(បន្ទាយមានជ័យ)៖ សាកលវិទ្យាល័យធំៗចំនួន៣ នៅក្នុងសាធារណរដ្ឋសង្គមនិយមវៀតណាម បានប្រកាសផ្តល់អាហារូបករណ៍សិក្សាដោយឥតគិតថ្លៃ ជូនដល់សិស្សនិស្សិតដែលមានបំណងចង់បន្តការសិក្សានៅប្រទេសវៀតណាម ជាពិសេសសម្រាប់សិស្សានុសិស្សនៅក្នុងខេត្តបន្ទាយមានជ័យ។ ដំណឹងនេះ ត្រូវបានប្រកាសឡើងក្នុងជំនួបពិភាក្សារវាងថ្នាក់ដឹកនាំខេត្តបន្ទាយមានជ័យ និងគណៈប្រតិភូសាកលវិទ្យាល័យវៀតណាម។

ជំនួបនេះ ដឹកនាំដោយលោកបណ្ឌិត អ៉ី លីម៉ា សាកលវិទ្យាធិការ សាកលវិទ្យាល័យចេនឡា រួមជាមួយថ្នាក់ដឹកនាំសាកលវិទ្យាល័យទាំង៣ មកពីប្រទេសវៀតណាម រួមមាន៖ សាកលវិទ្យាល័យបច្ចេកវិទ្យាព័ត៌មាន (University of Information Technology) សាកលវិទ្យាល័យសេដ្ឋកិច្ច និងច្បាប់ (University of Economics and Law) និងសាកលវិទ្យាល័យវិទ្យាសាស្ត្រសុខាភិបាល (University of Health Sciences)។ គោលបំណងសំខាន់នៃកិច្ចសហការនេះ គឺដើម្បីចូលរួមលើកកម្ពស់ធនធានមនុស្ស ក៏ដូចជាវិស័យអប់រំនៅកម្ពុជា។

ក្នុងឱកាសនោះ លោក អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ បានថ្លែងអំណរគុណយ៉ាងជ្រាលជ្រៅចំពោះសាកលវិទ្យាល័យទាំង៣ ដែលបានផ្តល់ឱកាសដ៏មានតម្លៃនេះ ដល់និស្សិតខេត្តបន្ទាយមានជ័យ។ លោកអភិបាលខេត្តបានគូសបញ្ជាក់ថា នេះជាចំណែកមួយយ៉ាងសំខាន់ក្នុងការបណ្តុះបណ្តាលធនធានមនុស្សនៅកម្ពុជា និងក្នុងខេត្តបន្ទាយមានជ័យផ្ទាល់។ លោកក៏បានលើកឡើងពីទំនាក់ទំនងដ៏ល្អប្រសើរ និងស្អិតរមួតរវាងប្រទេសកម្ពុជា-វៀតណាម ដែលតែងតែជួយជ្រោមជ្រែងគ្នាទៅវិញទៅមក។

តំណាងសាកលវិទ្យាល័យទាំង៣ ក៏បានបង្ហាញពីឆន្ទៈក្នុងការចូលរួមអភិវឌ្ឍធនធានមនុស្សនៅកម្ពុជា ដោយបញ្ជាក់ថា ប្រសិនបើមានតម្រូវការ សាកលវិទ្យាល័យអាចនឹងមកបង្រៀនផ្ទាល់នៅខេត្តបន្ទាយមានជ័យ ឬនិស្សិតអាចទៅសិក្សានៅប្រទេសវៀតណាម។ ជាពិសេសសម្រាប់វិស័យសុខាភិបាល សាកលវិទ្យាល័យសុខាភិបាលបានស្វាគមន៍ជានិច្ចចំពោះកិច្ចសហការជាមួយរដ្ឋបាលខេត្ត និងផ្តល់ឱកាសឱ្យនិស្សិតទៅសិក្សា ឬអនុវត្តផ្ទាល់នៅមន្ទីរពេទ្យក្នុងទីក្រុងហូជីមិញ។ ដើម្បីពង្រឹងកិច្ចសហប្រតិបត្តិការបន្ថែម សាកលវិទ្យាល័យទាំង៣ ក៏នឹងរៀបចំដំណើរទស្សនកិច្ចជូនថ្នាក់ដឹកនាំខេត្តបន្ទាយមានជ័យ ដើម្បីស្វែងយល់បន្ថែមពីដំណើរការសិក្សា និងការគ្រប់គ្រងនិស្សិតរបស់ពួកគេ។ កិច្ចសហការនេះនឹងរួមចំណែកយ៉ាងសំខាន់ក្នុងការអភិវឌ្ឍគុណភាពអប់រំ និងធនធានមនុស្សសម្រាប់អនាគតកម្ពុជា៕