(ភ្នំពេញ)៖ ជាមួយនឹងការប្តេជ្ញាចិត្តក្នុងការបម្រើសេវាសាធារណៈក្នុងវិស័យដីធ្លី ជូនប្រជាពលរដ្ឋរាជធានីភ្នំពេញឱ្យបានល្អ និងមានតម្លាភាព, នៅពេលនេះលោក សារិន វណ្ណា ប្រធានមន្ទីររៀបចំដែនដី នគរូបនីយកម្ម និងសំណង់ ក៏បានចេញមកបញ្ជាក់ដែរថា ការចូលរួមចុះបញ្ជីដីធ្លីមានលក្ខណៈជាប្រព័ន្ធតាមបណ្តារាជធានី ខេត្ត ត្រូវបានលើកលែងការបង់កម្រៃ បញ្ជាក់លើសេវារដ្ឋបាលមួយចំនួន នៅថ្នាក់ក្រោមជាតិ ក្នុងយន្តការពន្លឿនដល់ការចុះបញ្ជីបង្ហើយទូទាំងប្រទេស។

តាមរយៈបណ្តាញទំនាក់ទំនងសង្គមផ្លូវការរបស់ខ្លួ ននាថ្ងៃទី១២ ខែកក្កដា ឆ្នាំ២០២៦នេះ លោក សារិន វណ្ណា បានបញ្ជាក់ថា «ការចូលរួមចុះបញ្ជីដីធ្លីមានលក្ខណៈជាប្រពន្ឋ័តាមបណ្តារាជធានី ខេត្ត ត្រូវបានលើកលែងការបង់កម្រៃ បញ្ជាក់លើសេវារដ្ឋបាលមួយចំនួន នៅថ្នាក់ក្រោមជាតិ ក្នុងយន្តការពន្លឿនដល់ ការចុះបញ្ជីបង្ហើយ ទូទាំងប្រទេស។

អនុស្សាវរីយ៍ពេលខុំ្ញបានចុះជួយធ្វើកម្មសិទ្ឋជូនប្រជាពលរដ្ឋបានចំនួន ២៧មុឺនក្បាលដីនៅខេត្តកំពង់ស្ពឺ ធ្វើការទាំងថ្ងៃ ទាំងយប់ ពិសេសជាមួយបងប្អូនកម្មករ និងកម្មការនី ដោយមិនបានតម្រូវអោយសុំច្បាប់ថៅកែរោងចក្រឈប់សំរាកឡើយ(មន្ត្រីជើង២)»។

ស្របជាមួយនឹងការបញ្ជាក់ដូចនេះ លោក សារិន វណ្ណា ក៏បានបង្ហាញនូវឯកសារមួយចំនួនដែលបានបញ្ជាក់ពីកិច្ចខិតខំរបស់ក្រសួងរៀបចំដែនដី នគរូបនីយកម្ម និងសំណង់ ដែលបានកំណត់យកការចុះបញ្ជីដីធ្លីជូនប្រជាពលរដ្ឋជាការងារអាទិភាព និងត្រូវអនុវត្តឱ្យបានចប់សព្វគ្រប់នៅទូទាំងប្រទេស ក្នុងគោលបំណងធានាកម្មសិទ្ធិលើដីធ្លី ពង្រឹងសុវត្ថិភាពនៃការកាន់កាប់ដីធ្លី ដើម្បីភាពសុខដុមរមនាក្នុងសង្គម កាត់បន្ថយភាពក្រីក្រ និងអភិវឌ្ឍសេដ្ឋកិច្ចគ្រួសារ និងសង្គមជាតិ រួមទាំងមានឯកសារផ្សេងៗមួយចំនួនទៀត។

សូមបញ្ជាក់ដែរថា កាលពីពេលថ្មីៗមកនេះ លោក សារិន វណ្ណា ប្រធានមន្ទីររៀបចំដែនដី នគរូបនីយកម្ម និងសំណង់រាជធានីភ្នំពេញ ទទួលបាននូវការសាទរយ៉ាងខ្លាំង តាមរយៈការប្តេជ្ញាចិត្តរបស់លោក ក្នុងការធ្វើឱ្យបានលើការលុបបំបាត់អំពើពុករលួយ និងបម្រើសេវាជូនប្រជាពលរដ្ឋប្រកបដោយយុត្តិធម៌ និងនីតិវិធីជាធរមានផងដែរ៕