(ភ្នំពេញ)៖ លោក សារិន វណ្ណា ប្រធានមន្ទីររៀបចំដែនដី នគរូបនីយកម្ម និងសំណង់ នៅថ្ងៃទី១១​ ខែកក្កដា ឆ្នាំ២០២៦នេះ បានបង្ហើបឱ្យដឹងថា ក្រុមការងារឌីជីថលរបស់មន្ទីររៀបចំដែនដីរាជធានីភ្នំពេញ បាននិងកំពុងសិក្សាអំពីការផ្តល់សេវាសាធារណៈលើវិសយ័ដីធ្លី ដែលកកស្ទះទូទាំងប្រទេស។

តាមរយៈបណ្តាញទំនាក់ទំនងសង្គមផ្លូវការ លោក សារិន វណ្ណា បានបញ្ជាក់ដូច្នេះថា «ក្រុមការងារបរិវត្តកម្មឌីជីថល របស់មន្ទីររៀបចំដែនដីរាជធានីភ្នំពេញ បាននិងកំពុងសិក្សាអំពីការផ្តល់សេវាសាធារណៈលើវិសយ័ដីធ្លី ដែលមានការកកស្ទះទូទាំងប្រទេស តាមរយៈការផ្តល់ព័ត៌មានរបស់បងប្អូនប្រជាពលរដ្ឋ ដែលរងទុក្ខលំបាកផ្សេងៗ ក្នុងជីវភាពរស់នៅដោយស្របច្បាប់ និងមិនបានទទួលនូវសេវាគាប់ចិត្តដោយហេតុផលផ្សេងៗ»។

ថ្លែងប្រាប់លោក លឹម ជាវុត្ថា អគ្គនាយកបណ្តាញព័ត៌មាន Fresh News នៅថ្ងៃទី១១ ខែកក្កដា ឆ្នាំ២០២៦នេះ លោក សារិន វណ្ណា បានបញ្ជាក់ថា ក្រោយពីក្រុមការងារផ្នែកឌីជីថលរបស់មន្ត្រីរៀបចំដែនដីរាជធានីភ្នំពេញ ប្រមូលព័ត៌មានពីភាពលំបាករបស់ប្រជាពលរដ្ឋពាក់ព័ន្ធនឹងសេវាសាធារណៈលើវិស័យដីធ្លីរួចរាល់លោកនឹងបញ្ចេញក្តីលំបាកនោះជាសាធារណៈនៅលើបណ្តាញផ្សព្វផ្សាយ និងបណ្តាញសង្គម។

លោកអះអាងថា កិច្ចការងារនេះលោកនឹងដោះស្រាយទុុក្ខលំបាករបស់ប្រជាជនឱ្យបាន។

សូមជម្រាបថា លោក សារិន វណ្ណា ប្រធានមន្ទីររៀបចំដែនដី នគរូបនីយកម្ម និងសំណង់ នៅថ្ងៃទី១០ ខែកក្កដា ឆ្នាំ២០២៦ បានប្រកាសថានឹងប្រើប្រាស់ឆន្ទានុសិទ្ធិ ដែលលោកឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ផ្តល់ឱ្យលោក ចាត់ការលើមន្ទីររៀបចំដែនដីខេត្តណា ដែលបន្តទុកឱ្យប្រជាពលរដ្ឋជួបការលំបាក ក្នុងការទទួលសេវាសាធារណៈលើវិស័យដីធ្លី។

ដោយឡែកនាពេលថ្មីៗមកនេះ លោកទទួលបាននូវការសាទរយ៉ាងខ្លាំង តាមរយៈការប្តេជ្ញាចិត្តរបស់លោក ក្នុងការធ្វើឱ្យបានលើការលុបបំបាត់អំពើពុករលួយ និងបម្រើសេវាជូនប្រជាពលរដ្ឋប្រកបដោយយុត្តិធម៌ និងនីតិវិធីជាធរមាន។ លោកបានបញ្ចេញនូវឯកសារមួយចំនួន ដើម្បីបញ្ជាក់បន្ថែមអំពីការធ្វើកំណែទម្រង់ថ្មី លើបរិបថការងារស្នើសុំសេវាសាធារណៈវិស័យដីធ្លីផងដែរ៕