(បន្ទាយមានជ័យ)៖ នៅព្រឹកថ្ងៃសៅរ៍ ទី១១ ខែកក្កដា ឆ្នាំ២០២៦នេះ សាលាទំនើបអន្តរជាតិ បានរៀបចំពិធីសម្ពោធជាផ្លូវការនូវសាខាថ្មីរបស់ខ្លួនក្នុងខេត្តបន្ទាយមានជ័យ ក្រោមអធិបតីភាពលោក យឹម សំណាង អភិបាលរង នៃគណៈអភិបាលខេត្តបន្ទាយមានជ័យ។

ពិធីនេះក៏មានការអញ្ជើញចូលរួមពីថ្នាក់ដឹកនាំខេត្ត ក្រុង មន្ទីរអប់រំ យុវជន និងកីឡា ព្រមទាំងស្ថាបនិក និងនាយកប្រតិបត្តិនៃសាលាទំនើបអន្តរជាតិ លោក រស់ សាវីតធី និងលោក ព្រំ បញ្ញា រួមជាមួយអាជ្ញាធរមូលដ្ឋាន សិស្សានុសិស្ស និងអាណាព្យាបាលជាច្រើនរូប។

ទីតាំងថ្មីនៃសាលាទំនើបអន្តរជាតិ សាខាខេត្តបន្ទាយមានជ័យនេះ ស្ថិតនៅផ្លូវលេខ២ (អតីតផ្ទះសំណាក់ បញ្ញា) ភូមិសូភី សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។ ការពង្រីកសាខាបន្ថែមនេះ គឺដើម្បីឆ្លើយតបទៅនឹងសន្ទុះកំណើននៃការគាំទ្រយ៉ាងខ្លាំងក្លាពីសំណាក់មាតាបិតា អាណាព្យាបាល ដែលមានបំណងចង់ឲ្យបុត្រធីតារបស់ខ្លួនទទួលបានការអប់រំប្រកបដោយគុណភាពខ្ពស់។

ថ្លែងក្នុងឱកាសនោះ លោក រស់ សាវីតធី សហស្ថាបនិក និងជានាយកប្រតិបត្តិនៃសាលាទំនើបអន្តរជាតិ បានលើកឡើងថា បច្ចុប្បន្នក្នុងឆ្នាំសិក្សា២០២៥-២០២៦ សាលាទំនើបអន្តរជាតិ មានសាខាចំនួន១០ មានសិស្សសរុប ៣៧០០នាក់ និងបុគ្គលិកបង្រៀន និងមិនបង្រៀនចំនួន ៤០១នាក់។ ដើម្បីបន្តបំពេញតម្រូវការអប់រំ សម្រាប់ឆ្នាំសិក្សាថ្មី២០២៦-២០២៧ សាលាកំពុងពង្រីកទីតាំងបន្ថែមចំនួន ៣សាខាទៀត រួមមាន សាខាព្រែកលៀប និងសាខាចំការដូងនៅរាជធានីភ្នំពេញ និងសាខាខេត្តបន្ទាយមានជ័យនេះ ដែលធ្វើឲ្យសាលាមានសាខាសរុបចំនួន ១៣។

លោក រស់ សាវីតធី ក៏បានបញ្ជាក់ផងដែរថា សាលាទំនើបអន្តរជាតិ ទទួលសិស្សឲ្យចូលរៀនចាប់ពីមត្តេយ្យកម្រិតទាប (អាយុចាប់ពី ៣ឆ្នាំឡើង) រហូតដល់ថ្នាក់ទី១២ ដោយផ្តល់កម្មវិធីសិក្សាពេញមួយថ្ងៃនៅសាលា។ កម្មវិធីសិក្សារួមមានកម្មវិធីជាតិមួយវេន និងកម្មវិធីសិក្សាទំនើបមួយវេន ដែលមានមុខវិជ្ជាសំខាន់ៗចំនួន ៩ រួមមាន ភាសាអង់គ្លេស ភាសាចិន កុំព្យូទ័រ គណិតវិទ្យាជាភាសាអង់គ្លេស វិទ្យាសាស្ត្រជាភាសាអង់គ្លេស រ៉ូបូស៊ីង រ៉ូបូទិក និងថេចបត់ (មុខវិជ្ជាបែបស្ទែម) វេយ្យាករណ៍អង់គ្លេស គំនូរ និងអប់រំកាយ និងកីឡា។

ជាការឆ្លើយតប លោក យឹម សំណាង អភិបាលរងខេត្ត បានសម្តែងការកោតសរសើរ និងសាទរយ៉ាងខ្លាំងចំពោះវត្តមានរបស់សាលាទំនើបអន្តរជាតិនៅក្នុងខេត្តបន្ទាយមានជ័យ។ លោកបានសង្កត់ធ្ងន់ថា នេះគឺជាការរួមចំណែកដ៏សំខាន់មួយក្នុងការបណ្តុះបណ្តាលធនធានមនុស្ស ដែលជាទំពាំងស្នងឫស្សី ផ្តោតលើវិស័យអប់រំ។

លោកបន្តថា សាលាទំនើបអន្តរជាតិ ជាគ្រឹះស្ថានឯកជនមួយដែលមានចក្ខុវិស័យ និងបេសកកម្មច្បាស់លាស់ក្នុងការបណ្តុះបណ្តាលធនធានមនុស្សប្រកបដោយចតុស្តម្ភអប់រំ ដែលស្របទៅនឹងគោលដៅអប់រំមួយក្នុងចំណោមយុទ្ធសាស្ត្របញ្ចកោណរបស់រាជរដ្ឋាភិបាលនីតិកាលទី៧នេះផងដែរ៕