តទុកឱ្យប្រជាពលរដ្ឋជួបការលំបាក ក្នុងការទទួលសេវាសាធារណៈលើវិស័យដីធ្លី។

លោកឧបនាយរដ្ឋមន្ត្រី សាយ សំអាល់ បានសម្រេចឱ្យលោក សារិន វណ្ណា ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីរាជធានីភ្នំពេញ ដឹកនាំក្រុមការងារប្រតិបត្តិតាមបណ្តារាជធានី-ខេត្ត ដើម្បីសម្របសម្រួល និងជួយការងារ ដូចមានកំណត់ក្នុងប្រការ២ នៃសេចក្តីសម្រេចចុះថ្ងៃទី២៤ ខែមិថុនា ឆ្នាំ២០២៥ ដែលពាក់ព័ន្ធការប្រឆាំងអំពើពុករលួយរបស់ក្រសួងរៀបចំដែនដី។

លោក សារិន វណ្ណា បានបញ្ជាក់ក្នុងបណ្តញទំនាក់ទំនងសង្គមរបស់ខ្លួនថា «ក្រោយពីខ្ញុំសម្អាតផ្ទះនៅភ្នំពេញរួច និងយោងតាមអនុសាសន៍ណែនាំរបស់សម្តេចធិបតី និងឯកឧត្តម ឧបនាយករដ្ឋមន្ត្រី សាយ សំអាល់ សូមលោកប្រធានមន្ទីរដែនដីតាមខេត្ត ត្រូវខិតខំដោះស្រាយបញ្ហាក្នុងដែនសមត្ថកិច្ចឱ្យបានល្អជូនប្រជាពលរដ្ឋ ដោយសហការជាមួយអាជ្ញាធរដែនដី ដូចគំរូឯកឧត្តមអភិបាលរាជធានីភ្នំពេញ លើឯកសារកកស្ទះចំនួន ៩៧៣ករណី។ ប្រសិនបើអស់លោកជាប្រធានមន្ទីរ ដនសស ខេត្ត (រៀបចំដែនដី នគរូបនីយកម្ម សំណង់ និងសូរិយោដីខេត្ត) មិនយកចិត្តទុកដាក់លើការលំបាករបស់ប្រជាពលរដ្ឋ ក្នុងដែនសមត្ថកិច្ចរបស់ខ្លួន ខ្ញុំនឹងប្រើប្រាស់ឆន្ទានុសិទ្ធតាមការសម្រេចរបស់ក្រសួង រៀបចំដែនដីនគរូបនីយកម្ម និងសំណង់ ព្រោះបងប្អូនដែលលំបាកមានសំណើរ និងសំណូមពររួចហើយ គ្រប់បណ្តាខេត្ត ពិសេសសេវាសាធារណៈលើវិស័យដីធ្លី»។

សូមបញ្ជាក់ដែរថា កាលពីពេលថ្មីៗមកនេះ លោក សារិន វណ្ណា ប្រធានមន្ទីររៀបចំដែនដី នគរូបនីយកម្ម និងសំណង់រាជធានីភ្នំពេញ ទទួលបាននូវការសាទរយ៉ាងខ្លាំង តាមរយៈការប្តេជ្ញាចិត្តរបស់លោក ក្នុងការធ្វើឱ្យបានលើការលុបបំបាត់អំពើពុករលួយ និងបម្រើសេវាជូនប្រជាពលរដ្ឋប្រកបដោយយុត្តិធម៌ និងនីតិវិធីជាធរមាន។

បន្ថែមពីនេះ លោកបានបញ្ចេញនូវឯកសារមួយចំនួន ដើម្បីបញ្ជាក់បន្ថែមអំពីការធ្វើកំណែទម្រង់ថ្មី លើបរិបថការងារស្នើសុំសេវាសាធារណៈវិស័យដីធ្លី និងការកាត់បន្ថយរយៈពេលបង់ពន្ធប្រថាប់ត្រាផងដែរ៕