(ភ្នំពេញ)៖ ជាតិសាសន៍មួយអាចក្លាយជាប្រទេសដ៏រឹងមាំពិតប្រាកដទៅបាន មិនមែនអាស្រ័យទៅលើតែការរីកចម្រើនខាងសេដ្ឋកិច្ចប៉ុណ្ណោះទេ ប៉ុន្តែគឺនៅពេលដែលស្មារតីនិងទឹកចិត្តរបស់ប្រជាពលរដ្ឋចាប់ផ្តើមរីកលូតលាស់ផងដែរ។

ការផ្លាស់ប្តូរដ៏អស្ចារ្យបំផុតក្នុងវិស័យបរិស្ថាន មិនមែនចាប់ផ្តើមចេញពីក្នុងព្រៃឈើនោះឡើយ។ ប៉ុន្តែ វាចាប់ផ្តើមចេញពីក្នុងបេះដូងរបស់មនុស្សម្នាក់ៗ។

ជាច្រើនជំនាន់មកហើយ ដើមឈើតែងតែត្រូវបានគេមើលឃើញជាចម្បងត្រឹមតែជាឈើប្រណីត អុស ដុត ឬជាដីដែលត្រូវឆ្ការសម្រាប់ទាញយកផលប្រយោជន៍ផ្សេងៗ។ ព្រៃឈើធ្លាប់ជាប្រភពទ្រទ្រង់ជីវភាព ជាជម្រក និងជាធនធានដែលសហគមន៍ត្រូវការដើម្បីរស់។ ព្រៃឈើបានដើរតួនាទីយ៉ាងសំខាន់ក្នុងការគាំទ្រដល់ការរស់នៅរបស់ប្រជាជន។ទោះជាយ៉ាងណាក៏ដោយ នាពេលបច្ចុប្បន្ននេះ ការយល់ដឹងរបស់យើងបានឈានដល់កម្រិតថ្មីមួយហើយ។

ឥឡូវនេះ យើងបានដឹងហើយថា ដើមឈើដែលមានជីវិតមួយដើម គឺមានតម្លៃលើសលប់ជាងដើមឈើដែលត្រូវបានកាប់រំលំ។ ព្រៃឈើដែលឈរយ៉ាងរឹងមាំ ជួយផ្តល់ខ្យល់អាកាសបរិសុទ្ធ រក្សាប្រភពទឹក ការពារសត្វព្រៃ ធ្វើឱ្យអាកាសធាតុត្រជាក់ត្រជុំ ការពារដីមានជីជាតិ គាំទ្រដល់វិស័យទេសចរណ៍ ពង្រឹងវិស័យកសិកម្ម ស្រូបយកកាបូន និងលើកកម្ពស់គុណភាពជីវិតរបស់ប្រជាពលរដ្ឋខ្មែរគ្រប់រូប។ ការផ្លាស់ប្តូរការយល់ដឹងនេះ គឺជាសមិទ្ធផលបរិស្ថានដ៏សំខាន់បំផុតមួយរបស់ប្រទេសកម្ពុជា។

ពិព័រណ៍ «ពន្លកបៃតង» ដែលប្រព្រឹត្តទៅចាប់ពីថ្ងៃទី១០ ដល់ថ្ងៃទី១៣ ខែកក្កដា នៅទីស្តីការក្រសួងបរិស្ថាន គឺឆ្លុះបញ្ចាំងយ៉ាងច្បាស់ពីការផ្លាស់ប្តូរជាវិជ្ជមាននេះ។ ព្រឹត្តិការណ៍នេះ មិនមែនគ្រាន់តែជាការដាក់បង្ហាញកូនឈើធម្មតាប៉ុណ្ណោះទេ។ ប៉ុន្តែ វាគឺជាពិព័រណ៍នៃក្តីសង្ឃឹម។ នេះគឺជាពិព័រណ៍នៃការផ្លាស់ប្តូរឥរិយាបថ និងផ្នត់គំនិត និងជាពិព័រណ៍ដែលអញ្ជើញប្រជាពលរដ្ឋខ្មែរគ្រប់រូបឱ្យក្លាយជា «ឆ្មាំការពារធម្មជាតិ»។

នៅពេលដែលកុមារម្នាក់ទទួលបានកូនឈើមួយដើមទៅដាំ ជំនួសឱ្យការគ្រាន់តែរៀនអំពីដើមឈើនៅក្នុងសៀវភៅពុម្ព កុមារនោះនឹងចាប់ផ្តើមបង្កើតទំនាក់ទំនងពេញមួយជីវិតជាមួយធម្មជាតិ។

នៅពេលដែលគ្រួសារមួយដាំដើមឈើរួមគ្នា ពួកគេមិនមែនគ្រាន់តែបន្ថែមពណ៌បៃតងដល់ផ្ទះសម្បែងរបស់ពួកគេនោះទេ។ ប៉ុន្តែ ពួកគេកំពុងបណ្តុះនូវស្មារតីទទួលខុសត្រូវ ពួកគេកំពុងបង្រៀនពីភាពអត់ធ្មត់ ពួកគេកំពុងបង្រៀនឱ្យចេះគោរពតម្លៃនៃជីវិត ហើយអ្វីដែលសំខាន់បំផុតនោះគឺ ពួកគេកំពុងបង្ហាញថា ការការពារធម្មជាតិ គឺជាសកម្មភាពដែលកើតចេញពីសេចក្តីស្រឡាញ់។

ពិព័រណ៍ «ពន្លកបៃតង» ជានិម្មិតរូបនៃរបៀបគិតគូរថ្មីមួយ។
ជំនួសឱ្យការសួរថា៖ «តើខ្ញុំអាចបេះបោច ឬយកអ្វីខ្លះពីព្រៃ?»
យើងចាប់ផ្តើមសួរវិញថា៖ «តើខ្ញុំអាចធ្វើអ្វីខ្លះដើម្បីតបស្នងដល់ព្រៃឈើវិញ?»។

ការផ្លាស់ប្តូរទស្សនៈដ៏សាមញ្ញនេះ មានថាមពលអាចកែប្រែវាសនាប្រទេសជាតិទាំងមូលបាន។ នៅទូទាំងប្រទេសកម្ពុជា សហគមន៍ជាច្រើនបាននិងកំពុងបង្ហាញជាភស្តុតាងស្រាប់ថា ព្រៃឈើអាចបង្កើតភាពរីកចម្រើនរុងរឿងបាន ដោយមិនចាំបាច់រងការបំផ្លិចបំផ្លាញឡើយ។

ព្រៃឈើដែលមានសុខភាពល្អ ជួយទាក់ទាញភ្ញៀវទេសចរ ផ្តល់ទឹកស្អាត គាំទ្រកសិកម្ម ការពារជីវៈចម្រុះ បង្កើតការងារនៅក្នុងមូលដ្ឋាន និងពង្រឹងជីវភាពរស់នៅរបស់ប្រជាពលរដ្ឋនៅតាមជនបទ។ ជោគជ័យនៃគោលដៅលំហែបៃតងដែលគ្រប់គ្រងដោយសហគមន៍ បានសបញ្ជាក់ថា ការងារអភិរក្ស និងការងារអភិវឌ្ឍន៍អាចដើរទន្ទឹមគ្នាទៅមុខជានិច្ច។ ដើមឈើនីមួយៗដែលត្រូវបានដាំនៅថ្ងៃនេះ បានបញ្ជូនសារយ៉ាងមានឥទ្ធិពលមួយ។

ដើមឈើទាំងនោះប្រាប់ទៅមនុស្សជំនាន់ក្រោយថា យើងបានជ្រើសរើសការស្តារឡើងវិញ ជំនួសឱ្យការបំផ្លិចបំផ្លាញ ថា យើងបានជ្រើសរើសការថែរក្សាការពារ ដោយមិនបណ្តោយឱ្យរេចរឹល ហើយយើងបានជ្រើសរើសការបន្សល់ទុកនូវប្រទេសកម្ពុជាមួយដ៏បៃតងជាងមុន សម្រាប់កូនចៅរបស់យើង។

ក្រសួងបរិស្ថានបានត្រៀមកូនឈើចំនួន ៥លានដើម ដើម្បីចែកជូនដោយឥតគិតថ្លៃនៅឆ្នាំនេះ ដែលជាផ្នែកមួយនៃយុទ្ធសាស្ត្ររយៈពេលវែងក្នុងការពង្រីកគម្របព្រៃឈើរបស់កម្ពុជា តាមរយៈការចូលរួមពីសាធារណជន។

កូនឈើនីមួយៗតំណាងឱ្យឱកាសមួយសម្រាប់គ្រប់ក្រុមគ្រួសារ សាលារៀន វត្តអារាម ក្រុមហ៊ុនឯកជន ឬសហគមន៍ ក្នុងការរួមចំណែកដល់ចលនាជាតិដ៏ធំធេងនេះ។ ប៉ុន្តែ ជោគជ័យពិតប្រាកដនៃពិព័រណ៍ «ពន្លកបៃតង» នឹងមិនត្រូវវាស់វែងត្រឹមតែចំនួនកូនឈើដែលបានចែកជូននោះឡើយគឺត្រូវបានវាស់វែងដោយចំនួនបេះដូងដែលទទួលបានការបំផុសគំនិត ដោយចំនួនកុមារដែលធំដឹងក្តីឡើងជាមួយសេចក្តីស្រឡាញ់ចំពោះព្រៃឈើ ដោយចំនួនគ្រួសារដែលជ្រើសរើសការដាំដុះ ជំនួសឱ្យការកាប់បំផ្លាញ និងដោយចំនួនសហគមន៍ដែលមើលឃើញថា ព្រៃឈររស់ គឺជាទ្រព្យសម្បត្តិដ៏មានតម្លៃជានិរន្តរ៍សម្រាប់មនុស្សជំនាន់ក្រោយ។

ធម្មជាតិផ្តល់អ្វីៗគ្រប់យ៉ាងដល់យើង ដោយមិនដែលទាមទារការដឹងគុណ ឬការកោតសរសើរឡើយ។ រឿងតិចតួចបំផុតដែលយើងអាចធ្វើបាន គឺការចូលរួមការពារធម្មជាតិវិញ។

ចាប់ពីថ្ងៃទី១០ ដល់ថ្ងៃទី១៣ ខែកក្កដា សូមយើងរួមគ្នាធ្វើដំណើរទៅកាន់ក្រសួងបរិស្ថាន។

សូមនាំកូនចៅរបស់លោកអ្នកទៅជាមួយ, សូមនាំឪពុកម្តាយរបស់លោកអ្នកទៅជាមួយ, សូមនាំមិត្តភក្តិរបស់លោកអ្នកទៅជាមួយ, ទៅទទួលយកកូនឈើដោយឥតគិតថ្លៃ, ដាំកូនឈើទាំងនោះ ថែរក្សាកូនឈើទាំងនោះ និងមើល, ការលូតលាស់របស់កូនឈើទាំងនោះ, ពីព្រោះដើមឈើនីមួយៗដែលបានដាំ គឺលើសពីការដុះពន្លកនៃកូនរុក្ខជាតិ។

នេះគឺជាការប្រកាសជាសកលថា កម្ពុជាកំពុងក្លាយជាប្រទេសមួយដែលព្រៃឈើត្រូវបានឱ្យតម្លៃ មិនមែនដោយសារចំនួនដើមឈើដែលគេអាចកាប់បាននោះទេ ប៉ុន្តែគឺដោយសារចំនួនជីវិតដែលព្រៃឈើទាំងនោះបានជួយទ្រទ្រង់។

កម្ពុជាដែលកាន់តែបៃតង ត្រូវចាប់ផ្តើមចេញពីបេះដូងដែលស្រឡាញ់ភាពបៃតង ហើយបេះដូងដែលស្រឡាញ់ភាពបៃតង ចាប់ផ្តើមចេញពីសកម្មភាពដ៏សាមញ្ញមួយ គឺការដាំដើមឈើមួយដើម៕