(បាត់ដំបង)៖ នៅថ្ងៃទី១០ ខែកក្កដា ឆ្នាំ២០២៦ វេលាម៉ោង១៣:០០នាទី កម្លាំងនគរបាលការពារព្រំដែនគោកលេខ៨១៩ ក្រោមការដឹកនាំផ្ទាល់របស់លោកវរសេនីយ៍ឯក អ៉ិន កុល មេបញ្ជាការវរសេនាតូច បានធ្វើការបង្ក្រាបដោយជោគជ័យនូវករណីរត់ពន្ធគ្រឿងបន្លាស់ម៉ូតូខុសច្បាប់មួយករណី នៅចំណុចអូរថ្ម ព្រំដែនកម្ពុជា-ថៃ ស្ថិតក្នុងភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង។

ក្នុងប្រតិបត្តិការនេះ សមត្ថកិច្ចបានឃាត់ខ្លួនជនសង្ស័យម្នាក់ឈ្មោះ មឿន ឆៃ ភេទប្រុស អាយុ ៣៦ឆ្នាំ រស់នៅភូមិអូរអន្លក់ ឃុំតាសែន ស្រុកកំរៀង ខេត្តបាត់ដំបង ដែលកំពុងធ្វើសកម្មភាពជញ្ជូនគ្រឿងបន្លាស់ម៉ូតូចំនួន ០៤ការ៉ុង ឆ្លងកាត់អូរព្រំដែនពីប្រទេសថៃចូលមកកម្ពុជា។

វត្ថុតាងដែលត្រូវបានដកហូតរួមមាន ស្បែកប្រាំងម៉ូតូចំនួន ១០ដុំ ថាស់ចំនួន ០៤ដុំទំហំ ៣១០ ថាស់ចំនួន ០២ដុំទំហំ ២៤០ ដងអាការម៉ូតូចំនួន ២០ដុំ ស្គុតតែចំនួន ០៩សន្លឹក រឺស័រចំនួន ២០កញ្ចប់តូច អំពូលភ្លើងញ៉ាក់ចំនួន ២៨កញ្ចប់តូច តូយូប្រេងចំនួន ០៨ឈុត ឆ្នាំងផ្លាក់ចំនួន ៣០ ជ័របាំងខ្យល់ចំនួន ១០ ប្រអប់បញ្ជាភ្លើងចំនួន ០១ កអៀម៉ូតូចំនួន ០៥ ពិស្តុងម៉ូតូចំនួន ៣៥ បេនសាំងម៉ូតូចំនួន ០៦ កម្រងសាំងចំនួន ០៥ ដៃម៉ូតូចំនួន ១៥ ចង្កៀងជ័រចំនួន ១០ និងកូនប៊ីស្តុងចំនួន ១៤ ស្ពឺមីញ៉ុងចំនួន ៥០គ្រាប់។

ក្រោយពីការពិនិត្យ និងកសាងសំណុំរឿងរួច សមត្ថកិច្ចបានបញ្ជូនវត្ថុតាង និងជនសង្ស័យទៅការិយាល័យគយប្រចាំការនៅភូមិអូរដា ខេត្តបាត់ដំបង។

ទោះជាយ៉ាងណា ខាងគយមិនបានទទួលយកនោះទេ ហេតុនេះកម្លាំងនគរបាលក៏បានបញ្ជូនបន្តមកកាន់អធិការដ្ឋាននគរបាលស្រុកកំរៀងវិញ ដើម្បីបន្តនីតិវិធីច្បាប់។

ការបង្ក្រាបនេះបង្ហាញពីការប្តេជ្ញាចិត្តរបស់កម្លាំងសមត្ថកិច្ចក្នុងការទប់ស្កាត់បទល្មើសឆ្លងដែន និងរក្សាសន្តិសុខសណ្តាប់ធ្នាប់នៅតាមតំបន់ព្រំដែន។