(កោះកុង)៖ លោក អ៊ូច ទូច ត្រូវបានប្រកាសតែងតាំងជាផ្លូវការចូលកាន់មុខតំណែងជានាយករដ្ឋបាលខេត្តកោះកុង កាលពីរសៀលថ្ងៃទី១០ ខែកក្កដា ឆ្នាំ២០២៦ នៅសាលមហោស្រពខេត្ត។ ការតែងតាំងនេះធ្វើឡើងដើម្បីជំនួសលោក លឹម សាវ៉ាន់ ដែលត្រូវបានផ្លាស់ប្តូរទៅបម្រើការងារនៅក្រសួងមហាផ្ទៃ។

ពិធីប្រកាសចូលកាន់មុខតំណែងថ្មីនេះ បានប្រព្រឹត្តទៅក្រោមអធិបតីភាពលោក ថុង ណារុង ប្រធានក្រុមប្រឹក្សាខេត្ត និងលោកស្រី ឈី វ៉ា អភិបាលខេត្តកោះកុង ព្រមទាំងមានការចូលរួមពីតំណាងមន្ទីរ អង្គភាពពាក់ព័ន្ធជាច្រើនរូបទៀត។

ក្នុងឱកាសនោះ លោកស្រី ឈី វ៉ា អភិបាលខេត្តកោះកុង បានធ្វើការណែនាំយ៉ាងយកចិត្តទុកដាក់ដល់លោកនាយករដ្ឋបាលថ្មី ឲ្យគិតគូរដោះស្រាយរាល់បញ្ហាប្រឈមនានា ដែលជាសេចក្តីត្រូវការរបស់ប្រជាពលរដ្ឋ។ លោកស្រីបានសង្កត់ធ្ងន់លើការបម្រើសេវាសាធារណៈជូនប្រជាពលរដ្ឋឲ្យបានលឿន រហ័ស មានតម្លាភាព និងប្រកបដោយទំនុកចិត្ត ដើម្បីឆ្លើយតបទៅនឹងគោលនយោបាយរបស់រាជរដ្ឋាភិបាល អាណត្តិទី៧ ដែលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

លោកស្រីក៏បានបន្តថា ក្នុងនាមជានាយករដ្ឋបាល លោក អ៊ូច ទូច គឺជាសេនាធិការដ៏សំខាន់ជូនគណៈអភិបាលខេត្ត និងគ្រប់ក្រុង ស្រុក ក្នុងការដាក់ចេញដីកាឲ្យបានឆាប់រហ័ស និងត្រូវពិនិត្យលទ្ធភាពក្នុងការលើកលែង ឬកំណត់តម្លៃសេវាទាបបំផុត ទៅតាមស្ថានភាពជីវភាពរបស់ប្រជាពលរដ្ឋក្នុងមូលដ្ឋាន។ លើសពីនេះ លោកស្រីបានជំរុញឲ្យមានការសហការគ្នាគ្រប់លំដាប់ថ្នាក់ ដើម្បីស្វែងរកដំណោះស្រាយបញ្ហាឲ្យទាន់ពេលវេលា។

ជាការឆ្លើយតប លោក អ៊ូច ទូច នាយករដ្ឋបាលថ្មី បានប្តេជ្ញាចិត្តយ៉ាងមុតមាំថា លោកនឹងខិតខំយកចិត្តទុកដាក់ឲ្យអស់ពីកម្លាំងកាយចិត្ត ចំណេះដឹង និងបទពិសោធន៍ការងារ ដើម្បីបម្រើប្រជាពលរដ្ឋប្រកបដោយទំនួលខុសត្រូវខ្ពស់។ លោកក៏បានសន្យារក្សាភាពផ្ទៃក្នុងឲ្យបានល្អ លើកកម្ពស់ស្មារតីមន្ត្រីក្រោមឱវាទ និងផ្តល់សេវាសាធារណៈជូនប្រជាពលរដ្ឋឲ្យបានឆាប់រហ័ស ដោយអនុវត្តតាមការណែនាំ និងការចង្អុលបង្ហាញរបស់ថ្នាក់ដឹកនាំខេត្ត ព្រមទាំងគោរពអនុវត្តតាមគោលនយោបាយរបស់រាជរដ្ឋាភិបាលជានិច្ច។ ការប្តេជ្ញាចិត្តនេះ ឆ្លុះបញ្ចាំងពីការត្រៀមខ្លួនរួចជាស្រេចរបស់លោកក្នុងការរួមចំណែកអភិវឌ្ឍខេត្តកោះកុងឲ្យកាន់តែរីកចម្រើន៕