លោក សារិន វណ្ណា៖ ក្រសួងរៀបចំដែនដី អនុញ្ញាតឱ្យសរសេរឈ្មោះអ្នកទិញចំណែកអគារសហកម្មសិទ្ធិ (ខុនដូ) ជាភាសាខ្មែរ និងបន្ថែមអក្សរឡាតាំង លើបណ្ណសម្គាល់កម្មសិទ្ធិ ដើម្បីងាយស្រួលជនបរទេសផ្ទៀងផ្ទាត់ឈ្មោះ !
12-07-2026 20:42
(ភ្នំពេញ)៖ ជាវិធីដើម្បីសម្រួលដល់ជនបរទេសដែលទិញចំណែកអគារសហកម្មសិទ្ធិ (ខុនដូ) ដើម្បីអាចងាយផ្ទៀតផ្ទាត់ឈ្មោះរបស់ខ្លួន លើសន្លឹកបណ្ណនៃវិញ្ញាបនបត្រសម្គាល់កម្មសិទ្ធិ (ប្លង់រឹង) ក្រសួងរៀបចំដែនដីនគរូបនីយកម្ម និងសំណង់ បានសម្រេចអនុញ្ញាតឱ្យសរសេរឈ្មោះម្ចាស់កម្មសិទ្ធិ ជាភាសាខ្មែរ និងបន្ថែមអក្សរឡាតាំងផងដែរ។ នេះបើតាមការឱ្យដឹងពីលោក សារិន វណ្ណា ប្រធានមន្ទីររៀបចំដែនដី រាជធានីភ្នំពេញ។
លោកថា ការអនុញ្ញាតនេះ គឺងាយស្រួលជនបរទេស អាចផ្ទៀងផ្ទាត់ឈ្មោះតាមប៉ាស្ព័ររបស់គាត់បាន ហើយមន្ត្រីសុរិយោដី អាចកាត់បន្ថយនៅភាពខុសឆ្គងក្នុងការសរសេរឈ្មោះពីអក្សរឡាតាំង មកអក្សរខ្មែរថែមទៀតផង។
តាមរយៈបណ្តាញទំនាក់ទំនងសង្គមហ្វេសប៊ុកផ្លូវការ លោក សារិន វណ្ណា បានបញ្ជាក់ដូច្នេះថា «ក្រោយទទួលបានការអនុញ្ញាត ពីក្រសួងរៀបចំដែនដីនគរូបនីយកម្ម និងសំណង់ លើគំរូសន្លឹកបណ្ណនៃវិញ្ញាបនបត្រសម្គាល់ម្ចាស់ចំណែកឯកជននៃអគារសហកម្មសិទ្ធិ ការសរសេរឈ្មោះកម្មសិទ្ធិករ ជាភាសាខ្មែរ និងបន្ថែមអក្សរឡាតាំងងាយស្រួលជនបរទេស អាចផ្ទៀងផ្ទាត់ឈ្មោះ តាមប៉ាស្ព័ររបស់គាត់បាន ហើយមន្ត្រីសុរិយោដី អាចកាត់បន្ថយនៅភាពខុសឆ្គងក្នុងការសរសេរឈ្មោះពីអក្សរឡាតាំង មកអក្សរខ្មែរថែមទៀតផង។ មិនតែប៉ុណ្ណោះក៏យើងបានផ្តល់នៅទំនុកចិត្តដល់ជនបរទេស ដែលបានទិញអចលនវត្ថុ (ជាន់ទី១ឡើង) ក្នុងប្រទេសយើងផងដែរ»។
ទិន្នន័យ Fresh AI បានឱ្យដឹងថា ប្រទេសកម្ពុជាបានអនុញ្ញាតឱ្យជនបរទេសទិញខុនដូ ឬអគារសហកម្មសិទ្ធិ ចាប់ពីឆ្នាំ២០១០ តទៅ។ ការអនុញ្ញាតនេះធ្វើឡើងតាមរយៈ ច្បាប់ស្តីពីការផ្តល់សិទ្ធិកម្មសិទ្ធិលើចំណែកឯកជននៃអគារសហកម្មសិទ្ធិដល់ជនបរទេស ដែលត្រូវបានប្រកាសឱ្យប្រើប្រាស់នៅថ្ងៃទី២៨ ខែឧសភា ឆ្នាំ២០១០។
ច្បាប់នេះត្រូវបានបង្កើតឡើងក្នុងគោលបំណងបង្កលក្ខណៈងាយស្រួលដល់ជនបរទេសក្នុងការយកទុនមកវិនិយោគ និងជួយសម្រួលដល់ធុរកិច្ចលើវិស័យសំណង់ ក៏ដូចជាឆ្លើយតបទៅនឹងការកើនឡើងនៃទីផ្សារអចលនវត្ថុ។
ជនបរទេសត្រូវបានអនុញ្ញាតឱ្យមានសិទ្ធិក្នុងការទិញលក់លើអគារសហកម្មសិទ្ធិ ចាប់ពីជាន់ទី១ឡើងទៅ ដោយត្រូវបានផ្តល់សិទ្ធិក្នុងការប្រើប្រាស់ និងអាស្រ័យផលលើចំណែករួម៕
