ផលនៃភាពអត់ធ្មត់ យុត្តិធម៌កំពុងធ្លាក់មក! សភាប្រើភាសាបារាំង អំពាវនាវឱ្យថៃ គោរពអធិបតេយ្យ និងបូរណភាពទឹកដីកម្ពុជា, ជៀសវាងរាល់សកម្មភាពឯកតោភាគីដែលបង្កភាពតានតឹងកាន់តែធ្ងន់ធ្ងរ
13-07-2026 12:54
(ភ្នំពេញ)៖ ស្មារតីនៃការប្រកាន់យកដំណោះស្រាយដោយសន្តិវិធីផ្អែកលើច្បាប់អន្តរជាតិនៅចំពោះមុខនៃការឈ្លានពានរបស់ថៃនោះ បានធ្វើឱ្យកម្ពុជាកំពុងទទួលផល ហើយយុត្តិធម៌ពីលើឆាកអន្តរជាតិក៏កំពុងធ្លាក់មកហើយ។ សភាប្រើភាសាបារាំង បានអំពាវនាវថៃ ឱ្យគោរពអធិបតេយ្យ និងបូរណភាពទឹកដីកម្ពុជា ហើយជៀសវាងរាល់សកម្មភាពឯកតោភាគីដែលបង្កភាពតានតឹងកាន់តែធ្ងន់ធ្ងរ។
ការអំពាវនាវនេះ បានធ្វើឡើងតាមសំណើរបស់គណៈកម្មការនយោបាយក្នុងសម័យប្រជុំពេញអង្គនៅរដ្ឋធានីយុនដេ ប្រទេសកាមេរូនចន្លោះពីថ្ងៃទី១០ ដល់១១ ខែកក្កដា ឆ្នាំ២០២៦។
ក្នុងកិច្ចប្រជុំនោះ សភាប្រើភាសាបារាំង បានសម្តែងការព្រួយបារម្ភយ៉ាងខ្លាំងចំពោះការបន្តភាពតានតឹង និងសកម្មភាពនានា ដែលត្រូវបានរាយការណ៍នៅក្នុងតំបន់ព្រំដែនក្រោមការកាន់កាប់ដោយប្រទេសថៃ មានជាអាទិ៍ ការសាងសង់ហេដ្ឋារចនាសម្ព័ន្ធស៊ីវិល និងយោធា ការរៀបចំពិធីសាសនានៅទីតាំងវប្បធម៌ និងសាសនា ក៏ដូចជាគំនិតផ្តួចផ្តើមក្នុងការបែងចែកដីធ្លីនៅតំបន់ទាំងនោះ។
សភាប្រើភាសាបារាំង ក៏បានសម្តែងការសោកស្តាយយ៉ាងជ្រាលជ្រៅចំពោះការរងទុកវេទនារបស់ប្រជាជនស៊ីវិល ក៏ដូចជាការប៉ះពាល់ ឬការបំផ្លិចបំផ្លាញបេតិកភណ្ឌវប្បធម៌ ដែលជាកេរមរតករួមរបស់មនុស្សជាតិ តាមរបៀបមួយ ដែលអាចធ្វើឱ្យប៉ះពាល់ដល់ចក្ខុវិស័យនៃសន្តិភាពយូរអង្វែង និងការផ្សះផ្សាជាតិ។
ទន្ទឹមនឹងការអំពាវនាវថៃ ឱ្យគោរពអធិបតេយ្យ និងបូរណភាពទឹកដីកម្ពុជា ហើយជៀសវាងរាល់សកម្មភាពឯកតោភាគីដែលបង្កភាពតានតឹងកាន់តែធ្ងន់ធ្ងរហើយនោះ សភាប្រើភាសាបារាំង ក៏បានអំពាវនាវឱ្យថៃ គោរពបទឈប់បាញ់ និងការអនុវត្តកិច្ចព្រមព្រៀងនៃសេចក្តីថ្លែងការណ៍ ដែលបានចុះហត្ថលេខាដោយនាយករដ្ឋមន្ត្រីថៃ និងកម្ពុជា នៅទីក្រុងគូឡាឡាំពួនៅថ្ងៃទី២៦ ខែតុលា ឆ្នាំ២០២៥។
សភានិយាយភាសាបារាំងដែលមានសមាជិកជាង ៩៩ ស្ថាប័ន (ប្រទេស និងអង្គការអន្តរជាតិ) ក៏បានអំពាវនាវឱ្យមានការបន្ធូរបន្ថយភាពតានតឹង ការបន្តកិច្ចសន្ទនារវាងភាគីពាក់ព័ន្ធ និងការដកកងកម្លាំងប្រដាប់អាវុធទាំងអស់ជាបន្ទាន់ចេញពីតំបន់ជម្លោះ។
សភានិយាយភាសាបារាំង បានបង្ហាញការគាំទ្រការដោះស្រាយវិវាទដោយសន្តិវិធីក្នុងរយៈពេលដ៏ខ្លីបំផុត តាមរយៈយន្តការទ្វេភាគីទាំងអស់ដែលបានបង្កើតឡើង ជាពិសេសគណៈកម្មការចម្រុះខណ្ឌសីមាព្រំដែនគោក (JBC) ក្នុងស្មារតីនៃកិច្ចសន្ទនា និងការគោរពច្បាប់អន្តរជាតិ។
សភានិយាយភាសាបារាំង បានគាំទ្រការធ្វើឱ្យមានប្រក្រតីភាពនៃទំនាក់ទំនងរវាងកម្ពុជា និងថៃ ដោយផ្អែកលើការទទួលស្គាល់ទៅវិញទៅមកលើអធិបតេយ្យ បូរណភាពទឹកដី និងភាពមិនអាចរំលោភបាននៃព្រំដែន ក៏ដូចជាការខណ្ឌសីមាព្រំដែន អនុលោមតាមក្របខណ្ឌគតិយុត្ត ដែលបានកំណត់ដោយលិខិតុបករណ៍អន្តរជាតិ៕
