(កំពង់ឆ្នាំង)៖ លោកស្រីចរណាភិរ័ក្ខសិរីសទ្ធា ទិត មាលា ញាណ ឡេង និងក្រុមគ្រួសារ រួមញាតិព្រះធម៌ នាព្រឹកថ្ងៃទី១១ ខែកក្កដា ឆ្នាំ២០២៦នេះ បាននាំយកទេយ្យទាន បច្ច័យ និងទៀនចំណាំព្រះវស្សា ប្រគេនដល់ព្រះសង្ឃគង់ចាំព្រះវស្សាចំនួន ២១វត្តក្នុង ស្រុករលាប្អៀរ និងក្រុងកំពង់ឆ្នាំង ខេត្តកំពង់ឆ្នាំង។

ពិធីនេះក៏មានការនិមន្តចូលរួមពីព្រះធម្មវនវាសីបណ្ឌិត ចន្ទមុនី ព្រះសមុហ៍គណខេត្ត និងព្រះសិរីមង្គលមុនី ម៉ុច សៅលី ព្រះចៅអធិកាវត្តសម្តេច នន្ទ ង៉ែត សែនជ័យសត្ថារាម និងមានការចូលរួមពីព្រះសង្ឃ និងពុទ្ធបរិស័ទជាច្រើននាក់ទៀត ដែលបានប្រារព្ធធ្វើឡើងនៅវត្តក្រឡាញ់ចាស់។

ពិធីបុណ្យប្រគេនទៀនចំណាំព្រះវស្សា និងទេយ្យទាន បច្ច័យដល់ព្រះសង្ឃនាពេលនេះ ដើម្បីឧទ្ទិសកុសលជូនចំពោះលោក ញាណ ឡេង ព្រមទាំង មាតា បិតា ជីដូន ជីតា ញាតិការទាំងប្រាំពីរ សណ្តាន ដែលបានចែកឋានទៅហើយនោះ។

ទេយ្យទាន និងបច្ច័យ ដែលបានប្រគេនចំពោះព្រះសង្ឃក្នុង ១វត្តៗ រួមមាន៖ អង្ករ ១បាវ ទឹកសុទ្ធ ២កេស ទឹកផ្លែឈើ ២កេស មី ២កេស ខ្ទឹមស ២គីឡូក្រាម ប៊ីចេង ១គីឡូក្រាម អំបិល ២គីឡូក្រាម ស្ករស ២គីឡូក្រាម ទឹកត្រី ២យួរ ទឹកសុីអុីវ ២យួរ តែ ១កញ្ចប់ ធូប ១ដុំ កាហ្វេ ២កញ្ចប់ ប្រេងឆា ១ដប ត្រីខ ២យួរ ទាន ១គូរ ស្លាដក ១ និងថវិកា ៣០ម៉ឺនរៀល ផងដែរ។

សូមបញ្ជាក់ដែរថា តាមទំនៀមទំលាប់ជាប្រពៃណីនៃព្រះពុទ្ធសាសនា ព្រះសង្ឃទាំងឡាយគ្រប់អារាម ក្នុងព្រះរាជាណាចក្រកម្ពុជា ត្រូវនិមន្តចូលកាន់ព្រះវស្សា អស់ថេរវេលា ៣ខែ ចាប់ពីថ្ងៃ១រោច ខែអាសាឍ តទៅ។ ពាក្យថា (វស្សា) ប្រែថា (ភ្លៀង ឬរដូវភ្លៀង) ដែលមានកំណត់រយៈពេល៣ខែ រាប់ពីថ្ងៃ ១រោច ខែអាសាឍ ដល់ថ្ងៃ១៥កើត ខែកត្តិក។

ក្នុងរយៈពេល៣ខែនេះ នៅគ្រប់ព្រះវិហារទាំងឡាយ តែងរក្សាភ្លើងទៀនព្រះវស្សាធ្វើពីក្រមួនឲ្យឆេះជានិច្ច តែបច្ចុប្បន្ននេះដោយសាក្រមួនពុំសូវសំបូរគេនិយមគេប្រើប្រេងជំនួសវិញ។ ជួនកាលមានព្រះសង្ឃខ្លះ ពុំបានចូលព្រះវស្សា តាមកំណត់កាលវេលា ៣ខែ ដោយមានធុរៈអ្វីមួយ ឬដោយរោគាពាធិនោះ លោកអាចចូលបច្ឆិមិកវស្សាបាន គឺលោកចូលនៅថ្ងៃ១រោជ ខែស្រាពហើយត្រូវគិតវស្សាឲ្យគ្រប់៣ខែ ដូចព្រះសង្ឃ ដែលចូលមុនគឺត្រូវចេញវិញ នៅថ្ងៃ១រោជ ខែកត្តិក៕