(ភ្នំពេញ)៖ លោក សារិន វណ្ណា ប្រធានមន្ទីររៀបចំដែនដីរាជធានីភ្នំពេញ នៅយប់ថ្ងៃទី១២ ខែកក្កដា ឆ្នាំ២០២៦នេះតាមរយៈបណ្តាញទំនាក់ទំនងសង្គមផ្លូវការ បានជូនដំណឹងដល់ម្ចាស់កម្មសិទ្ធិករ ធនាគារ មីក្រូហិរញ្ញវត្ថុ និងម្ចាស់បំណុលឯកជន ចូលរួមសហការពន្លឿនបណ្ណកម្មសិទ្ធិកកស្ទះ។

លោកឱ្យដឹងថា មន្ទីររៀបចំដែនដី នគរូបនីយកម្មសំណង់ និងសុរិយោដីរាជធានីភ្នំពេញ សូមជំរាបជូនដំណឹងដល់ម្ចាស់កម្មសិទ្ធិករ ធនាគារ មីក្រូហិរញ្ញវត្ថុ និងម្ចាស់បំណុលឯកជន អោយបានជ្រាបថា ដោយពិនិត្យឃើញបណ្ណកម្មសិទ្ធិកកស្ទះ (ម្ចាស់មិនទាន់មកទទួល ជាប់បង់ពន្ធប្រថាប់ត្រា និងប្រាក់ពន្ធសូន្យក្នុងរង្វង់ញាតិលើកទី១) ព្រមទាំងហេតុផលផ្សេងៗជាច្រើន ដូចនេះមន្ទីរសូមជូនជាព័ត័មានដូចខាងក្រោម៖

1. បងប្អូនប្រជាពលរដ្ឋខែ្មរ ដែលស្នាក់នៅ ឬធ្វើការនៅក្រៅប្រទេស អាចធ្វើលិខិតប្រគល់សិទ្ធិ ជូនបងប្អូន ឬសាច់ញ្ញាតិ មកបើកជំនួសបាន ដោយត្រូវថតជាវីដេអូ ភ្ជាប់ដោយសារសំឡេងផងដែរ (ជៀសវាងការចំណាយធ្វើដំណើរ និង ប៉ះពាល់ការងារប្រចាំថ្ងៃ)។

2. គ្រប់ធនាគារ មីក្រូហិរញ្ញវត្ថុ និងម្ចាស់បំណុលឯកជន ដែលទទួលដាក់បញ្ចាំ ឬ ហុីប៉ូតែក លើបណ្ណសំគាល់សិទ្ធិកាន់កាប់អចលវត្ថុ(ភោគៈ) ឬលិខិតផ្ទេរសិទ្ធិកាន់កាប់ដី(ប្លង់ទន់) ត្រូវនាំកូនបំណុលមកផ្ទេរបន្ទុកលើវិញ្ញាបនបត្រសម្គាល់ម្ចាស់អចលនវត្ថុ (ប្លង់រឹង ឬ ប្លង់Lmap) នៅរដ្ឋបាលសុរិយោដី។

3. បណ្ណកម្មសិទ្ធិដែលជាប់ពន្ធប្រថាប់ត្រា មន្ទីរនិងរៀបចំបែបបទជូន។

4. មានបណ្ណកម្មសិទ្ធិ មានសុវត្ថិភាពក្នុងការកាន់កាប់ដី និង មានសិទ្ធិជ្រើសរើសម្ចាស់បំណុលណាមានការប្រាក់ទាបផងដែរ។

មន្ទីររៀបចំដែនដី នគរូបនីយកម្មសំណង់ និងសុរិយោដីរាជធានីភ្នំពេញ សង្ឃឹមជឿជាក់លើការចូលរួម សហការល្អ ពីសំណាក់បងប្អូនទាំងអស់គ្នា៕