(ភ្នំពេញ)៖ លោក យឿន យឿត អ្នកតាមដានស្ថានភាពនយោបាយកម្ពុជា តាមទស្សនៈរបស់ខ្លួន នៅថ្ងៃទី១៣ ខែកក្កដា ឆ្នាំ២០២៦ បានឲ្យដឹងថា ថៃអាចនឹងប្រើប្រាស់សេណារីយ៉ូ ចំនួន ៣ ពាក់ព័ន្ធនឹងដំណោះស្រាយជម្លោះព្រំដែនជាមួយកម្ពុជា។

បើតាមលោក យឿន យឿត សេណារីយ៉ូទាំង ៣នោះ រួមមាន៖

ជម្រើសទី១៖ ថៃប្រើយុទ្ធសាស្ត្រ ល្បិចដុតផ្ទះខ្លួនឯង

នេះជាជម្រើសដ៏គ្រោះថ្នាក់បំផុត ប៉ុន្តែថៃធ្លាប់ប្រើរួចមកហើយកាលពីឆ្នាំ ២០០៨-២០១១។ របៀបដែលថៃអាចនឹងធ្វើ គឺរដ្ឋាភិបាលថៃអាចនឹងបើកដៃ ឬជម្រុញឱ្យក្រុមជាតិនិយមជ្រុល (ដូចជាក្រុមអាវលឿង ឬក្រុមទាហានប៉ារ៉ា) ចេញមកធ្វើបាតុកម្មដ៏ធំនៅព្រំដែន ឬធ្វើការបាញ់បោះគំរាមកំហែងខាងយោធាមួយប្រាវ។ បន្ទាប់មក រដ្ឋាភិបាលថៃនឹងយកលេសនេះទៅប្រាប់ UN និង កម្ពុជាថា៖ «រដ្ឋាភិបាលចង់ដោះស្រាយតាមច្បាប់ណាស់ ប៉ុន្តែស្ថានភាពក្នុងស្រុក និងកងទ័ពមិនព្រមឡើយ បើកម្ពុជានៅតែបន្តប្តឹង វានឹងផ្ទុះសង្គ្រាមជាមិនខាន»។ គោលបំណងរបស់ថៃគឺ ប្រើប្រាស់សម្ពាធសង្គ្រាម និងសន្តិសុខ ដើម្បីគំរាមឱ្យកម្ពុជារាថយ និងលុបចោលយន្តការអន្តរជាតិ។

ជម្រើសទី២៖ ថៃប្រើយុទ្ធសាស្ត្រ ពន្យារពេល និងបង្កើតឧបសគ្គសម្រាប់នីតិវិធី

នេះជាក្រឡាការទូតដំបូងបង្អស់ដែលថៃទំនងជានឹងយកមកប្រើ ព្រោះវាជាជំនាញរបស់ថៃ អាចនឹងប្រើប្រាស់នៅការចន្លោះប្រហោងនៃយន្តការ ផ្សៈផ្សារដោយចាប់បង្ខំ UNCLOS នីតិវិធីដើម្បីអូសបន្លាយពេលវេលា។

ជម្រើសទី៣៖ ថៃប្រើយុទ្ធសាស្ត្រថ្នម ដើម្បីបង្វែរ

មកទ្វេភាគីវិញ ថៃដឹងច្បាស់ថាការដោះស្រាយនៅលើឆាកអន្តរជាតិជាមួយក្រុមអ្នកជំនាញអឺរ៉ុបរបស់កម្ពុជា គឺគេចាញ់ប្រៀប។ ដូច្នេះថៃអាចនឹងប្រើរូបភាពអន្តរជាតិជាឈ្នាន់ ដើម្បីបង្ខំឱ្យមានការចរចាក្រៅផ្លូវការ។ ថៃនឹងនិយាយផ្អែមល្ហែមថា យើងជាបងប្អូនអាស៊ានជិតខាងគ្នា មិនបាច់ឱ្យពួកលោកខាងលិច (UN) មកកាត់សេចក្តីនាំតែវែងឆ្ងាយទេ ពួកយើងមកដោះស្រាយគ្នាបែបគ្រួសារវិញល្អជាង គោលបំណងរបស់ថៃគឺ បញ្ចុះបញ្ចូលឱ្យកម្ពុជា ដកពាក្យប្ដឹង ពី UNCLOS ត្រឡប់មកចូលតុចរចាទ្វេភាគីវិញ ដើម្បីឱ្យថៃអាចគ្រប់គ្រងស្ថានភាពបានឡើងវិញ៕