(ភ្នំពេញ)៖ ដោយទទួលបានការអនុញ្ញាតនិងការគាំទ្រពេញទំហឹងពីសំណាក់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា និងជាសមាជិកអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា លោកស្រី ឃួន ភីរ៉ាដា អនុប្រធានក្រុមការងារស្ត្រីនៃគណៈកម្មាធិការគណបក្សប្រជាជនកម្ពុជា អគ្គលេខាធិការដ្ឋានរដ្ឋសភា នៅព្រឹកថ្ងៃទី១១ ខែកក្កដា ឆ្នាំ២០២៦នេះ បានដឹកនាំប្រតិភូក្រុមការងារស្ត្រី នាំយកអំណោយ ថវិកា និងសម្ភារប្រើប្រាស់ចាំបាច់មួយចំនួនចែកជូនកុមារ លោកគ្រូ និងអ្នកគ្រូ នៅមជ្ឈមណ្ឌលទារក និងកុមារជាតិ ស្ថិតនៅភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ ។

មានប្រសាសន៍នៅក្នុងឱកាសនោះលោកស្រី ឃួន ភីរ៉ាដា បានលើកឡើងថា វត្តមានក្រុមការងារស្ត្រីគណបក្សប្រជាជនកម្ពុជានៃអគ្គលេខាធិការដ្ឋានរដ្ឋសភា មកកាន់មជ្ឈមណ្ឌលទារកនិងកុមារជាតិនាឱកាសនេះ មិនត្រឹមតែជាការនាំមកនូវអំណោយសប្បុរសធម៌ប៉ុណ្ណោះទេ ប៉ុន្តែអ្វីដែលសំខាន់បំផុតនោះគឺបាននាំមកនូវការគោរព ការស្រឡាញ់ ស្មោះអស់ពីបេះដូង ជូនលោកគ្រូ អ្នកគ្រូ គណៈគ្រប់គ្រងមជ្ឈមណ្ឌល និងប្អូនៗ ក្មួយៗ កុមារទាំងអស់។

លោកស្រី បានបញ្ជាក់ថា អ្វីដែលសំខាន់បំផុតគឺបេះដូង ក្រុមការងារសូមថ្លែងការកោតសរសើរដោយស្មោះជូនគណៈគ្រប់គ្រងមជ្ឈមណ្ឌល លោកគ្រូ អ្នកគ្រូ ដែលបានខិតខំថែទាំកុមារគ្រប់បែបយ៉ាងដោយក្តីស្រឡាញ់ ស្មោះអស់ពីបេះដូង ប្រៀបដូចជាសាច់ឈាមរបស់ខ្លួនផ្ទាល់តែម្តង។ ការថែទាំកុមារដែលមានបញ្ហាសុខភាពមិនមែនជាការងាយស្រួលនោះទេ គឺទាមទារឱ្យមាននូវការស្រឡាញ់ដោយស្មោះស្ម័គ្រ និងការអត់ធ្មត់ជាទីបំផុត។ យើងខ្ញុំសូមកោតសរសើរចំពោះទឹកចិត្តលោកគ្រូ អ្នកគ្រូទាំងអស់ និងសូមផ្តល់ការស្រឡាញ់ ភាពកក់ក្តៅ ជូនកុមាររបស់យើងទាំងអស់ដែលកំពុងស្នាក់នៅទីនេះ។

សកម្មភាពមនុស្សធម៌របស់ក្រុមការងារស្ត្រីនៅក្នុងឱកាសនេះ បានទទួលការគាំទ្រ និងការលើកទឹកចិត្តពេញទំហឹងពីសំណាក់សម្តេចរដ្ឋសភាធិតី ឃួន សុដារី ដែលសម្តេចតែងតែយកចិត្តទុកដាក់លើសុខទុក្ខរបស់ស្ត្រី និងកុមារជាប់ជានិច្ច។ សម្តេចបានចូលរួមបំពេញសកម្មភាពមនុស្សធម៌នេះតាំងពីដើមរៀងមក ពិសេសក្នុងពេលដែលសម្តេចបានបំពេញការងារនៅកាកបាទក្រហមកម្ពុជា ក្រោមការដឹកនាំដ៏ខ្ពង់ខ្ពស់ផ្ទាល់របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចតែងតែយកចិត្តទុកដាក់ និងមិនដែលបោះបង់ស្ត្រី កុមារ ក៏ដូចជាប្រជាពលរដ្ឋកម្ពុជាទូទៅដែលត្រូវការជំនួយនោះឡើយ។

លោកស្រី ឃួន ភីរ៉ាដា បានគូសបញ្ជាក់ថា បេសកកម្មមនុស្សធម៌របស់ក្រុមចលនាស្ត្រីនៅក្នុងឱកាសនេះ គឺអនុវត្តតាមគំរូ និងមនសិការមនុស្សធម៌របស់ឥស្សរជនថ្នាក់ដឹកនាំទាំងអស់ ជាពិសេសគោលនយោបាយរបស់គណបក្សប្រជាជនកម្ពុជា ក្រោមការដឹកនាំរបស់សម្តេចតេជោ ហ៊ុន សែន ប្រធានគណបក្ស និងការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុនី ហ៊ុនម៉ាណែត ដោយសម្តេចនិងថ្នាក់ដឹកនាំទាំងអស់ តែងតែមានវត្តមាននៅពេលប្រជាពលរដ្ឋជួបការលំបាក ដោយមិនដែលបោះបង់ពលរដ្ឋណាម្នាក់ចោលនោះឡើយ។

សម្រាប់លោកស្រី ឃួន ភីរ៉ាដា នេះមិនមែនជាលើកទី១ទេ ដែលលោកស្រី បានអញ្ជើញមកដល់មជ្ឈមណ្ឌលនេះ និងបាននាំយកអំណោយសប្បុរសធម៌មកកាន់ទីនេះជាលក្ខណៈគ្រួសារ និងក្នុងនាមក្រុមការងារជាច្រើនលើកមកហើយ, ក្នុងមនោសញ្ចេតនាពោរពេញដោយក្តីស្រឡាញ់បំផុតជាមួយកុមារទាំងអស់នៅទីនេះ លោកស្រី បានបញ្ជាក់ថា វត្តមានរបស់ក្រុមការងារស្រ្តី គណបក្សប្រជាជនកម្ពុជា អគ្គលេខាធិការដ្ឋានរដ្ឋសភា នៅក្នុងឱកាសនេះ មិនមែននាំមកត្រឹមអំណោយមនុស្សធម៌នោះទេ គឺនាំយកបេះដូង និងការគោរពស្រឡាញ់ចំពោះកុមារៗ និងលោកគ្រូ អ្នកគ្រូ ព្រមទំាងបុគ្គលិកទាំងអស់របស់មជ្ឈមណ្ឌល។

សូមជម្រាបថា អំណោយសប្បុរសធម៌ ដែលក្រុមការងារស្ត្រីគណបក្សប្រជាជនកម្ពុជា អគ្គលេខាធិការដ្ឋានរដ្ឋសភានាំទៅចែកជូនមជ្ឈមណ្ឌល ក៏ដូចជាកុមារ និងទារកនៅក្នុងឱកាសនេះ រួមមានសម្ភារប្រើប្រាស់ចាំបាច់ប្រចាំថ្ងៃ គ្រឿងឧបភោគបរិភោគ អាហារូបត្ថម្ភ និងថវិកា ដែលសរុបជាទឹកប្រាក់មានចំនួនជាង ១៥លានរៀល។ ថវិកាទាំងអស់នេះបានមកពីការឧបត្ថម្ភគាំទ្ររបស់សម្តេចមហារដ្ឋសភាធិការធិបតី ឃួន សុដារី និងការបរិច្ចាគនូវថវិកាផ្ទាល់ខ្លួនរបស់ក្រុមការងារស្ត្រី ព្រមទាំងការចូលរួមរបស់ថ្នាក់ដឹកនាំ សមាជិក សមាជិកា គណបក្សប្រជាជនកម្ពុជាគណៈកម្មាធិការអគ្គលេខាធិការដ្ឋានរដ្ឋសភាផងដែរ៕⁩