(ស្វាយរៀង)៖ មន្ទីរបរិស្ថានខេត្តស្វាយរៀង បាននាំយកកូនឈើចំនួន ៤៥០០ ដើម ចូលរួមពិព័រណ៍ «ពន្លកបៃតង» ដែលរៀបចំឡើងនៅមុខក្រសួងបរិស្ថាន ចាប់ពីថ្ងៃទី១០ ដល់ថ្ងៃទី១៣ ខែកក្កដា ឆ្នាំ២០២៦។

ពិព័រណ៍ «ពន្លកបៃតង» ត្រូវបានរៀបចំឡើង ដើម្បីលើកកម្ពស់ការដាំដុះដើមឈើ និងការយល់ដឹងអំពីសារៈសំខាន់នៃបរិស្ថានបៃតង។

នៅក្នុងឱកាសតាំងពិព័រណ៍ «ពន្លកបៃតង» នេះ លោក ចាន់ ឈន់ ប្រធានមន្ទីរបរិស្ថានខេត្តស្វាយរៀង បានបង្ហាញអារម្មណ៍សប្បាយរីករាយយ៉ាងខ្លាំង ដែលបានឃើញបងប្អូនប្រជាពលរដ្ឋយ៉ាងច្រើនកុះករ បានអញ្ជើញមកទទួលយកកូនឈើដោយឥតគិតថ្លៃ។ លោកបានបញ្ជាក់ថា នេះជាគំនិតផ្ដួចផ្ដើមដ៏ល្អរបស់លោករដ្ឋមន្ត្រីក្រសួងបរិស្ថាន ដែលបានជំរុញឲ្យមានការចែកកូនឈើដល់សាធារណជន។

មន្ទីរបរិស្ថានខេត្តស្វាយរៀង បានរួមចំណែកយ៉ាងសកម្មជាមួយក្រសួងបរិស្ថាន ក្នុងការរៀបចំការតាំងពិព័រណ៍នេះ ក៏ដូចជាការចែកជូនកូនឈើដល់ប្រជាពលរដ្ឋដោយឥតគិតថ្លៃ ដើម្បីចូលរួមចំណែកក្នុងការបង្កើនគម្របព្រៃឈើ និងលើកកម្ពស់គុណភាពបរិស្ថាននៅកម្ពុជា។ លោកប្រធានមន្ទីរបានបន្តថា សម្រាប់បងប្អូនប្រជាពលរដ្ឋដែលមិនបានអញ្ជើញមកទទួលកូនឈើដោយផ្ទាល់នៅរាជធានីភ្នំពេញ ជាពិសេសពលរដ្ឋនៅខេត្តស្វាយរៀង អាចអញ្ជើញទៅទទួលកូនឈើនៅមន្ទីរបរិស្ថានខេត្តស្វាយរៀងបានផងដែរ។

ជាមួយគ្នានេះ លោក ចាន់ ឈន់ ក៏បានសំណូមពរដល់ប្រជាពលរដ្ឋទាំងអស់ដែលបានមកទទួលយកកូនឈើនៅថ្ងៃនេះ សូមមេត្តាជួយយកទៅដាំដុះឲ្យបានគ្រប់ៗគ្នា និងថែទាំឲ្យបានល្អ ដើម្បីរួមចំណែកលើកកម្ពស់គុណភាពបរិស្ថាន និងបង្កើនគម្របព្រៃឈើឲ្យបានកាន់តែច្រើនបន្ថែមទៀត ដែលជាប្រយោជន៍ដ៏ធំធេងសម្រាប់មនុស្សជាតិ និងភពផែនដីទាំងមូល៕