(បាត់ដំបង)៖ ដើម្បីធានាបាននូវសុវត្ថិភាព សន្តិសុខ និងសណ្តាប់ធ្នាប់សាធារណៈជូនដល់បងប្អូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិ ដែលមកកម្សាន្តក្នុងព្រឹត្តិការណ៍ «ពិព័រណ៍ផ្លែឈើខេត្តបាត់ដំបង» រយៈពេល ១០ ថ្ងៃ គណៈបញ្ជាការឯកភាពរដ្ឋបាលខេត្ត និងស្នងការដ្ឋាននគរបាលខេត្តបាត់ដំបង បានរៀបចំផែនការយ៉ាងហ្មត់ចត់ ដោយដាក់ពង្រាយកងកម្លាំងសរុបចំនួន ៣០០នាក់។

ឧត្តមសេនីយ៍ទោ ដាញ់ អេងប៊ុនចាន់ ស្នងការនគរបាល នៃស្នងការដ្ឋាននគរបាលខេត្តបាត់ដំបង បានប្រាប់អង្គភាពសារព័ត៌មាន Fresh News ថា ក្រោយពេលទទួលបានការណែនាំ និងការចង្អុលបង្ហាញពីលោក សុខ លូ អភិបាល នៃគណៈអភិបាលខេត្តបាត់ដំបង និងជាប្រធានគណៈបញ្ជាការឯកភាពខេត្ត កងកម្លាំងជំនាញបានរៀបចំផែនការសកម្មភាពយ៉ាងច្បាស់លាស់ ដោយបែងចែកកម្លាំងទៅតាមមុខព្រួញ និងទទួលខុសត្រូវខ្ពស់ រួមមាន៖

*បែងចែកជាកម្លាំងរៀបចំសណ្តាប់ធ្នាប់ ចរាចរណ៍ កម្លាំងការពារផ្ទាល់ និងកម្លាំងសម្ងាត់ ដើម្បីតាមដាន និងបង្ការបទល្មើសផ្សេងៗ

*កម្លាំងត្រូវបានពង្រាយនៅជុំវិញបរិវេណព្រឹត្តិការណ៍ទាំងមូល ជាពិសេសនៅតាមស្តង់ពិព័រណ៍ តំបន់ដំណើរកម្សាន្ត និងទីតាំងទស្សនាផ្សេងៗ

*ធានាការប្រចាំការ និងយាមល្បាត ២៤ម៉ោង លើ ២៤ម៉ោង ដើម្បីឆ្លើយតបបានទាន់ពេលវេលារាល់សភាពការណ៍នានា៕