(កំពង់ឆ្នាំង)៖ ថ្លែងក្នុងពិធីព្រលែងកូនត្រីក្នុងខេត្តកំពង់ឆ្នាំង លោកបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ទទួលបន្ទុកបេសកកម្មពិសេស ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង បានអំពាវនាវដល់ប្រជាសហគមន៍ទាំងអស់ត្រូវចូលរួមថែរក្សាធនធានជលផលឲ្យបានគង់វង្សយូរអង្វែង និងកុំប្រើប្រាស់ឧបករណ៍នេសាទទាំងឡាយណា ដែលច្បាប់ហាមឃាត់ ដូចជា ការឆក់ត្រី,ការបំពុលដោយសារធាតុគីមី,ឬការប្រើប្រាស់មងក្រឡាល្អិតៗវាអាចបំផ្លាញពូជត្រីតូចៗនិងស៊ុតត្រី ដែលធ្វើឲ្យធនធានជលផលកាន់តែរីងស្ងួតទៅៗ។

ការអំពាវនាវនេះ ធ្វើឡើង នៅក្នុងចំពិធីព្រលែងប្រភេទត្រីមេពូជ ក្នុងស្រុក និងកូនត្រីចម្រុះចំនួនជាង២០ម៉ឺនក្បាល កូនបង្កងជាង៣ម៉ឺនក្បាល និងពូជអន្ទង់មួយចំនួន ក្នុងនោះមានទាំងប្រភេទធនធានជលផ លកំពុងរងគ្រោះដូចជាត្រីគល់រាំង,ត្រីរាជ្យ,និងត្រីដំរីជាច្រើនទៀត នាថ្ងៃទី១១ ខែកក្កដា ឆ្នាំ២០២៦នេះ នៅខេត្តកំពង់ឆ្នាំង ដែលរៀបចំឡើងដោយមន្ទីរកសិកម្ម រុក្ខាប្រមាញ់ និងនេសាទខេត្ត។ ពិធីនេះបានប្រព្រឹត្តទៅនៅចំណុចបឹងឈ្វាំង ស្ថិតក្នុងឃុំរលាប្អៀរ ស្រុករលាប្អៀរ ក្រោមអធិបតីភាពលោកបណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ទទួលបន្ទុកបេសកកម្មពិសេស ប្រធានក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង និងក្រុមការងាររាជរដ្ឋាភិបាល និងដោយមានការអញ្ជើញចូលរួមពីលោក-លោកស្រី អ្នកតំ ណាងរាស្ត្រមណ្ឌលកំពង់ឆ្នាំង,លោកប្រធានក្រុមប្រឹក្សាខេត្ត,លោក ស៊ុន សុវណ្ណារិទ្ធិ អភិបាលខេត្ត, លោក-លោ កស្រី ជាអភិបាល អភិបាលរង ក្រុង-ស្រុក,អាជ្ញាធរភូមិ- ឃុំ សិស្សានុសិស្ស និងប្រជាពលរដ្ឋសរុបប្រមាណ៦០០ នាក់។

មានប្រសាសន៍ក្នុងឱកាសនោះ លោកបណ្ឌិត សភាចារ្យ អ៊ុក រ៉ាប៊ុន បានមានប្រសាសន៍ថា ក្នុងឱកាសទិវាមច្ឆាជាតិ ១កក្កដា ក្នុងគោលបំណងសំខាន់នៃសកម្មភាពនេះគឺដើម្បីលើកទឹកចិត្តដល់ប្រជាពលរដ្ឋឲ្យចូលរួមថែរក្សាព្រៃ លិចទឹក និងពូជមច្ឆាជាតិឲ្យបានសំបូរឡើងវិញ។ហេតុនេះការព្រលែងពូជត្រីនៅក្នុងបឹងធម្មជាតិ ពិតជាមានសារៈសំខាន់ណាស់ ចំណែកការចូលរួមអភិរក្សពូជត្រី គឺជាកិច្ចការមួយដែលពលរដ្ឋទាំងអស់គ្នាគួរតែយកចិត្តទុកដាក់ ដែលការអភិរក្សនេះមិនត្រឹមតែជួយរក្សាបាននូវពូជត្រីក្នុងស្រុកឲ្យបានគង់វង្សប៉ុណ្ណោះទេ ថែមទាំងធានាបាននូវតុល្យភាពប្រព័ន្ធអេកូឡូស៊ីក្នុងទឹកនិងធានាសន្តិសុខស្បៀងសម្រាប់មនុស្សជំនាន់ក្រោយផងដែរ។

លោកបន្តថា«យើងអាចចូលរួមតាមរយៈការមិននេសាទដោយប្រើឧបករណ៍ខុសច្បាប់ ការមិនបំពុលទឹក និងការចូលរួមក្នុងការព្រលែងកូនត្រីឡើងវិញ»។

លោកបណ្ឌិតសភាចារ្យ អ៊ុក រ៉ាប៊ុន មានប្រសាសន៍ថា ការបញ្ឈប់សកម្មភាពការនេសាទដោយប្រើប្រាស់ឧបករណ៍ខុសច្បាប់នេះនឹងជួយឲ្យត្រីមានឱកាសបន្តពូជនិងលូតលាស់បានល្អ ដែលធានាបាននៅនិរន្តរភាពនៃធនធានធម្មជាតិទាំងនេះឱ្យសម្បូរកើនឡើង។

លោកបណ្ឌិតសភាចារ្យសង្ឃឹមយ៉ាងមុ តមាំថា ប្រជាពលរដ្ឋទាំងអស់និងចូលរួមយ៉ាងសកម្ម ក្នុងការអភិរក្សពូជត្រី និងធនធានជលផលរបស់យើង ដើម្បីជាប្រយោជន៍រួមសម្រាប់ទាំងអស់គ្នានិងសម្រាប់មនុស្សជំនាន់ក្រោយ។

លោក ងិន ហ៊ុន ប្រធានមន្ទីរកសិកម្មរុក្ខាប្រមាញ់និងនេ សាទខេត្តកំពង់ឆ្នាំង បានលើកឡើងថា សម្រាប់ទិវាមច្ឆាជាតិលើកទី១៣ របស់ខេត្តកំពង់ឆ្នាំង បានលែងប្រភេទត្រីមេពូជក្នុងស្រុក និងកូនត្រីចម្រុះជាង២០ម៉ឺនក្បាលកូន បង្កង៣ម៉ឺនក្បាល ក្នុងនោះមានប្រភេទត្រីដូចជា កូនត្រីឆ្ពិន,ត្រីកាហែរ,ត្រីព្រលូង,ត្រីប្រា,ត្រីអណ្ដែង,ត្រីក្រាញ់,ត្រី ឆ្លាំង,និងអន្ទង់ ព្រមទាំងប្រភេទត្រីដ៏កម្រមួយចំនួនទៀត ផងដែរ។
លោកបានបញ្ជាក់ទៀតថា អ្វីដែលកាន់តែគួរឱ្យកត់សម្គាល់ជាងនេះទៀតនោះ គឺចាប់តាំងពីដើមឆ្នាំ២០២៥ មកដល់បច្ចុប្បន្ន ដោយមានបទបញ្ជាដ៏ខ្ពង់ខ្ពស់របស់សម្ដេចមហាបវរធិបតី នាយករដ្ឋមន្ត្រី បានចាត់តាំងឱ្យលោកឧត្តមសេនីយ៍ ម៉ៅ សុផាន់ អគ្គមេបញ្ជាការរងកងយុ ទ្ធពលខេមរៈភូមិន្ទ និងជាមេបញ្ជាការកងទ័ពជើងគោកប ញ្ជូនកងកម្លាំង ចុះសហការជាមួយអាជ្ញាធរមានសមត្ថកិច្ចពាក់ព័ន្ធចុះអន្តរាគមន៍ទប់ស្កាត់និងបង្ក្រាបសកម្មភាពបទ ល្មើសនេសាទធំៗនៅក្នុងបឹងទន្លេសាប ក្នុងនោះក៏មានខេត្តកំពង់ឆ្នាំងផងដែរ ដោយបានធ្វើការទប់ស្កាត់និងបង្ក្រាប សកម្មភាពបទល្មើសនេសាទខុសច្បាប់ប្រកបដោយប្រសិទ្ធភាព និងបានធ្វើឲ្យទិន្នផលត្រីកើនឡើងជាបន្តបន្ទាប់៕