(កំពង់ធំ)៖ លោក ថាំង វីយុទ្ធដា ប្រធានក្រុមការងារចុះមូលដ្ឋានឃុំបន្ទាយស្ទោង បានបន្តសកម្មភាពចុះជួបសំណេះសំណាលជាមួយប្រជាពលរដ្ឋ និងដោះស្រាយសំណូមពរនានា ក្នុងឱកាសដែលលោកបានដឹកនាំកិច្ចប្រជុំជាមួយ ក្រុមការងារបក្ស សមាជិក សមាជិកា សរុបប្រមាណ ២២០នាក់ នៅក្នុងភូមិឈើទាល ឃុំបន្ទាយស្ទោង ស្រុកស្ទោង ខេត្តកំពង់ធំ។

នៅក្នុងជំនួបនោះ លោកប្រធានក្រុមការងារបានពាំនាំនូវប្រសាសន៍សាកសួរសុខទុក្ខដោយក្តីនឹករលឹកពីសំណាក់រដ្ឋមន្ត្រី ថោ ជេដ្ឋា ជូនដល់អង្គប្រជុំ ព្រមទាំងបានណែនាំឱ្យក្រុមការងារគ្រប់លំដាប់ថ្នាក់ បន្តពង្រឹងស្មារតីទទួល ខុសត្រូវ ភាពបុរេសកម្ម និងចុះជាប់ផ្ទាល់ជាមួយប្រជាពលរដ្ឋ ដើម្បីដោះស្រាយតម្រូវការបានទាន់ពេល។ លោកបានគូសបញ្ជាក់ថា ការបម្រើប្រជាពលរដ្ឋដោយស្មោះត្រង់ សាមគ្គីភាពផ្ទៃក្នុង និងប្រសិទ្ធភាពការងារ គឺជាកត្តាស្នូលក្នុងការជំរុញជំនឿទុកចិត្តលើគណបក្ស។

ទន្ទឹមនឹងនេះ កិច្ចប្រជុំក៏បានដាក់ចេញទិសដៅការងារខែកក្កដា ឆ្នាំ២០២៦ ដោយផ្តោតលើការដោះស្រាយបញ្ហាប្រឈម ពង្រឹងសមត្ថភាពក្រុមការងារ និងបង្កើនប្រសិទ្ធភាពទំនាក់ទំនងជាមួយប្រជាពលរដ្ឋ ដើម្បីដណ្តើមប្រៀបឈ្នះសម្រាប់ការបោះឆ្នោតខាងមុខ។ ដើម្បីឆ្លើយតបទៅនឹងតម្រូវការជាក់ស្តែងរបស់មូលដ្ឋាន លោកប្រធានក្រុមការងារបានសម្រេចទទួលយកសំណូមពររបស់បងប្អូនសមាជិកបក្សភូមិឈើទាល ក្នុងការជួយជួសជុលផ្លូវក្រាលគ្រួសក្រហមប្រវែង ៦០០ម៉ែត្រ និងបានឧបត្ថម្ភថវិកាបន្ថែម ដើម្បីបង្គ្រប់ការសាងសង់បង្គន់អនាម័យនៅក្នុងបរិវេណវត្តពោធិរោង។

ជាមួយគ្នានេះដែរ លោកប្រធានក្រុមការងារក៏បាននាំយកអំណោយឧបត្ថម្ភ និងថវិកាចែកជូនដល់គ្រួសារសមាជិកបក្សដែលមានតម្រូវការជួយសង្គ្រោះបន្ទាន់ រួមមាន៖ គ្រួសារសម្រាលកូនភ្លោះ គ្រួសារទីទ័លក្រគ្មានទីពឹងចំនួន ០៥គ្រួសារ វីរកងទ័ពជួរមុខ និងស្ត្រីទើបកូនខ្ចី។ សកម្មភាពចុះមូលដ្ឋាននាឱកាសនេះ បានប្រព្រឹត្តទៅក្នុងបរិយាកាសស្និទ្ធស្នាល សាមគ្គីភាព និងទទួលបានលទ្ធផលផ្លែផ្កាយ៉ាងត្រចះត្រចង់ ស្របតាមគោលដៅរួមក្នុងការបម្រើផលប្រយោជន៍ប្រជាពលរដ្ឋ និងជំរុញការអភិវឌ្ឍមូលដ្ឋានឃុំបន្ទាយស្ទោង ឱ្យកាន់តែរីកចម្រើនបន្ថែមទៀត៕