(ភ្នំពេញ)៖ ឧកញ៉ាបណ្ឌិត គឹម ហ៊ាង ប្រធានក្រុមប្រឹក្សាភិបាលបុរីវិមានសំណាង បានផ្តល់អនុសាសន៍ ដល់អ្នករកស៊ីទាំងអស់ មុននឹងសម្រេចចិត្តខ្ចីបំណុលពីស្ថាប័នហិរញ្ញវត្ថុ ត្រូវមានផែនការអាជីវកម្មច្បាស់លាស់ ដើម្បីជៀសវាងការធ្លាក់ចូឡទៅក្នុងវិបត្តិ ដែលនាំឱ្យប៉ះពាល់ដល់ដំណើរការអាជីវកម្ម។

លោកបានពន្យល់ថា បំណុលគឺជាលុយដែលយើងជំពាក់គេ ហើយមានការប្រាក់ ដូច្នេះការគ្រប់គ្រងបំណុលប្រកបដោយប្រសិទ្ធភាព គឺជាគន្លឹះដ៏សំខាន់សម្រាប់ភាពជោគជ័យនៃអាជីវកម្ម។

លោកឧកញ៉ាបណ្ឌិតបានពន្យល់បន្តថា «នៅពេលដែលយើងខ្ចីលុយដែលមានការប្រាក់ ឧទាហរណ៍ ៨% ពីធនាគារ យើងត្រូវប្រាកដថា លុយដែលយើងយកមកប្រើប្រាស់នោះ អាចបង្កើតផលចំណេញបានលើសពី ៨%។ បើមិនអាចរកចំណេញបានលើសពីអត្រាការប្រាក់ទេ នោះការខ្ចីប្រាក់គឺមិនមែនជាជម្រើសល្អឡើយ។ លោកបានបន្ថែមថា ផែនការអាជីវកម្មច្បាស់លាស់ គឺជាមូលដ្ឋានគ្រឹះដែលធនាគារសិក្សា និងវាយតម្លៃមុននឹងសម្រេចចិត្តផ្តល់ប្រាក់កម្ចី។ បើគ្មានផែនការច្បាស់លាស់ទេ ការខ្ចីលុយមកប្រើប្រាស់ដោយគ្មានទិសដៅ អាចនាំឱ្យអាជីវកម្មជួបបញ្ហា និងបង្កើនហានិភ័យនៃបំណុលវ័ណ្ឌក»។

ចំណុចសំខាន់មួយទៀតដែលលោក គឹម ហ៊ាង បានលើកឡើង គឺការបែងចែកឱ្យបានច្បាស់លាស់រវាងលុយសម្រាប់រកស៊ី និងចំណាយផ្ទាល់ខ្លួន។ លោកបានព្រមានថា ការយកលុយខ្ចីពីធនាគារទៅចំណាយលើសម្ភារនិយម ឬការរស់នៅហ៊ឺហា គឺជាកំហុសឆ្គងដ៏ធំដែលអាចបំផ្លាញអាជីវកម្មបាន។ លោកបានចែករំលែ កបទពិសោធន៍ផ្ទាល់ខ្លួនថា លោកមិនដែលយកលុយទៅលេងល្បែង ឬចំណាយលើសម្ភារនិយមថ្លៃៗឡើយ ដោយលុយទាំងអស់គឺសម្រាប់តែវិនិយោគ និងពង្រីកអាជីវកម្មតែប៉ុណ្ណោះ។

ក្នុងករណីដែលអាជីវកម្មជួបប្រទះការលំបាក ឬវិបត្តិ លោកឧកញ៉ាបណ្ឌិតបានផ្តល់អនុសាសន៍ឱ្យបង្ហាញភាពស្មោះត្រង់ និងចរចាដោយបើកចំហជាមួយធនាគារ។ លោកបានបញ្ជាក់ថា ធនាគារជាទូទៅមិនចង់រឹបអូសទ្រព្យសម្បត្តិរបស់អតិថិជនឡើយ ប៉ុន្តែចង់ស្វែងរកដំណោះស្រាយរួមគ្នា។ ការមិនព្រមនិយាយគ្នាដោយស្មោះត្រង់ គឺជាមូលហេតុចម្បងដែលនាំឱ្យមានការរឹបអូសទ្រព្យសម្បត្តិ។

ការគ្រប់គ្រងបំណុលប្រកបដោយការទទួលខុសត្រូវ ការមានផែនការអាជីវកម្មច្បាស់លាស់ ការបែងចែកលុយរកស៊ី និងចំណាយផ្ទាល់ខ្លួនឱ្យបានដាច់ដោយឡែក ព្រមទាំងការប្រាស្រ័យទាក់ទងដោយស្មោះត្រង់ជាមួយស្ថាប័នហិរញ្ញវត្ថុ គឺជាកត្តាសំខាន់ដែលអ្នករកស៊ីគ្រប់រូបគួរយកចិត្តទុកដាក់ ដើម្បីធានាបាននូវនិរន្តរភាព និងភាពជោគជ័យនៃអាជីវកម្មរបស់ខ្លួន៕

សូមស្តាប់ការពន្យល់បន្ថែមរបស់ ឧកញ៉ាបណ្ឌិត គឹម ហ៊ាង៖