(ភ្នំពេញ)៖ កម្មវិធីសិក្សាថ្នាក់បរិញ្ញាបត្រជាន់ខ្ពស់រួមគ្នា ឯកទេសពាណិជ្ជកម្មអេឡិចត្រូនិកឆ្លងដែន ដែលជាកិច្ចសហប្រតិបត្តិការរវាងសាកលវិទ្យាល័យហិរញ្ញវត្ថុនិងសេដ្ឋកិច្ចជាំងស៊ី (JUFE) នៃសាធារណរដ្ឋប្រជាមានិតចិន និងរាជបណ្ឌិត្យសភាកម្ពុជា (RAC) កំពុងបើកទទួលចុះឈ្មោះសម្រាប់និស្សិតដែលមានបំណងចង់ពង្រីកចំណេះដឹង និងជំនាញក្នុងវិស័យដ៏មានសក្តានុពលនេះ។ កម្មវិធីនេះត្រូវបានរៀបចំឡើងដើម្បីឆ្លើយតបទៅនឹងតម្រូវការទីផ្សារការងារដែលកំពុងរីកចម្រើនយ៉ាងឆាប់រហ័ស ជាពិសេសក្នុងបរិបទនៃសេដ្ឋកិច្ចឌីជីថល និងពាណិជ្ជកម្មអន្តរជាតិ។

ការសិក្សានេះនឹងផ្ដោតសំខាន់លើឯកទេសពាណិជ្ជកម្មអេឡិចត្រូនិកឆ្លងដែន ដែលជាវិស័យស្នូលក្នុងការជំរុញកំណើនសេដ្ឋកិច្ច និងការធ្វើសមាហរណកម្មតំបន់។ និស្សិតនឹងទទួលបានការបណ្ដុះបណ្ដាលដោយផ្ទាល់ពីសាស្ត្រាចារ្យឆ្នើមៗមកពីសាកលវិទ្យាល័យទាំងពីរ ដែលមានបទពិសោធន៍ និងជំនាញច្បាស់លាស់។ ភាសាដែលប្រើប្រាស់ក្នុងការបង្រៀនភាគច្រើនជាភាសាចិន ប៉ុន្តែក៏មានមុខវិជ្ជាខ្លះបង្រៀនជាភាសាអង់គ្លេស ឬខ្មែរផងដែរ ដើម្បីធានាបាននូវភាពងាយស្រួលក្នុងការសិក្សា។

កម្មវិធីសិក្សារយៈពេល ២ឆ្នាំនេះ នឹងប្រព្រឹត្តទៅនៅទីតាំងពីរគឺ ភ្នំពេញ ប្រទេសកម្ពុជា និងណានឆាង ប្រទេសចិន ដែលផ្ដល់ឱកាសឱ្យនិស្សិតទទួលបានបទពិសោធន៍សិក្សា និងវប្បធម៌ប្លែកៗ។ លើសពីនេះ និស្សិតក៏តម្រូវឱ្យចុះកម្មសិក្សាយ៉ាងតិច ២ខែ នៅក្រុមហ៊ុនក្នុងប្រទេសចិន ឬកម្ពុជា ដើម្បីអនុវត្តចំណេះដឹងទ្រឹស្ដីទៅក្នុងការងារជាក់ស្ដែង និងពង្រឹងសមត្ថភាពវិជ្ជាជីវៈ។

ចំពោះលក្ខខណ្ឌនៃការចុះឈ្មោះ និស្សិតត្រូវមានសញ្ញាបត្របរិញ្ញាបត្រ ដែលមានពិន្ទុ GPA ជាមធ្យមចាប់ពី ៣.០ ឡើងទៅ និងមានចំណេះដឹងភាសាចិនកម្រិត HSK Level 4 ឬសញ្ញាបត្រភាសាចិនដែលមានតម្លៃស្មើ ដែលនឹងត្រូវបានសម្រេចដោយគណៈកម្មការរៀបចំការបណ្ដុះបណ្ដាល។ ឯកសារភ្ជាប់សម្រាប់ការចុះឈ្មោះរួមមាន ព្រឹត្តបត្រពិន្ទុ លិខិតឧទ្ទេសនាម និងទម្រង់ចូលរៀនពី JUFE ជាដើម។ កម្មវិធីនេះនឹងផ្ដល់សញ្ញាបត្របរិញ្ញាបត្រជាន់ខ្ពស់ចំនួនពីរ គឺពី JUFE និង RAC ដែលជាការទទួលស្គាល់ជាអន្តរជាតិ។

តាមរយៈកម្មវិធីនេះ និស្សិតនឹងត្រូវបានបណ្តុះបណ្តាលលើមុខវិជ្ជាសំខាន់ៗជាច្រើន រួមមាន ការគ្រប់គ្រងហិរញ្ញវត្ថុអន្តរជាតិ ទីផ្សារសកល ច្បាប់ពាណិជ្ជកម្មអន្តរជាតិ និងយុទ្ធសាស្ត្រធុរកិច្ចសកលលោក។ ការរួមបញ្ចូលគ្នារវាងបទពិសោធន៍ និងជំនាញរបស់ស្ថាប័នអប់រំទាំងពីរ នឹងធានាបាននូវគុណភាពអប់រំខ្ពស់ និងបរិយាកាសសិក្សាប្រកបដោយភាពច្នៃប្រឌិត។

ការបើកកម្មវិធីថ្នាក់បរិញ្ញាបត្រជាន់ខ្ពស់នេះ គឺជាសក្ខីភាពមួយនៃការប្តេជ្ញាចិត្តរបស់រាជបណ្ឌិត្យសភាកម្ពុជា ក្នុងការលើកកម្ពស់វិស័យអប់រំ និងការអភិវឌ្ឍធនធានមនុស្សនៅកម្ពុជា ស្របតាមចក្ខុវិស័យរបស់រាជរដ្ឋាភិបាល។ វាជាជំហានដ៏សំខាន់មួយក្នុងការកសាងមូលដ្ឋានគ្រឹះដ៏រឹងមាំ សម្រាប់អនាគតសេដ្ឋកិច្ចកម្ពុជា ដែលកាន់តែមានសមាហរណកម្មជាមួយសេដ្ឋកិច្ចពិភពលោក៕